Biełarusy admovilisia ad zajčykaŭ, a brytanski funt źbirajecca pierajści na ich vyjavy
Afalina, zajac-rusak, arłan-biełachvost ci navat hihanckaja akuła mohuć stać novymi simvałami brytanskaha funta. Bank Anhlii vynies na hramadskaje abmierkavańnie dyzajn nastupnaj sieryi banknot, pryśviečanaj dzikaj pryrodzie krainy.
Bank Anhlii pačaŭ hramadskija kansultacyi nakont dyzajnu nastupnaj sieryi banknot naminałam 5, 10, 20 i 50 funtaŭ. Usie čatyry kupiury atrymajuć vyjavy žyvioł, charakternych dla Vialikabrytanii. Vybar budzie zrobleny z zahadzia padrychtavanaha śpisu, składzienaha razam z ekśpiertami pa dzikaj pryrodzie.
Heta aznačaje surjozny adychod ad tradycyi, jakaja isnavała bolš za paŭstahodździa. Z 1970 hoda Bank Anhlii raźmiaščaŭ na banknotach vybitnych dziejačaŭ krainy — palitykaŭ, piśmieńnikaŭ, navukoŭcaŭ i mastakoŭ.
Ciapierašniaja sieryja, jakaja pastupova ŭvodziłasia z 2016 pa 2021 hod, upryhožana partretami brytanskaha premjer-ministra vajennaha času Uinstana Čerčyla, piśmieńnicy Džejn Ościn, mastaka Uiljama Terniera i matematyka, adnaho z zasnavalnikaŭ sučasnaj infarmatyki, Ałana Ćjurynha.
Da rašeńnia źmianić kancepcyju bank pryjšoŭ paśla maštabnaha apytańnia hramadzian. U 2025 hodzie brytancam prapanavali vyznačyć temu dla novaha pakaleńnia banknot. Najbolšuju padtrymku atrymała pryroda. Kala 60% udzielnikaŭ daśledavańnia nazvali jaje adnym z najlepšych varyjantaŭ.
Dla paraŭnańnia, architektura i słavutaści nabrali 56%, znakamityja histaryčnyja asoby — 38%, mastactva, kultura i sport — 30%, inavacyi — 23%, a važnyja histaryčnyja padziei — 19%.
U Banku Anhlii tłumačać vybar tym, što žyviolny śviet źjaŭlajecca važnaj častkaj nacyjanalnaj spadčyny krainy. Akramia taho, vyjavy žyvioł dobra padychodziać dla vykarystańnia ŭ sučasnych sistemach abarony ad padrobak. Ich formy i charakternyja elemienty možna intehravać u składanyja achoŭnyja znaki.
Dla kožnaj kupiury budzie vybrana asobnaja žyvioła. Heta pavinna dapamahčy ludziam chutka adroźnivać banknoty adnaho naminału ad druhoha. Pry hetym arhanizatary chočuć, kab čatyry vyjavy pradstaŭlali roznyja pryrodnyja asiarodździ i rehijony Złučanaha Karaleŭstva.
Mienavita tamu vynik hałasavańnia nie budzie adzinym kryteryjem. Navat kali niekalki lidaraŭ apytańnia buduć adnosicca da adnolkavaha pryrodnaha asiarodździa, bank moža vybrać inšyja varyjanty dziela bolšaj raznastajnaści. Kančatkovaje rašeńnie prymie kiraŭnik Banka Anhlii Endru Bejli.
Usiaho ŭ šort-list uvajšli 18 vidaŭ žyvioł. Siarod mlekakormiačych heta afalina, zajac-rusak, jeŭrapiejski vožyk, šery ciuleń, kunica lasnaja i ryžaja lisa. Darečy, zajac-rusak dobra znajomy biełarusam: jaho vyjava ŭpryhožvała adnarublovuju banknotu ŭzoru 1992 hoda, praz što biełaruskija hrošy ŭ narodzie na doŭhija hady atrymali mianušku «zajčyki».
Ptušak pradstaŭlajuć tupik atłantyčny, sipucha zvyčajnaja, zimarodak zvyčajny, vialiki kulon, vialiki strakaty dziacieł i arłan-biełachvost. U treciuju hrupu ŭklučyli atłantyčnaha łasosia, hihanckuju akułu, čmiala ziemlanoha, travianuju žabu, impieratarskuju strakazu i šašačnicu Aŭrynija.
Hałasavańnie praciahniecca da 3 lipienia 2026 hoda. Vyniki płanujuć abviaścić da kanca 2026 hoda. Adnak sami novyja banknoty źjaviacca tolki praź niekalki hadoŭ, bo ich raspracoŭka, vyprabavańnie i druk zajmajuć praciahły čas.
Pry hetym adzin tradycyjny elemient zastaniecca niaźmiennym — na novych banknotach i nadalej budzie prysutničać partret brytanskaha manarcha.
Ciapier čytajuć
Skandał u połackaj škole: maci śćviardžaje, što jaje syna źbili na treniroŭcy pa dziudo — tak chłopca «vychoŭvaŭ» trenier8
Kamientary