Facebook kupiŭ biełaruskuju prahramu MSQRD, jakaja nakładaje maski na tvary
Facebook nabyła kampaniju — raspracoŭščyka biełaruskaj prahramy dla nakładańnia masak na tvary ŭ realnym časie MSQRD. Pra heta paviedamlajecca na aficyjnym sajcie prahramy.
Zasnavalniki MSQRD Jaŭhien Niaŭhień, Siarhiej Hančar i Jaŭhien Zaciapiakin piarojduć na pracu ŭ łondanski ofis Facebook, paviedamlaje vc.ru. Suma ŭhody nie vydajecca.
Na sajcie MSQRD raźmieščanaje paviedamleńnie kiraŭnika MSQRD Jaŭhiena Niaŭhienia:
«My ŭparta pracavali, kab zrabić videa bolš zajmalnym i cikavym pry dapamozie filtraŭ, jakija źmianiajuć vonkavy vyhlad. Ciapier my radyja abjadnać namahańni z Facebook i davieści technałohiju da jašče bolšaj kolkaści ludziej — amal 1,6 młrd čałaviek».
Pa słovach Jaŭhiena, padčas rabot pa intehracyi technałohii ŭ Facebook prahrama MSQRD zastaniecca ŭ volnym dostupie (u App Store i Google Play), bolš za toje, tam buduć źjaŭlacca novyja opcyi (chutčej za ŭsio, havorka pra novyja filtry).
Jon taksama padziakavaŭ inviestaru i mientaru Juryju Hurskamu (biełaruski pradprymalnik, jaki niadaŭna staŭ vice-prezidentam Mail.Ru Group) i kampanii Gagarin Capital, bieź jakich pośpiech prahramy byŭ by niemahčymy.
Nahadajem, u apošni čas biełaruskaja prahrama z «žyvymi» maskami nabyła vielizarnuju papularnaść va ŭsim śviecie. Dniami pra jaje raskazvaŭ sajt Bloomberg, pracu prahramy pakazvali ŭ papularnym amierykanskim šoŭ «Džymi Kimeł u žyvym efiry». U vykarystańni prahramy zaŭvažali rasijskich i amierykanskich znakamitaściaŭ.
Prahrama tryvała trymaje pieršy radok u App Store mnostva krain. Niadaŭna stała viadoma, što prajekt pryciahnuŭ miljon dalaraŭ na svajo raźvićcio.
Kamientary