Apple patłumačyła, čamu novaja technałohija Face ID nie spracavała na prezientacyi iPhone X
Apple aficyjna patłumačyła, što adbyłosia na scenie, kali padčas pieršaj publičnaj demanstracyi Face ID sistema nie paznała Krejha Fiederyhi i nie razbłakavała iPhone X.
Pradstaŭniki Apple zajavili, što demanstracyjnaja viersija iPhone X užo pabyvała ŭ rukach inšych viadučych prezientacyi, pierš čym jana trapiła da Krejha Fiederyhi. Sistema Face ID pracuje tak, što identyfikatar aŭtamatyčna sprabuje raspaznać usich, chto hladzić na ekran pryłady.
Vyjaviŭšy tvar, jakoha niama ŭ sistemie, Face ID prapanuje ŭvieści dla razbłakiroŭki parol. Takim čynam, kali iPhone X uziaŭ u ruki Fiederyhi, toj užo byŭ u režymie ŭvodu parola, bo nie zmoh raspaznać tvary tych, chto braŭ jaho ŭ ruki da hetaha.
«Niekalki čałaviek brali pryładu ŭ ruki, i navat nie razumieli, što Face ID sprabuje raspaznać ich tvary. Paśla niekalkich niaŭdałych sprobaŭ, pakolki heta byŭ nie Krejh, iPhone zrabiŭ toje, što pavinien byŭ: pačaŭ patrabavać kod dostupu», — paviedamiŭ pradstaŭnik Apple.
Nahadajem, što ŭ vyniku hetaha, kali Krejh Fiederyhi sprabavaŭ razbłakavać iPhone X z dapamohaj Face ID, sistema dała zboj. Jamu pryjšłosia chutka ŭziać druhuju demanstracyjnuju pryładu, ź jakoj usio prajšło hładka.
Z adnaho boku, kamientar Apple vyhladaje pierakanaŭča, ale reputacyi sistemy naniesieny vialiki ŭron. Ź inšaha boku, my nikoli nie daviedajemsia, što ž zdaryłasia tady nasamreč.
-
Kaniec epochi całkam biaspłatnaha ŠI? U ChatGPT źjaŭlajecca rekłama, i voś jak jana budzie vyhladać
-
«Leha» abviaščaje revalucyju: prezientavanaja sistema, jakaja ažyŭlaje kubiki biez smartfonaŭ. Voś jak jana pracuje i kolki kaštuje
-
Mask płanuje stvaryć na kalaziamnoj arbicie sapraŭdnaje suzorje centraŭ apracoŭki danych. Rasija zaniepakojenaja
Kamientary