Biełaruś abyduć z fłanhu

Minsk, kaniečnie, moža trochi pahreć ruki na hazavaj vajnie Rasii z Ukrainaj. Ale chiba što zusim trochi.

Zrazumieła, vajavać na dva franty «Hazpromu» (čytaj: Kramlu) było b niedarečy. Tamu Biełarusi, zdajecca, dajuć adnosna łahodnuju, palityčnuju canu na haz u 2009 hodzie. «Zdajecca» — bo adpaviednaja papiera nie padpisanaja. I pra «boskuju canu» my možam mierkavać tolki sa słoŭ Alaksandra Łukašenki paśla śniežańskaj sustrečy ź Miadźviedzievym.

Vyhladaje na toje, što Maskva choča spačatku dacisnuć biełaruskaje načalstva ŭ šerahu važnych dla jaje pytańniaŭ, a potym užo kančatkova vyznačycca z canoj. Karaciej, ranicaj — sastupki, uviečary — haz.

Sastupki mohuć być takija: Biełaruś padpisvaje damovu pra adzinuju sistemu supraćpavietranaj abarony, ekanamičny miemarandum (źmiest jaho nie nadta afišujecca, ale ŭ ahulnych rysach havorka idzie pra zručniejšyja ŭmovy dla rasijskich kapitałaŭ, tavaraŭ dy ichnaha rubla na našaj terytoryi).

Što da pryznańnia Abchazii i Paŭdniovaj Asiecii, to tut Minsk pa-majstersku ciahnuŭ ryzinu i technična adkinuŭ pytańnie jak minimum da krasavika, kali pačniecca novaja parłamienckaja siesija. Ale i ŭ hetym pytańni buduć daciskać, pra što śviedčyć śviežaja zajava Siarhieja Šamby, ministra zamiežnych spraŭ Abchazii. Jon ličyć, što nastupnaj taki krok zrobić mienavita Biełaruś.

Pryznańnie ž miaciežnych hruzinskich terytoryj samastojnymi dziaržavami chaj sabie i nie tarpieduje, ale moža azmročyć praces narmalizacyi dačynieńniaŭ Minska z Zachadam.

Takim čynam adnosna tanny haz abierniecca vydatkami na zachodnim kirunku.

Vajna z Ukrainaj zmusiła «Hazprom» pavialičyć tranzit praź Biełaruś. Až na 26 miljonaŭ kuboŭ za sutki, jak pychliva adznačajuć dziaržaŭnyja ŚMI. Adnak jany zmoŭčvajuć, što z hetaha abjomu 20 miljonaŭ rasijcy pampujuć praz svaju ž nitku Jamał — Jeŭropa. Nu a «Biełtranshaz» kali i zarobić niešta na dadatkovym tranzicie, dyk heta kacinyja ślozy.

Zvyš taho, na dumku minskaha palitołaha Andreja Fiodarava, kali ajčynnyja ŭłady nadta buduć ščyravać u sensie prapanovy svaich pasłuh na fonie hazavaj vajny z Ukrainaj, to naša paŭdniovaja susiedka «moža pakryŭdzicca, što my karystajemsia ź jaje ciažkaha stanovišča». Voś vam i jašče adzin mahčymy palityčny minus.

A hałoŭnaje — tranzitnyja kozyry ŭ biełaruskaha načalstva nieŭzabavie vybjuć.

Zaraz i ŭ Maskvie, i ŭ Jeŭropie ŭ adzin hołas kažuć: čarhovaja hazavaja vajna lišni raz pakazała, jak važna najchutčej prakłaści dźvie truby pa marskim dnie: «Paŭnočny patok» cieraz Bałtyku dy «Paŭdniovy patok» cieraz Čornaje mora.

Były hiermanski kancler, a ciapier kiraŭnik kamiteta akcyjanieraŭ apieratara prajekta Nord Stream AG Hierchard Šroder abiacaje Pucinu, što «Paŭnočny patok» zapuściać da kastryčnika 2011 hoda. Darečy, niekatoryja analityki vykazvajuć navat takuju dumku:

Rasii pa-svojmu vyhadny ciapierašni kanflikt z Ukrainaj, bo heta dapamoža vybić ź ES hrošy na novy hazapravod.

Miž tym Alaksandr Łukašenka niekali nazvaŭ «Paŭnočny patok» samym durnym prajektam u historyi Rasii. U svoj čas Biełaruś aktyŭna pijaryła ŭ jakaści bolej tannaha dy biaśpiečnaha varyjanta (Bałtyka ž našpihavanaja minami druhoj suśvietnaj vajny) prakładku druhoj nitki Jamał — Jeŭropa cieraz svaju terytoryju.

Ciapier hetyja rekłamnyja prapanovy acichli. Stała zrazumieła, što ŭ Maskvy ćviordy namier abahnuć trubami abodvuch prablemnych tranzicioraŭ — jak Ukrainu, tak i Biełaruś. Bo z apošniaj taksama byli ŭžo krasamoŭnyja naftahazavyja abvastreńni, kali Minsk i šalonaje myta na tranzit nafty ŭvodziŭ, i pahražaŭ vystavić astranamičnyja rachunki za vajskovyja pasłuhi…

Takich siurpryzaŭ rasijskaja kiroŭnaja elita nie choča. Tamu, zvyš dvuch hazapravodaŭ, vyrašyli pabudavać jašče i naftapravod BTS-2 u abychod Biełarusi. Pakazalna, što Pucin padpisaŭ adpaviednaje rašeńnie 1 śniežnia letaś: mienavita ŭ toj dzień, kali skandalna sarvaŭsia samit Łukašenka — Miadźviedzieŭ. To bok,

kožny novy kanflikt tolki ŭmacoŭvaje stratehičnuju liniju Rasii na toje, kab maksimalna asłabić zaležnaść ad biełaruskaha tranzitu.

Praź niekalki hadoŭ, kali rasijskija nafta i haz pojduć u Jeŭropu pa novych trubapravodach, tanalnaść razmovy ź Minskam moža značna źmianicca, mietału ŭ hołasie Kramla zaŭvažna paboleje. Plus nadydzie čas ŭstupleńnia ŭ siłu damovy pra jeŭrapiejskuju canu na haz dla našaj krainy (kantrakt Biełarusi z «Hazpromam», nahadaju, praduhledžvaje paetapny pierachod na całkam rynkavyja ceny da 2011 hoda).

I hetaja pierpiektyva abjektyŭna padšturchoŭvaje Biełaruś da narmalizacyi dačynieńniaŭ z Zachadam. Bo vyprošvańnie ŭ Maskvy źnižak nie daje vialikaha vyjhryšu, a razam z tym jašče macniej pryviazvaje da jaje.

Faktyčna my ź Jeŭropaj u adnoj łodcy pierad tvaram pahrozy z boku «enierhietyčnaj impieryi».

Biada ž u tym, što vyprošvać u Maskvy — bolej zvykłaja schiema dla ajčynnaha načalstva. I hety vir zasmoktvaje.

• 0
• 0
• 0
• 0
• 0
• 0
• 0
• 0