Pra sałodkaje žyćcio i vialikuju pryhažość — u Minsku pakažuć filmy dvuch italjanskich hienijaŭ
Prajekt «Uikendy z…» z pačatku hoda ŭžo pakazaŭ na vialikim ekranie filmy Łarsa fon Tryjera i Kšyštafa Kieśloŭskaha. Kožny sieans praciahvajecca abmierkavańniem z kinaekśpiertam Iharam Sukmanavym — ź jaho, darečy, redka chto sychodzić. Hetym razam arhanizatarami z «Art Karparejšn» — kampanii, jakaja robić kinafiestyval «Listapad» i nazyvaje siabie hidam pa dobramu kino, było vyrašana zaparalelić italjanskaha kłasika Fiederyka Fielini i adnaho z hałoŭnych režysioraŭ sučasnaj Italii Paoła Sarencina.
Čarhovaje vydańnie prajekta praduhledžvaje try majskija ŭikendy ŭ kinateatry «Pijanier». Kožnuju piatnicu i subotu z 14 da 29 maja budzie pakazvacca para vykštałconych «fresak noravaŭ» — karciny aŭtarstva Fielini i Sarencina.
Fiederyka Fielini publicy pradstaŭlać nie treba: režysior, jaki hałoŭnym stymułam zdymać filmy nazyvaŭ padpisańnie kantrakta i atrymańnie avansu, staŭ kłasikam suśvietnaha kino, što vodhukami razyšoŭsia ŭ tym liku ŭ masavaj kultury. Taki ž iraničny amatar italjanskaj estetyki Paoła Sarencina viadomy, naprykład, filmam «Vialikaja pryhažość» dy sieryjałam «Małady papa».
Na pieršym uikendzie buduć pakazany lehiendarnaje «Sałodkaje žyćcio» z Marčeła Mastrajani ŭ hałoŭnaj roli i taja samaja «Vialikaja pryhažość», ź jakoj pačałasia mižnarodnaja znakamitaść Sarencina. Potym — naminant na «Załatuju palmavuju halinu» «Maładość» dy karcina «Džuljeta i duchi», u jakoj Fielini źniaŭ svaju žonku Džuljetu Mazinu. Finalnaj paraj stanuć zahadkavyja «Nastupstvy kachańnia» i stužka «Łora», dzie hałoŭnym piersanažam staŭ Silvia Bierłuskoni, — abodva filma aŭtarstva Sarencina.
Suviazi i pieraklički, a taksama asablivaści kožnaha ź filmaŭ možna budzie abmierkavać paśla pakazu. «Uikendy ź Fielini / Sarencina» arhanizujucca pry padtrymcy pasolstva Italii ŭ Minsku.
Ciapier čytajuć
Źniknieńnie śpikierki KR Anžaliki Mielnikavaj. Usio važnaje, što viadoma na hety momant17
Kamientary