Valancin Akudovič: «Praha našaha myśleńnia nakanavanaja nam losam…»

U Minsku projdzie ŭnikalnaja vystava, jakaja pradstavić intelektualny darobak biełarusaŭ za apošnija 30 hod.

Encykłapedyi, antałohii, almanachi, zborniki, knihi, časopisy, peryjodyki — usiaho bolej za 200 abjektaŭ, jakija pradstaŭlajuć samyja cikavyja intelektualnyja vydavieckija prajekty ŭ Biełarusi za apošnija 30 hod. Biełaruski Kalehium, Latučy ŭniviersitet i Mižnarodny kansorcyum «JeŭraBiełaruś» zaprašajuć na vystavu «Cogito Albarutheniae. Panarama biełaruskaha myśleńnia».

Vystava budzie pracavać u miežach Tydnia biełaruskaha myśleńnia ad 16 da 25 vieraśnia ŭ Korpus 8 (Mašerava, 9).

Adzin ź inicyjataraŭ i arhanizataraŭ vystavy, fiłosaf Valancin Akudovič, nazvaŭ hetuju padzieju ŭnikalnaj i vielmi znakavaj dla biełarusaŭ: «Ujavicie sabie, na ziamnoj kuli bolš za niekalki sotniaŭ krain i nacyj. Ale nidzie nichto nikoli nie ładziŭ śviata ŭłasnaha myśleńnia. Tut my absalutna pieršyja. Pieršyja! Z hetaha vynikaje, što praha našaha myśleńnia nakanavanaja nam losam!».

Ale jašče 30 hadoŭ tamu vyrazy «biełaruskaje myśleńnie» ci «biełaruski fiłosaf» hučali ledź nie jak aksiumaron. Ciaham niekalkich papiarednich stahodździaŭ pry ŭsich uładach biełaruskaja dumka metanakiravana ihnaravałasia, zdušałasia j zahaniałasia ŭ farmat piesień-žalbaŭ.

Pry pieršaj histaryčnaj mahčymaści biełarusy raspačali kulturnaje vyzvaleńnie stvareńniem svajho intelektualnaha dyskursu. Heta vyjaviłasia ŭ druhoj pałovie 1980-ch hadoŭ praz šmatlikija fiłasofskija razvahi ŭ samych roznych vydańniach, a ad pačatku 1990-ch vybuchnuła vialikaj kolkaściu intelektualnych peryjodykaŭ, časopisaŭ, zbornikaŭ, antałohij dy encyklapedyj.

Panarama biełaruskaha myśleńnia «Cogito Albarutheniae» («Myślu Biełaruś») dazvalaje pabačyć i acanić hety fantastyčny fienomien i pierakanacca, što Biełaruś — kraina myślaroŭ.

Vystava admysłova stała centralnaj padziejaj Tydnia biełaruskaha myśleńnia. Jak kaža Taciana Vadałažskaja, kaardyntar Latučaha ŭniviersiteta: «Myśleńnie nie žyvie na palicach biblijatek, u formułach ci admysłovych instytucyjach — hety žyvy praces, jaki źnitavany z časam i kantekstam. Su-časnaść myśleńnia - heta znachodžańnie ŭ peŭnym časie, jaki maje kulturnyja, histaryčnyja i palityčnyja kaardynaty. Hetaja vystava stvaraje dla nas usich histaryčny i kulturny kantekst isnavańnia i raźvićcia. Mienavita tamu ź jaje pačynajecca Tydzień biełaruskaha myśleńnia».

Adkryćcio vystavy adbudziecca 16 vieraśnia ŭ prastory Korpus 8. Viadzie prezentacyju Panaramy fiłosaf Valancin Akudovič, kiraŭnik adździaleńnia fiłasofii i litaratury Biełaruskaha Kalehiuma. Udzielničajuć inicyjatary i vydaŭcy niekatorych abjektaŭ Panaramy, stvaralniki prastory sučasnaha biełaruskaha myśleńnia: Taciana Vadałažskaja. Ihar Babkoŭ, Valer Bułhakaŭ, Siarhiej Dubaviec, Iryna Dubianieckaja, Uładzimir Mackievič, Uładzimir Niaklajeŭ, Siarhiej Sańko, Taciana Ščytcova.

Impreza pačniecca a 18.45 z muzyčnaha supravadžeńnia hurtu EVAND, aŭtarskaja muzyka jakoha, na pohlad arhanizataraŭ, vielmi vyrazna taniruje z hučańniem biełaruskaha myśleńnia.

Uvachod volny.

• 0
• 0
• 0
• 0
• 0
• 0
• 0
• 0