Ціханоўскаму адмовілі ў рэгістрацыі: няма подпісу пад дакументамі
ЦВК адмовіў Сяргею Ціханоўскаму ў рэгістрацыі ініцыятыўнай групы па вылучэнні кандыдата ў прэзідэнты. Такое рашэнне было прынята на пасяджэнні ЦВК, піша Tut.by.
— Ціханоўскі адпавядае тым патрабаванням, якія прад'яўляюцца законам да кандыдата ў прэзідэнты: яму больш за 35 гадоў, ён грамадзянін Беларусі, не мае судзімасці і пражываў у Беларусі апошнія 10 гадоў. Дакументы на рэгістрацыю ініцыятыўнай групы былі прадастаўлены ў ЦВК яго жонкай Святланай Ціханоўскай па даверанасці, якая была натарыяльна заверана 13 студзеня гэтага года — распавялі ў ЦВК.
Тым не менш, у ЦВК адзначаюць, што прадстаўнік ініцыятыўнай групы можа падаваць заяву, але не падпісваць яе. Без подпісу самога патэнцыйнага кандыдата дакументы лічацца несапраўднымі. Заяву па рэгістрацыі групы Ціханоўскага падавала яго жонка Святлана. Сам блогер адбывае арышт у ІЧУ.
— На заяве аб рэгістрацыі ініцыятыўнай групы павінны быць подпіс асобы, якая будзе кандыдатам, і на спісах групы — таксама. Падаваць дакументы можа давераная асоба, падпісваць - не. У нас была такая сітуацыя з Марынай Адамовіч, якая падавала дакументы па рэгістрацыі групы Мікалая Статкевіча. І ёй таксама адмовілі.
Святлана Ціханоўская заявіла, што на падставе даверанасці яна мае права падпісваць любога роду дакументы або падаваць заявы.
— У даверанасці напісана, што я маю права быць прадстаўніком ва ўсіх дзяржорганах па рашэнні любых пытанняў, — заявіла Ціханоўская.
Тым не менш, ЦВК адмовіў Ціханоўскаму «ў сувязі з парушэннем парадку падачы дакументаў». Ціханоўская можа абскардзіць рашэнне ЦВК у Вярхоўным судзе на працягу трох дзён.
Каментары