Cichanoŭskamu admovili ŭ rehistracyi: niama podpisu pad dakumientami
CVK admoviŭ Siarhieju Cichanoŭskamu ŭ rehistracyi inicyjatyŭnaj hrupy pa vyłučeńni kandydata ŭ prezidenty. Takoje rašeńnie było pryniata na pasiadžeńni CVK, piša Tut.by.
— Cichanoŭski adpaviadaje tym patrabavańniam, jakija pradjaŭlajucca zakonam da kandydata ŭ prezidenty: jamu bolš za 35 hadoŭ, jon hramadzianin Biełarusi, nie maje sudzimaści i pražyvaŭ u Biełarusi apošnija 10 hadoŭ. Dakumienty na rehistracyju inicyjatyŭnaj hrupy byli pradastaŭleny ŭ CVK jaho žonkaj Śviatłanaj Cichanoŭskaj pa davieranaści, jakaja była nataryjalna zavierana 13 studzienia hetaha hoda — raspaviali ŭ CVK.
Tym nie mienš, u CVK adznačajuć, što pradstaŭnik inicyjatyŭnaj hrupy moža padavać zajavu, ale nie padpisvać jaje. Biez podpisu samoha patencyjnaha kandydata dakumienty ličacca niesapraŭdnymi. Zajavu pa rehistracyi hrupy Cichanoŭskaha padavała jaho žonka Śviatłana. Sam błohier adbyvaje aryšt u IČU.
— Na zajavie ab rehistracyi inicyjatyŭnaj hrupy pavinny być podpis asoby, jakaja budzie kandydatam, i na śpisach hrupy — taksama. Padavać dakumienty moža davieranaja asoba, padpisvać - nie. U nas była takaja situacyja z Marynaj Adamovič, jakaja padavała dakumienty pa rehistracyi hrupy Mikałaja Statkieviča. I joj taksama admovili.
Śviatłana Cichanoŭskaja zajaviła, što na padstavie davieranaści jana maje prava padpisvać luboha rodu dakumienty abo padavać zajavy.
— U davieranaści napisana, što ja maju prava być pradstaŭnikom va ŭsich dziaržorhanach pa rašeńni lubych pytańniaŭ, — zajaviła Cichanoŭskaja.
Tym nie mienš, CVK admoviŭ Cichanoŭskamu «ŭ suviazi z parušeńniem paradku padačy dakumientaŭ». Cichanoŭskaja moža abskardzić rašeńnie CVK u Viarchoŭnym sudzie na praciahu troch dzion.
Ciapier čytajuć
Słavacki palitołah, były kiraŭnik amierykanskaha fondu PACT łabiruje zbližeńnie z Łukašenkam3
Kamientary