Cichanoŭskaja prakamientavała prapanovu ZŠA susiedziam Biełarusi źniać sankcyi na tranzit kaliju

— My pavinny razumieć, što hety list — nie instrukcyja dla kiravańnia palitykaj. Heta moža być prapanova. Ale, viadoma ž, našy amierykanskija partniory dobra razumiejuć, što kožnaja kraina sama prymaje rašeńnie, jak kamunikavać ci nie kamunikavać z Łukašenkam, bo tut vielmi šmat intaresaŭ zakranuta. Heta pierš za ŭsio biaśpieka.

Viadoma ž, naša pazicyja ŭ tym, što zaraz nijakim čynam nie čas pasłablać sankcyi suprać režymu Łukašenki ni va Ukrainie, ni ŭ Litvie, ni ŭ Polščy. Bo kali ŭ Biełarusi dahetul praciahvajucca represii, dahetul sadžajuć ludziej, to ni pra jakija sistemnyja źmieny, jakich my dabivajemsia, havorki być nie moža.

Biaśpiečnaja i volnaja Biełaruś taksama ŭ intaresach našych susiedziaŭ. Jany nie naiŭnyja i jany taksama razumiejuć, što pakul tam Łukašenka, balony latajuć nad Litvoj, u Biełarusi demanstrujuć «Arešnik» i jadziernuju zbroju, pravodziać vučeńni. Zdymać tut sankcyi — heta nie padychod.

— Adnak ZŠA ŭžo źniali sankcyi ŭłasna z «Biełaruśkalija». I kali pradstaŭnik prezidenta Trampa Džon Koŭł pryjazdžaje ŭ Biełaruś i razmaŭlaje z Łukašenkam, jon havoryć pra mahčymaść źniać sankcyi ŭ abmien na vyzvaleńnie palitviaźniaŭ. Ci značyć heta, što vy bolš padtrymlivajecie padychod Jeŭrasajuza, što z režymam nie varta razmaŭlać i varta zachoŭvać sankcyi?

— My vielmi ŭdziačnyja za namahańni ZŠA vyzvalać ludziej, bo ludzi ŭ turmach pamirajuć, ludzi ŭ vielmi ciažkim stanie. Ja ŭpeŭniena, što ŭ Złučanych Štatach Amieryki dastatkova mocy, kab vyzvalić usich ludziej.

Heta i piersanalnaja siła prezidenta Trampa, i jaho instrumienty, jakimi jon karystajecca.

— Ale kali dla hetaha treba budzie źniać i tranzitnyja sankcyi Litvy, Ukrainy i Polščy?

— Humanitarny trek vyzvaleńnia ludziej — heta amierykanski trek. My pavinny razumieć, što kraina moža prapanoŭvać niejkija kroki inšym krainam, ale nie pavinna akazvać cisk. I heta taksama pazicyja ZŠA. My pra heta šmat razoŭ razmaŭlali z Amierykaj, z Džonam Koŭłam, z [namieśnikam pamočnika dziaržaŭnaha sakratara ZŠA] Krysam Śmitam. I tamu pavinna dziejničać formuła, jakuju my vypracavali, što amierykanskija sankcyi dziela vyzvaleńnia ludziej, a jeŭrapiejskija dziela vyzvaleńnia krainy.

Ciapier adbyvajecca navat bolšaja eskałacyja z boku režymu — niemahčyma navat razhladać takuju mahčymaść źniaćcia sankcyj. Našy jeŭrapiejskija partniory dobra heta razumiejuć. My, viadoma ž, padymiem hetaje pytańnie padčas sustreč va Ukrainie, ale ja ŭpeŭniena, što tam nie budzie nijakaha apietytu na źniaćcie sankcyj, bo voś tolki niadaŭna ŭvodzilisia novyja. I Ukraina, jak nichto inšy, razumieje, što tolki sistemnym ciskam na biełaruski režym, na Rasiju možna ich spynić u ich ahresiŭnych dziejańniach.

Tamu kožnaja kraina vybiraje svoj šlach. Ja ŭdziačnaja Jeŭropie za ich pryncypovaść, za ich sistemnaść i za ich dobraje razumieńnie situacyi vakoł Biełarusi.

Złučanyja Štaty paprasili Litvu, Polšču i Ukrainu źniać sankcyi ź biełaruskaha kaliju, kab dazvolić tranzit hetaj pradukcyi praź ich terytoryju. Pra heta śviedčyć niefarmalny zvarot Dziaržaŭnaha departamienta ZŠA da troch stalic, ź jakim aznajomiłasia Radyjo Svaboda.

U adnastaronkavym dakumiencie, jaki pachodzić ź Dziaržaŭnaha departamienta ZŠA, havorycca:

«Ciapier, kali Złučanyja Štaty źniali amierykanskija sankcyi z «Biełaruśkalija», amierykanskija kampanii zacikaŭlenyja ŭ nabyćci i transpartavańni biełaruskaha kaliju. Dla hetaha spatrebicca tranzit praz krainy ES, jakija miažujuć ź Biełaruśsiu, abo praz Ukrainu, kab paźbiehnuć transpartavańnia praz Rasiju».

U zvarocie taksama adznačajecca, što «Złučanyja Štaty zacikaŭlenyja ŭ vyvučeńni patencyjnych maršrutaŭ dla tranzitu biełaruskaha kaliju z metaj źmiakčeńnia hłabalnaha deficytu praz Polšču, Litvu abo Ukrainu i čakajuć budučych abmierkavańniaŭ hetaj temy z vami».

Ministerstva zamiežnych spraŭ Ukrainy paćvierdziła Radyjo Svaboda, što atrymała hety list. Ministerstvy zamiežnych spraŭ Polščy i Litvy pakul nie adkazali na zapyty.

• 15
• 0
• 2
• 2
• 0
• 0
• 0
• 0