Prarasijskija siły va Ukrainie vyłučyli adzinaha kandydata ŭ prezidenty
Im staŭ adzin z paplečnikaŭ Janukoviča.
Partyi «Apazicyjny błok» i «Za žyćcio» stvaryli «Apazicyjnuju płatformu — za žyćcio» i vyłučyli kandydaturu Juryja Bojki dla ŭdziełu ŭ prezidenckich vybarach. Za novaj kaalicyjaj staić upłyvovy Viktar Miedviadčuk — kum Uładzimira Pucina i kiraŭnik Administracyi prezidenta Ukrainy za časami Leanida Kučmy. Jon zaniaŭ pasadu staršyni palitrady płatformy.
60-hadovy Juryj Bojka pry Janukoviču byŭ ministram paliva i enierhietyki Ukrainy.
Viadomaść jon zdabyŭ, u tym liku, pabiŭšy «ŭkrainskaha Žyrynoŭskaha», Aleha Laško, u žyvym efiry.
«Sfarmulavaŭšy stratehičnyja zadačy, my ad słoŭ pierajšli da spravy i dakazali, što tam, dzie havorka idzie pra vyratavańnie narodu ad taryfnaha hienacydu, pazykovaj kabały, palityki drapiežnickaha nacyjanalizmu, niama miesca ambicyjam i palityčnamu ehaizmu», — zajaviŭ Viktar Miedviadčuk. Pavodle jaho słoŭ, abjadnańnie «Apazicyjnaja płatforma — za žyćcio» na prezidenckich, parłamienckich i miascovych vybarach budzie adstojvać «intaresy žycharoŭ Paŭdniovaha Uschodu, ruskamoŭnaha nasielnictva i ŭsich tych, chto razumieje nieabchodnaść kardynalnaj źmieny palityki ciapierašniaj ułady».
Juryj Bojka rodam z Horłaŭki, jakaja ciapier akupavanaja rasijskimi siłami. Jon udzielničaŭ u vybarach 2014 hoda, nabraŭ na ich 0,19% hałasoŭ.
Prezidenckija vybary va Ukrainie adbuducca 31 sakavika. Jak miarkujuć ukrainskija analityki, asnoŭnaja baraćba na ich razhorniecca pamiž dziejnym prezidentam Piatrom Parašenkam i byłoj premjerkaj Julijaj Cimašenka. Jany blizkija pa palityčnych pohladach, ale adlustroŭvajuć intaresy roznych biznes-hrupovak. U baraćbu moža ŭklučycca i niejki novy palityk ź niezaležnickimi i prajeŭrapiejskimi pohladami. U jakaści takoha nazyvali byłoha ministra abarony Hrycenku abo śpievaka Vakarčuka.
Zhodna z apytańniami hramadskaj dumki, Juryj Bojka karystajecca padtrymkaj prykładna 10% vybarcaŭ Ukrainy. Ale ŭ jakaści adzinaha kandydata jon zmoža raźličvać na dadatkovyja hałasy žycharoŭ uschodu i poŭdnia krainy. Jak pradkazvajuć sacyjołahi, u vypadku vychadu ŭ druhi tur jon sastupić i Piatru Parašenku, i Julii Cimašenka.
Kamientary