Pradstaŭnik Biełarusi ŭ AAN: 100, maksimum 200 čałaviek pratestoŭcaŭ na dvuchmiljonnaje nasielnictva stalicy
Biełaruś nie zhodnaja z samim faktam razhladu ŭ Radzie pa pravach čałavieka AAN dakładu Viarchoŭnaha kamisara Mišel Bačelet, u jakim havorycca, što ŭ Biełarusi biesprecedentny pa maštabie kryzis u halinie pravoŭ čałavieka. Ab hetym zajaviŭ pastajanny pradstaŭnik Biełarusi pry Adździaleńni AAN i inšych mižnarodnych arhanizacyjach u Ženievie Juryj Ambrazievič, piša Tut.by.
Na dumku biełaruskaj delehacyi, dakład adlustroŭvaje «vielmi subjektyŭny i sproščany pohlad» na padziei ŭ Biełarusi. Rekamiendacyi biełaruskamu ŭradu, na dumku Ambrazieviča, adarvanyja ad realnych vyklikaŭ u halinie dziaržaŭnaj palityki i kiravańnia, jakija stajać pierad biełaruskim hramadstvam.
— Rekamiendacyi zasnavanyja na idealnych kabinietnych teoryjach, prydatnych chiba što ŭ sterylnym śviecie. U dačynieńni da kožnaha suaŭtara rezalucyi 45/1 možna napisać taki nabor rekamiendacyj, — zajaviŭ Ambrazievič.
Pa słovach pastajannaha pradstaŭnika Biełarusi, u dakładzie niama ni słova ab abjektyŭnaj karcinie masavaści pratestaŭ.
— Na 9,5 miljona nasielnictva [prychodzicca] 20-30 tysiač padpisčykaŭ na samyja raskručanyja Youtube-kanały hałoŭnych praciŭnikaŭ ułady, i 100, maksimum 200 čałaviek pratestoŭcaŭ na dvuchmiljonnaje nasielnictva stalicy. Analiz usich hetych pytańniaŭ krytyčna važny dla razumieńnia taho, što adbyvajecca ŭ Biełarusi, — zajaviŭ Ambrazievič.
Kamientary