«Pačalisia prablemy sa zdaroŭjem, skača cisk». Ihar Łosik haładaje ŭžo 36 dzion
19 studzienia Ihara ŭ žodzinskim SIZA naviedaŭ advakat Dźmitryj Lepretar.
Administratar telehram-kanała «Biełaruś hałoŭnaha mozhu» i kansultant «Radyjo Svaboda» Ihar Łosik znachodzicca za kratami z 25 červienia — užo 206 dzion. Apošnija 36 ź ich Ihar haładaje.
«Ihar maje namier praciahvać haładoŭku. Jon nie choča spyniacca. Adčuvaje siabie horš, čym padčas minułaj sustrečy. Ihar sam pra heta raskazaŭ. U jaho źjaviłasia słabaść i prablemy ź ciskam. Ranicaj jon vielmi nizki, prosta vielmi. A ŭviečary pavyšany. Cisk Iharu mieraje doktar, jon taksama cikavicca jaho samaadčuvańniem. Taksama byli hutarki ź psichołaham».
Pa słovach advakata, da Ihara pačali dachodzić listy. Ich jamu pieradali na minułym tydni. U piatnicu Ihar atrymaŭ kala 80 listoŭ, paśla jašče pa 10, pa 20 zapar. Usie listy datavanyja jašče kancom 2020 hoda.
«Siarod inšych dajšło niekalki listoŭ ad rodnych, — kaža advakat. — Ihar vielmi rady im. Jon sočyć za situacyjaj, viedaje, što adbyvajecca. Pieradavaŭ vialikaje pryvitańnie ŭsim, chto jaho padtrymlivaje. Asabliva rady paštoŭcy, jakuju atrymaŭ ad Malavanyča (akciora Alaksandra Ždanoviča). Jana jaho vielmi padbadzioryła. Pieradaje padziaku pradstaŭnictvu ES u Biełarusi. Viedaje pra jaho zajavu, dziakavaŭ za padtrymku. Usim nieabyjakavym ludziam dziakuje, chto jaho padtrymlivaje. Pradstaŭnikam dyjaspary taksama. Ihar viedaje, što adtul jamu taksama pišuć, jaho tam padtrymlivajuć».
***
Haładoŭku ŭ znak pratestu Ihar Łosik abviaściŭ 15 śniežnia, kali jamu vystavili novyja abvinavačańni — u padrychtoŭcy da ŭdziełu ŭ masavych biesparadkach. Raniej Łosika abvinavačvali ŭ arhanizacyi albo padrychtoŭcy dziejańniaŭ, jakija hruba parušajuć hramadski paradak.
Šerah viadomych asobaŭ, u tym liku Śviatłana Cichanoŭskaja i Źmicier Daškievič, zaklikali Ihara spynić haładoŭku. Adnak jon admoviŭsia heta rabić.
Kamientary