Tydzień tamu kiraŭnik «Hrafici» Mikałaj Matoryn paviedamiŭ, što ich ustanova začyniajecca. Ën prakamientavaŭ łakanična: «Zdaŭsia. Zakryli». Ale, jak stała viadoma «Našaj Nivie», ŭłaśniki nie źbiralisia zdavacca sami i apošnija tydni rabili usio, kab adkrycca nanoŭ. Heta i adbyłosia 2 krasavika.
Raskazvajem, jak ciapier možna padtrymać kultavaje dla biełaruskaj andehraŭndnaj kultury miesca.
Bar «Hrafici» zapracavaŭ u Minsku ŭ 1999-m. Za hady isnavańnia tut vystupali takija hurty, jak Billy's Band, «SiehodniaNoċju», artysty z «Psichiei» i «DDT». Nievialikaja scena była pastajannym prytułkam dla sustreč ź biełaruskimi artystami: Lavonam Volskim, Siarhiejam Pukstam, Źmicieram Vajciuškievičam, hurtami «Sieriebrianaja Svad́ba», «Kaśsiopieja», Apple Tea, J:mors, Neuro Dubel, «Krambambula» i šmat jakimi inšymi.
Pa piatnicach u pabie prachodziła rok-karaokie. Časam tut vystupali i teatrały — ad Svabodnaha teatra da Lochi Nikanava i jaho «Poślednich tankov v Parižie».
Pieražyŭšy navat pieršuju chvalu karanavirusa (dziakujučy padtrymcy naviednikaŭ), kłub zakryŭsia ŭ 2021-m paśla šerahu pravierak z MNS, ABEZ i sanstancyi.
Adnym z hałoŭnych vyjaŭlenych «parušeńniaŭ» staŭ drenny stan fuhi pamiž plitkaj na padłozie. Bar spyniŭ dziejnaść da vypraŭleńnia «chibaŭ».
Taksama ŭładalniki musiać vypłacić štraf — 50 bazavych vieličyń (1450 rubloŭ).
Mikałaj Matoryn raskazaŭ, što budaŭniki va ŭsiu moc pracavali nad abnaŭleńniem padłohi. 2 krasavika kłub znoŭ adkryŭ svaje dźviery.
Na žal, čarhovych pazapłanavych pravierak nichto nie vyklučaje.
Praces abnaŭleńnia padłohi ŭ «Hrafici».
Na hety momant kožny achvotny moža padtrymać bar, nabyŭšy «kvitok» na anłajn-kancert.
Ciapier čytajuć
Ci patrebnaja biełaruskaja mova tym, chto razmaŭlaje pa-rusku? Azaronak zadaŭsia takim pytańniem na STB, a vypusknik Akademii MUS prapanavaŭ zamianić uroki fakultatyvami4444
Kamientary