Danat ci vinavaty? Dziesiać važnych pytańniaŭ pa spravie himnazista

Były vučań 74-j himnazii Danat Skakun pryhavorany da vaśmi hadoŭ pazbaŭleńnia voli za napad na nastaŭnicu ruskaj movy. Zdavałasia b, złačyniec znojdzieny i prysud ahučany. Ale ŭ sacsietkach nie ścichajuć sprečki pra toje, ci vinavaty nasamreč Danat. Hučać usio novyja i novyja pytańni, adkazy na jakija, na žal, nie dali ni śledstva, ni sud.

Pavialičyć

Hod tamu ŭ minskaj himnazii №74 adbyłasia trahiedyja. Na nastaŭnika ruskaj movy i litaratury byŭ ździejśnieny napad. U kryminalnych zvodkach źjaviłasia infarmacyja, što vučań sprabavaŭ zarezać piedahoha za toje, što taja pastaviła jamu nizkuju adznaku. Paciarpiełuju, jak zajavili pravaachoŭniki, pavieźli ŭ reanimacyju. A chłopca zatrymali prosta ŭ himnazii.

Ź pieršaha dnia sprava była zakrytaja dla hramadskaści. Va ŭsich udzielnikaŭ suda ŭziali padpisku pra nierazhałošvańnie. Ale paśla abviaščeńnia prysudu infarmacyja ŭsio ž taki prasačyłasia ŭ sacsietki.

1. Što adbyłosia ŭ himnazii pa viersii nastaŭnikaŭ?

23 maja byŭ zvyčajny školny dzień. Zakančvaŭsia navučalny hod, tamu dzieci, jakija chacieli vypravić acenki, pavinny byli «padciahnuć chvasty». U 9 «B» kłasie, dzie vučyŭsia Danat, pieršym urokam była ruskaja mova, ale pakolki častka kłasa napiaredadni jeździła na ekskursiju ŭ Rasiju, dzieciam dazvolili pryjści da druhoha ŭroka — na fizkulturu.

Nastaŭnik Valancina Hubarevič pryjšła ŭ himnaziju da vaśmi ranicy. U kabiniet da jaje spačatku zajšła kaleha pa pracy, potym vučań Danat Skakun. U jaho byli zapazyčanaści pa vieršach.

Pavialičyć

Junak zajšoŭ u kłas, pastaviŭ partfiel i, jak dumała piedahoh, pačaŭ dastavać z sumki padručnik. Adnak Valancina Uładzimiraŭna rezka adčuła bol u vobłaści šyi. Himnazist napaŭ na jaje z nažom. Pryčym napad prachodziŭ u dva etapy. Paśla niekalkich udaraŭ Danat vyjšaŭ z kłasa, nož zastavaŭsia na stale. Potym jon viarnuŭsia ŭ kabiniet i jašče niekalki razoŭ udaryŭ paciarpiełuju, paśla čaho pakłaŭ nož u zaplečnik i pajšoŭ.

Pieršaj, kamu patelefanavała paciarpiełaja, była jaje dačka. Telefanavała Valancina Uładzimiraŭna joj dvojčy. Chutkuju vyklikała dačka, jana ž paviedamiła pra zdareńnie kaleham maci. U kłas prybiehli dyrektar i zavuč. Śledam pryjechała chutkaja i milicyja. Nastaŭnica paśpieła niekalki razoŭ paŭtaryć, što na jaje napaŭ vučań himnazii Danat Skakun. Paśla hetaha žančynu zabrali ŭ balnicu.

Važny momant: niepasrednych vidavočcaŭ taho, što adbyłosia pamiž nastaŭnikam i himnazistam, nie było.

2. Što adbyłosia ŭ himnazii pa viersii vučnia?

Danata, jak zvyčajna, pryviezła na ŭroki mama. Jon zabyŭsia, što pieršy ŭrok admianili, tamu pryjechaŭ da vośmaj ranicy. Na miescy vyrašyŭ vyśvietlić, ci pryjšła na pracu Hubarevič, kab zdać joj vieršy na pamiać, pa jakich u jaho była zapazyčanaść.

Jon ubačyŭ, što ŭ Valanciny Uładzimiraŭny ŭ kabiniecie inšy nastaŭnik, i vyrašyŭ zajści paźniej. Adnak kali jon pasprabavaŭ heta zrabić, vykładčyk skazała jamu, što zaniataja i kab jon pryjšoŭ adkazvać u inšy čas.

Danat pajšoŭ u kłasny kabiniet, sustreŭ pa darozie nastaŭnika francuzskaj movy, pahavaryŭ ź joj. Vykładčyk skazała, što na druhim paviersie siadzić i sumuje jaho adnakłaśnik.

Danat spuściŭsia da jaho, jany razam pajšli prahulacca vakoł škoły. Na stadyjonie chłopiec paraniŭ ruku — začapiŭsia za aharodžu, kali žadaŭ prajści. Heta bačyŭ jaho siabar.

Viarnuŭšysia ŭ škołu, chłopcy ŭbačyli, što na trecim paviersie ŭ kabiniet Hubarevič zachodzić milicyja. Pobač stajali inšyja vykładčyki. Siabry spytali, što zdaryłasia, ale nichto ničoha nie viedaŭ.

Chłopcy pajšli ŭ harderob. Tam Skakunu patelefanavaŭ baćka — jamu pa telefonie paviedamili, što Danat napaŭ na kahości ŭ himnazii. U dzieviać ranicy chłopca zatrymali razam z adnakłaśnikam, ź jakim jon špacyravaŭ pa stadyjonie. Pryjaciela adpuścili ŭ toj ža viečar, a Danat dadomu tak i nie viarnuŭsia.

3. Chacieŭ zabić za dvojku pa litaratury?

Pa aficyjnych dadzienych, matyvam złačynstva była pomsta za nieabjektyŭnuju acenku. Havorka idzie pra niekalki dvojek, jakija chłopiec atrymaŭ za toje, što nie zmoh zdać vierš na pamiać. Adnosiny z nastaŭnikam sapraŭdy byli naciahnutyja, Hubarevič vyklikała ŭ škołu mamu vučnia.

Danat Skakun nia byŭ dvoječnikam abo vydatnikam, vučyŭsia vyšej za siaredniaje. Pa pradmietach u Hubareviča stajali ŭ asnoŭnym siamiorki i vaśmiorki. Da acenak chłopiec staviŭsia davoli spakojna i kali atrymlivaŭ nizkija bały, to trahiedyi z hetaha nie rabiŭ. Jon nie płanavaŭ pastupać paśla 9-ha kłasa, tamu naŭrad ci jaho mocna cikaviŭ siaredni bał u atestacie. Dakładnyja navuki jamu byli cikaviejšyja, čym humanitarnyja.

Prablem ź vieršami pa biełaruskaj litaratury ŭ jaho, darečy, nie było. Jak i z zamiežnaj movaj, dzie taksama časta treba vučyć «temy».

Tyja, chto viedaje Danata i bačyŭ jaho ŭ toj dzień, nie mohuć pavieryć, što jon moh ździejśnić hetaje złačynstva. Spakojny, spahadlivy, uraŭnavažany i navat marudlivy — tak charaktaryzujuć padletka jaho znajomyja.

Pavodziŭ siabie zvyčajna, nie chvalavaŭsia i ničym nie pryciahvaŭ uvahu — kažuć pra jaho stan 23 maja tyja, chto bačyŭ chłopca ŭ himnazii padčas pieršaha ŭroka, kali adbyŭsia napad na nastaŭnika.

Stan padletka źmianiŭsia, tolki kali jamu patelefanavaŭ baćka i skazaŭ, što jaho padazrajuć u ździajśnieńni złačynstva. Pačuŭšy heta, Danat vyłupiŭ vočy ad ździŭleńnia.

4. Dzie nož, jakim sprabavali zabić nastaŭnika?

25 maja, heta značyć praz dva dni paśla trahiedyi, ministr unutranych spraŭ zajaviŭ, što pravaachoŭniki znajšli pryładu złačynstva.

«Nož znojdzieny, — skazaŭ Ihar Šunievič. — Ručka, lazo zavostranyja… Nož z hetaha składajecca. Nož byŭ u dziciaci».

Ale na samaj spravie nož, jakim sprabavali zabić Valancinu Hubarevič, znojdzieny nie byŭ.

U vynikovaj častcy prysudu, jakuju sudździa začytała pry žurnalistach, skazana, što treba źniščyć lazo naža, vyjaŭlenaje i adabranaje 24 maja (na nastupny dzień paśla zamachu. — Red.) Pry praviadzieńni ahladu pa vulicy Artylerystaŭ, 8.

Himnazija znachodzicca pa adrasie Artylerystaŭ, 15, heta značyć, na supraćlehłym baku vulicy. Lazo naža znajšli la ofisnaha budynka, dzie dziejničaje prapuskny režym.

Adnak ničoha supolnaha z nažom, jakim sprabavali zabić nastaŭnika, hetaja znachodka nie maje. Sama achviara apisała pryładu pa-inšamu.

Vychodzić, što klučavych dokazaŭ u spravie niama, choć i himnaziju, i vakolicy staranna daśledavali pravaachoŭniki, z pryciahnieńniem słužbovych sabak.

Tavaryš, jaki da ŭrokaŭ hulaŭ z Danatam pa stadyjonie, zajaviŭ, što nie bačyŭ, kab toj chavaŭ abo vykidvaŭ nož padčas prahułki. Chłopcy z momantu sustrečy nie rasstavalisia.

5. Čamu nichto nie zaŭvažyŭ na vopratcy Danata kroŭ?

Adrazu niekalki čałaviek bačyli Danata ŭ himnazii ranicaj 23 maja. Adnak nichto nie zaŭvažyŭ, kab chłopiec pavodziŭ siabie padazrona i kab na vopratcy ŭ jaho byli ślady kryvi paśla taho, jak jon, pa dadzienych śledstva, sprabavaŭ zabić nastaŭnika.

Rečy školnika staranna vyvučali śpiecyjalisty. Pry hetym tufli pastupili na ekśpiertyzu ŭ adkrytym pakiecie. Pry ahladzie zaplečnika, kudy, pa słovach nastaŭnika, Danat kinuŭ akryvaŭleny nož, kryvi nie znajšli. Adnak u sudzie vyśvietliłasia, što pratakołaŭ ahladu zaplečnika ŭ spravie naohuł niama, tamu hety pradmiet u jakaści dokazu nie razhladali.

Śviedki nie bačyli na vopratcy Danata kroŭ, ale, pavodle vysnovaŭ ekśpiertaŭ, na pinžaku, štanach, kašuli i tuflach chłopca byli ślady kryvi, jakija mahli źjavicca ad Hubarevič.

Abarona Skakuna sprabavała danieści, što kroŭ na vopratcy chłopca źjaviłasia paśla taho, jak jaho rečy zapakoŭvali supracoŭniki milicyi, jakija da hetaha dapamahali pieramiaščać Hubarevič, heta značyć, mieli kantakt ź jaje ciełam, dzie była kroŭ. Ale hety arhumient byŭ pryznany nadumanym.

6. Navošta 15-hadovaha chłopca prymusili napisać jaŭku z pavinnaj?

Danata zatrymali praz paŭhadziny paśla taho, jak byŭ ździejśnieny zamach na nastaŭnika. Jaho baćki adrazu ž pryjechali ŭ himnaziju, baćka razam z synam pajechaŭ u milicyju.

U RUUS baćku skazali, kab jon pajechaŭ na ekśpiertyzu, a kali jon viarnuŭsia, da dziciaci jaho ŭžo nie puścili. Nie puskali da padletka i advakata, jakaja amal siem hadzin praviała ŭ pastarunku.

Pieršy dopyt byŭ pryznačany na vosiem viečara taho ž dnia, ale advakat paraiła ad jaho admovicca, tak jak Danat vyhladaŭ zmučanym i źniasilenym.

Na nastupny dzień rodnyja daviedalisia, što nočču školnik napisaŭ jaŭku z pavinnaj. Pa słovach chłopca, jon pisaŭ toje, što jamu dyktavaŭ śledčy. Rodnym skazali, što ciapier Danat pavinien paŭtaryć usio heta na kamieru.

Danatu na momant dopytu było 15 hadoŭ. Jaho nie mieli prava dapytvać nočču dy jašče biez udziełu advakata, adnaho z baćkoŭ, piedahoha abo psichołaha. Śledčamu pra heta było dobra viadoma, ale heta jaho nie spyniła. U sudzie jon zajaviŭ, što školnik dobraachvotna napisaŭ čystasardečnaje pryznańnie. Darečy, u sud śledčaha taksama nie mieli prava vyklikać, bo jon pa zakonie nie moža być śviedkam.

Paśla takich mietadaŭ śledstva Danat vyrašyŭ admovicca ad dačy pakazańniaŭ. Adnak viadoma, što małady čałaviek prajšoŭ palihraf.

«U spravie jość daviedka, što, pavodle vynikaŭ daśledavańnia na palihrafie, infarmacyi, jakaja maje značeńnie pa hetaj kryminalnaj spravie, atrymana nie było», — raspaviała «Jeŭraradyjo» maci Danata.

Paciarpiełaja nastaŭnica admoviłasia prajści palihraf. Adznačym, što prachodzić detektar chłuśni — heta prava, a nie abaviazak ŭdzielnika pracesu.

7. Čamu nie byŭ praviedzieny śledčy ekśpierymient?

Danata Skakuna abvinavačvali ŭ tym, što jon ździejśniŭ zamach na Valancinu Hubarevič u pieryjad z 08:00 da 08:40. Adnak pa videakamierach, jakija ŭstalavany ŭ himnazii, vidać, što ŭ 08:30 jon užo vyjšaŭ na vulicu ź siabram.

U sudzie pieryjad ździajśnieńnia złačynstva skaracili — z 08:13 da 08:30 chvilin. Ale i tut jość razychodžańni.

U 08:30 Danat razam z pryjacielem užo vyjšaŭ sa škoły. Pa słovach siabra, Skakun padyšoŭ da jaho prykładna ŭ 08:20. Hubarevič patelefanavała dačce ŭ 08:24 pieršy raz i ŭ 08:30 druhi raz, kab paviedamić pra napad.

Kabiniet ruskaj movy znachodzicca na trecim paviersie. Skakunu patrebien byŭ čas, kab sustrecca ź siabram na druhim paviersie, pahavaryć ź im, pachadzić pa škole i tolki paśla hetaha spuścicca razam na pieršy pavierch i vyjści na vulicu.

Šmat u kaho taksama vyklikała pytańni, čamu nastaŭnica nie nabrała adrazu 103 i čamu nie akazvała supracivu napadniku — krykaŭ i šumu ad baraćby nichto sa śviedak nie čuŭ. Danata znajomyja apisvajuć jak marudlivaha i spakojnaha čałavieka, Valancinu Uładzimiraŭnu — jak bajavuju i ŭpeŭnienuju žančynu.

Mahčyma, niekatoryja supiarečnaści byli b źniatyja, kali b byŭ praviedzieny śledčy ekśpierymient. Dla złačynstvaŭ, źviazanych z zamacham na žyćcio čałavieka, heta zvyčajnaja praktyka.

Maci Danata zajaŭlała, što takoje chadajnictva było, ale śledčy jaho adchiliŭ. U materyjałach spravy nie było navat płana himnazii.

8. Jakaja naohuł była abstanoŭka na ŭrokach Hubarevič i što pra jaje dumali ŭ himnazii?

Valancina Hubarevič — daśviedčany piedahoh, joj 58 hadoŭ. Usie, chto viedaje jaje, u adzin hołas kažuć, što jana nastaŭnik patrabavalny. Kvalifikacyja Hubarevič pytańniaŭ nie vyklikała, jaje vučni pieramahali na alimpijadach. Ale voś mietady, jakija jana vykarystoŭvała na ŭrokach, aceńvajucca nieadnaznačna.

Pa-pieršaje, jana rehularna pavyšała hołas na dziaciej. Na ŭroku mahła zajavić: «Ja nie budu pracavać ź niematyvavanymi dziećmi!» ci «Pamiž mnoj i taboj (vučniem. — Red.) dyrektar abiare mianie!». Niekatoryja dzieci prosta bajalisia iści da jaje na ŭroki, pakolki jana była čałaviekam nastroju — mahła nakryčać, pastavić niespraviadlivuju acenku.

Pa-druhoje, jana praktykavała rassadžvańnie dziaciej «pa viedach». To bok u jaje na zaniatkach dzieci siadzieli nie tak, jak zvyčajna. Valancina Uładzimiraŭna tłumačyła heta tym, što matyvavanych vučniaŭ treba było hrupavać u adnym miescy, kab jana mahła davać im zadańni bolš vysokaha ŭzroŭniu. Dzieci ž dla siabie rabili vysnovy, chto «razumny», a chto «durny».

Zrešty, čaściej za ŭsio kanflikty ŭźnikali z chłopcami, jakija chacieli vysokija acenki, ale nie chacieli šmat pracavać. Acenki ŭ hetym vypadku bolš byli patrebnyja ich baćkam.

Byŭ jašče adzin epizod. Hubarevič adpuskała dziaciej z urokaŭ, kab jany advieźli hrošy, sabranyja za ekskursiju, u turfirmu, dzie pracavała jaje dačka. Heta značyć, dva školniki praz uvieś horad vieźli na hramadskim transparcie bolš za tysiaču u.a. I kiraŭnictva było ŭ kursie hetaj schiemy.

Pa słovach baćkoŭ, čyje dzieci vučylisia ŭ 74-j himnazii, jany nieadnarazova skardzilisia na nastaŭnika ruskaj movy i kłasnamu kiraŭniku, i dyrektaru. Ale administracyja sprabavała zhładzić vuhły, nastaŭnika nie zamianiali.

«Na praciahu ŭsiaho razboru ja i moj advakat prasili sud ab litaści i łascy da maładoha čałavieka», — skazała Valancina Hubarevič paśla abviaščeńnia prysudu.

Padletku sapraŭdy pryznačyli minimalna mahčymaje pa jaho artykule pakarańnie — vosiem hadoŭ pazbaŭleńnia voli ŭ vychavaŭčaj kałonii. Ale paciarpiełaja, pa słovach maci Danata, prasiła dać jamu 11 hadoŭ.

Pavodle jaje słoŭ, ni Danat, ni jaho baćki nie paprasili ŭ jaje prabačeńnia. Razam z tym, siamja himnazista zapłaciła nastaŭnicy 23 tysiačy dalaraŭ u jakaści kampiensacyi jašče da zakančeńnia suda.

9. Čamu spravu Danata razhladali ŭ zakrytym režymie?

Pa zakonie raźbiralnictva ŭ zakrytym sudovym pasiadžeńni dapuskajecca pa spravach ab złačynstvach, učynienych asobami, jakija nie dasiahnuli 16-hadovaha ŭzrostu. Danatu na pačatak pracesu było 15 hadoŭ.

Baćki i sam abvinavačany nie nastojvali na zakrytym režymie i spadziavalisia, što sud projdzie ŭ adkrytym režymie.

10. Kali Danat nie vinavaty, to chto napaŭ na nastaŭnika?

Valancina Hubarevič ź pieršych chvilin, jak joj pačali akazvać dapamohu, nazyvała tolki adno proźvišča — Skakun. I hetaja była adzinaja viersija, pa jakoj pracavała śledstva.

Choć u hrupach padtrymki Danata hučać i inšyja varyjanty: i toje, što napaści na jaje moh druhi vučań, i toje, što napadnik moh być naohuł nie ź liku himnazistaŭ, i navat toje, što nastaŭnik mahła sama siabie paranić.

Składana pavieryć, što niechta naśmieliŭsia sfalsifikavać spravu suprać 15-hadovaha padletka. Ale kali čałavieku vystaŭlajuć takija surjoznyja abvinavačvańni, a č. 2 art. 139 nazyvajuć «rasstrelnym artykułam», dokazy pavinny być biassprečnyja. U vypadku sa spravaj himnazista mnohija pytańni, na žal, tak i zastalisia biez adkazu.

Spravu Danata Skakuna jašče budzie razhladać Viarchoŭny sud, kudy pastupiła skarha na prysud.

• 0
• 0
• 0
• 0
• 0
• 0
• 0
• 0