Asoby hoda 2016: Siniuk, Daškievič, Kisły, Davydźka…
2016 atrymaŭsia bahaty na padziei i asoby. «Naša Niva» ŭzhadvaje najbolš jarkija momanty hoda ŭ tradycyjnaj padborcy.
Čałaviekam 2016 hoda «Naša Niva» nazvała Kaciarynu Siniuk — stvaralnicu internet-partała Imenamag, na jakim źbirajuć hrošy dla ludziej u patrebie, invalidaŭ, dziaciej-sirot.
Kaciaryna i jaje partał raskryli kałasalny patencyjał salidarnaści i spahady ŭ biełaruskim hramadstvie.
Dziakujučy joj — i jaje ŭmieńniu vykarystoŭvać novyja kampjutarnyja technałohii — dziasiatki tysiač ludziej pabačyli, jak šmat vakoł DOBRYCH LUDZIEJ. Jana pakazała, što być dobrym — pa-raniejšamu prestyžna. Dapamahać słabym — modna. A ŭdałosia joj toje zrabić, bo jana prapanavała ludziam sposab, jak LOHKA I CHUTKA dapamahčy.
Ale ŭ vypadku Siniuk važna i inšaje. Jana nie prosta dapamahaje kankretnym ludziam. Jana dapamahaje tym, chto, u svaju čarhu, dapamahaje paśla dziasiatkam inšych. Naprykład, jana sabrała hrošaj dla invalida, jaki navučaje inšych invalidaŭ pracavać na kampjutary — i nie prosta pracavać, a zarablać na kampjutary.
Siniuk taksama pakazvaje, jak mnoha mohuć zrabić ludzi biez dapamohi dziaržavy, sami, dla siabie i dla inšych.
«Imiony» bačać siabie paŭnavartasnym hramadskim ŚMI. Kamandzie ŭdałosia sabrać bolš za 40 tysiač rubloŭ na paŭhadavuju dziejnaść redakcyi i bolš za 128 tysiač rubloŭ — na dapamohu 11 prajektam.
Naprykład, niadaŭna časopis pakazaŭ dziaciej-invalidaŭ z asablivaściami psichafizičnaha raźvićcia minskaha doma-internata.
Praź niapravilnaje charčavańnie jany važyli nienaturalna mała: 13-hadovy Vadzim — 13,8 kiłahrama, 19-hadovy Mikita — 13,8 kiłahrama, 27-hadovy Arciom — 17,5 kiłahrama. Prykładna 50 dziaciej internata mieli patrebu ŭ śpiecyjalnym enteralnym charčavańni, dziakujučy jakomu jany b mahli nabrać vahu. «Imiony» aktyvizavali zbor srodkaŭ i patrebnuju sumu, 62 960 rubloŭ, sabrali ŭ rekordna karotkija terminy.
Časopis biarecca za samyja roznyja sacyjalnyja prablemy, voś tolki niekatoryja zahałoŭki: «18 hadoŭ na zavodzie, zarobak — 62 rubli. Historyja nieviduščaha mužčyny, jaki niasie ludziam śviatło», «Tajnaje žyćcio Anisy. Jak supracoŭnica banka ź Minska lečyć biazdomnych žyvioł na zakinutym zavodzie», «Jak chłopiec z paralizavanymi rukami i nahami zarablaje na žyćcio»…
Hierojami materyjałaŭ časopisa stanoviacca ludzi ź niaprostymi losami, jakija nie zdajucca i kožny dzień zmahajucca za svajo ščaście. Imi možna natchniacca, u ich možna vučycca mužnaści i čałaviečnaści.
Čytajcie taksama: Paśla artykuła «Imion» pra stan dziaciej u internatach prakuratura pačała pravierku, a ludzi sabrali $35 tysiač
Hutarku z Kaciarynaj Siniuk čytajcie ŭ papiarovaj haziecie «Naša Niva».
A voś vybar NN u inšych katehoryjach.
Palityk hoda — Źmicier Daškievič
«Palitykaj» u Staradaŭniaj Hrecyi nazyvali ŭdzieł u spravach hramady, horada. «Udzieł u spravach» — tym bolš kaštoŭnyja ludzi, jakija ŭdzielničajuć u ich aktyŭna, jany nie dajuć raźvicca zastojnym źjavam.
U lidara «Maładoha frontu» Źmitra Daškieviča paśla naradžeńnia druhoha dziciaci niby adkryłasia i druhoje dychańnie. Daškievič dakazvaje, što i adzin u poli voin. Namahańniami maładafrontaŭcaŭ na vulicach biełaruskich haradoŭ było sabrana 10 tysiač podpisaŭ u padtrymku nadańnia bieł-čyrvona-biełamu ściahu statusa historyka-kulturnaj kaštoŭnaści. Jon pratestavaŭ suprać pryjezdu Sałaŭjova. A byŭ jašče jarki pierformans u Vietkaŭskim rajonie. Daškieviča karali štrafami, ale žadańnie vychodzić na vulicy nie adbili. Biez Daškieviča hety hod byŭ by našmat biadniejšym na padziei. Pry hetym Daškievič praciahvaŭ paśpiachova zajmacca biznesam — vyrablaŭ meblu.
Muzyka hoda — Lavon Volski
U sakaviku ŭ 40 hadoŭ ad ankałahičnaj chvaroby pamierła jaho žonka i pradziusarka Hanna Volskaja. Ale takoje strašnaje zdareńnie nie złamała Lavona. Hod zapomniŭsia tym, što Volski daŭ vializnuju kolkaść padpolnych kancertaŭ. Naviny pra vystupy pieradavalisia nie praz afišy i fejsbuk, a z vusnaŭ u vusny. Było navat nadzvyčaj pakazalnaje videa, jak modnaja zorka sučasnaści Maks Korž, badziajučysia pa horadzie, vypadkova praz vokny ŭbačyŭ, jak Volski vykonvaje «Prostyja rečy». I Korž padpiavaŭ Volskamu!
Apafieozam staŭ kancert pad adkrytym niebam u Sucharavie, kudy pryjšło bolš za 2000 čałaviek.
Pry kancy hoda źjaviŭsia albom «Psichasamatyka», jaki mnohija nazyvajuć adnym z najlepšych u dyskahrafii Lavona.
Błohier hoda — Eduard Palčys
Eduard Palčys zavodziŭ svoj sajt 1863x.com jak adkaz na infarmacyjnyja ataki z Rasii. Na jahonuju dumku, dziaržaŭnyja ŚMI nie davali rady hetaj zadačy. Jon navat nie dumaŭ, što ŭdasca zrabić papularny resurs, rabiŭ jaho ŭ adzinočku, šyfrujučysia pad psieŭdanimam Džon Silvier. Adnak błoh pačaŭ nabirać čytačoŭ, staŭsia zaŭvažnaj źjavaj.
Palčysa vysačyli, jaho źmiaščali ŭ varjatniu. Paśla hetaha błohier źjechaŭ va Ukrainu, adnak pabačyŭ, što nie moža žyć na čužynie. Palčys viartaŭsia praz Rasiju, kab u Biełarusi pierad aryštam pabačycca sa svajakami, u Bransku jaho zatrymali.
Chłopiec doŭha dabivaŭsia ekstradycyi ŭ Biełaruś. Sud byŭ zakrytym, sudzili Palčysa za raspalvańnie mižnacyjanalnaj varažniečy, choć pravaabaroncy nazvali hetaje abvinavačvańnie štučnym.
Prysud akazaŭsia miakki, Eduard vyjšaŭ na volu. Jon nie kinuŭ vieści błoh.
Hramadski aktyvist hoda — Andrej Kim
Dziaržava nie dbaje pra toje, kab zamiežnyja filmy vychodzili pa-biełarusku. U takich vypadkach spravu ŭ svaje ruki biaruć hramadskija inicyjatyvy.
Dziakujučy «Kinakonhu» Andreja Kima miedźviedziania Padynhtan, Bieniedykt Kamberbetč i mnohija inšyja zahavaryli pa-biełarusku. Spačatku sieansy byli darmavyja. Paśla «Kinakonh» damoviŭsia z kinateatram na płatnyja pakazy.
Narod nie choča hladzieć kino pa-biełarusku? Aha, šukali, dzie b znajści lišni kvitočak!
Pośpiech byŭ ašałamlalny. Čakajem praciahu ŭ 2017-m.
Dadatkovyja sieansy adbuducca 17 i 18 śniežnia!
Spartoviec hoda — Uładzisłaŭ Hančaroŭ
Adziny załaty miedal dla Biełarusi na Alimpijadzie ŭ Rya zdabyŭ vićbič Uładzisłaŭ Hančaroŭ u takim pryhožym vidzie sportu, jak skački na batucie.
Navat kali prosta hladziš na hetaha śvietłaha chłopca, to raduješsia. Hetki ścipły i abajalny čempijon. Darečy, Hančaroŭ u niadaŭnim intervju skazaŭ, što jamu padabajecca strymany biełaruski charaktar, jaki kantrastuje z noravami inšych narodaŭ.
Deputatki hoda — Kanapackaja i Anisim
12 hadoŭ u parłamiencie nie było pradstaŭnikoŭ apazicyi. Sioleta źjavilisia dvoje — pradstaŭnica AHP Hanna Kanapackaja i TBM Alena Anisim. Vyšejšaje kiraŭnictva, mabyć, ličyć, što ŭ žančyn mienšy palityčny patencyjał, tamu dapuskać ich nie tak strašna. Spadarynia Kanapackaja adrazu pačała krytykavać paradki, jakija isnujuć u pałacie, jana nazvała parłamient «bałotam».
Anisim ža, naadvarot, ličyć, što šlacham łajalnaści i niekanfliktnaści možna dasiahnuć bolšaha pa spryjańni stanu biełaruskaj movy ŭ hramadstvie. Čyja taktyka akažacca bolš efiektyŭnaj?
Mastak hoda — Ananim, jaki namalavaŭ kalučy drot
Na vulicy Mahiloŭskaj, amal u centry Minska, na dva damy źmiaścili hrafici ab biełaruska-rasijskim siabroŭstvie. Usie adznačali nizkuju mastackuju vartaść tvora, a taksama kałanijalnaść u samoj idei.
Hrafici praisnavała amal paŭhoda, pakul prosta siarod biełaha dnia ananimny mastak nie ŭploŭ u vianok dziaŭčynki i bukiet chłopčyka kalučy drot. Adrazu hrafici zajhrała novymi sensami i farbami. «Heta nie vandalizm, heta vypraŭleńnie vandalizmu», — skazaŭ mastak «Našaj Nivie».
Vyśvietlić asobu tak i nie ŭdałosia. Taki ŭčynak možna adznačyć jak samy dziorzki pierformans 2016-ha.
Vyžyŭšy hoda — Andruś Horvat
Intelihient Andruś Horvat u 2015 hodzie pierajechaŭ ź Minska ŭ rodnuju viosku ŭ Kalinkavickim rajonie. Jon pačaŭ pisać zachaplalny dziońnik pra svajo žyćcio ŭ vioscy, jak jon abžyvaŭ chałodnuju chatu, kałoŭ drovy i sadžaŭ harod. Zajzdrośniki śmiajalisia: chutka zdasca pacan, vierniecca nazad u stalicu. Nie, Horvat pa-raniejšamu ŭ Prudku, zavioŭ kazu i raduje historyjami pra svaju hadavanku. A jašče Andruś vielmi chutka naźbiraŭ hrošaj na svaju debiutnuju knihu «Radyjo Prudok».
Samaje rezanansnaje zabojstva hoda — Pavieł Šaramiet
Biełaruskaha žurnalista zabili ŭ centry Kijeva, padkłaŭšy vybuchoŭku ŭ jaho aŭtamabil. Jon pamior na vačach u ludziej.
Jamu było 44 hady. Šaramiet zusim maładym źjechaŭ u Maskvu, pracavać na ORT. Jaho apierataram byŭ Dźmitryj Zavadski, jakoha skrali ŭ 2000 hodzie.
Kali na rasijskim TB nie stała svabody, nie było mahčymaści realizoŭvacca, to Šaramiet pierajechaŭ u Kijeŭ.
Zabojcy žurnalista tak i nie znojdzieny.
«Viaźni» hoda — Čyž i Japryncaŭ
Partniory pa «Trajple» adzin za adnym apynulisia za kratami. Ci mahčymaje siabroŭstva tam, dzie fihurujuć vialikija hrošy?
Japryncava z synam siłavikam zdaŭ sam Čyž. Naturalna, što ŭ vyniku byłyja siabry rassvarylisia nazaŭsiody.
Juryja Čyža zatrymali ŭ sakaviku. Kiraŭnik KDB raskazvaŭ z teleekranaŭ fantasmaharyčnyja historyi, jak miljanier na chutkaści 200 km/h uciakaŭ u bok litoŭskaj miažy. Paŭhoda kaliści samaha bahataha čałavieka krainy pratrymali ŭ «amierykancy». Čyža abvinavačvali ŭ šerym vyvadzie hrošaj z terytoryi Biełarusi. U vyniku Čyž kampiensavaŭ vydatki i biez suda akazaŭsia na voli.
Ciapier byłyja partniory trymajucca ŭ ciani. Adno što nie mohuć pamiž saboj padzialić futbolny kłub «Dynama».
Startap hoda — MSQRD
Biełaruskija chłopcy Jaŭhien Nieŭhień, Siarhiej Hančar i Jaŭhien Zaciapiakin zrabili mabilny dadatak, jaki byŭ zdolny nakładvać samyja raznastajnyja «maski» na fotki ludziej. Na niekalki tydniaŭ śviet litaralna zvarjacieŭ, hulajučysia z «Maskaradam». U vyniku biełarusy pradali hety startap Facebook, a sami pierajechali na pracu ŭ Łondan. Historyja sučasnaha pośpiechu.
Samy addany čytač hoda — Hienadź Davydźka
Zdajecca, nichto tak uvažliva i daskanała nie vyvučaŭ numary «Našaj Nivy» sioleta, jak kiraŭnik Biełteleradyjokampanii Hienadź Davydźka. Nivodzin vypusk «Kłuba redaktaraŭ» nie abychodziŭsia biez vyvučeńnia pad łupaj publikacyj «NN». Davydźka ochaŭ i achaŭ, ale redaktara haziety zaprasiŭ u efir tolki adnojčy. Lahčej vieści dyskusiju, kali apanient nie moža tabie adkazać.
Maci-hierainia hoda — Darja Domračava
Hieroi Biełarusi da hetaha jašče nie naradžali. Trochrazovaja alimpijskaja čempijonka stała mamaj dziaŭčynki, jakuju nazvali Ksienijaj. Baćka ŭ Ksienii — lehiendarny narviežski bijatłanist Ole-Ejnar Bjorndalen. Domračava ŭžo raspačała treniroŭki, u studzieni abiacaje vyjści na łyžniu.
Miljarder hoda — Viktar Kisły
Pieršym u Biełarusi dalaravym miljarderam staŭ nie chtości, chto z najvyšejšaha dazvołu handluje naftaj, a čałaviek z kampjutarnaj śfiery Viktar Kisły, jaki stvaryŭ miehapapularnuju hulniu «Śviet tankaŭ». Na siońnia heta mahutnaja impieryja, jakaja raźmiaščajecca ŭ mnohich krainach.
Kisły demanstruje, što hrošy možna zarablać nie tolki na karysnych vykapniach, i padkazvaje peŭnyja šlachi raźvićcia ekanomiki krainy.
Kamientary