U Minsku za pratest suprać zatrymańnia siabra sudziać bajkieraŭ. Epizod adbyŭsia 19 vieraśnia kala HC «Jeŭropa»
U sudzie Savieckaha rajona Minska 4 studzienia ab 11.00 raspačaŭsia razhlad kryminalnaj spravy suprać bajkieraŭ, paviedamlaje spring96.org.
Na łavie padsudnych Andrej Ivaniušyn, Mikita Afanaśjeŭ, Mikita Traćciakievič. Usich ich vinavaciać u hvałcie ŭ dačynieńni da supracoŭnika milicyi — art. 364 Kryminalnaha kodeksa. Incydent adbyŭsia 19 vieraśnia kala HC «Jeŭropa», kali nieviadomyja stali zatrymlivać adnaho z matacyklistaŭ, a astatnija pačali jaho abaraniać.
«Usie, viadoma, stali abaraniać adnaho i pačali vyciahvać jaho z mašyny hetych nieviadomych. Pačałasia bojka, chtości vyciahnuŭ klučy ŭ ich z mašyny. Kali našaha chłopca ŭžo vyciahnuli, hety hramadzianin dastaŭ niešta padobnaje na pistalet, usio heta jość na videa. Jany nam nie pradstaŭlalisia, dakumienty nie pakazvali, byli ŭ cyvilnym. Chto heta byŭ — niezrazumieła», — apisvaŭ padziei adzin ź vidavočcaŭ.
Naprykancy kastryčnika ŭ aficyjnym telehram-kanale MUS źjaviłasia infarmacyja, što čaćviora bajkieraŭ byli zatrymanyja ŭ miežach kryminalnaj spravy, bo paškodzili słužbovaje aŭto i prymianili hvałt u dačynieńni da milicyjaniera — jak vyjaviłasia, supracoŭnika HUBAZiK.
Spravu razhladaje sudździa Alaksandr Vołk. Na praces u zalu puścili pa pašpartach tolki niešmatlikich rodnych i pradstaŭnikoŭ ŚMI — nie bolš za 10 čałaviek. Jašče čałaviek 15 zastalisia na kalidory. Ale, jak akazałasia, miescaŭ u zali chapaje, adnak nibyta praz pandemiju karanavirusa ludziej rassadzili na adlehłaści adno ad adnaho.
Kamientary