Łatuška: U Piatkievič treślisia ruki, hałava, jana tupała, kryčała: «Vy nasadžajecie nacyjanalizm»
Były ministr kultury Biełarusi Pavieł Łatuška zhadvaje pra svaje kantakty z Natallaj Piatkievič i davodzić, što jana nie lubić Łukašenku.
Hościem novaha vypusku tok-šou «Žyćcio-malina» staŭ były ministr kultury Biełarusi (2009-2012 hady) a ciapier kiraŭnik Narodnaha antykryzisnaha ŭpraŭleńnia Pavieł Łatuška. Zhadvajučy svaje adnosiny z Natallaj Piatkievič, jakaja ŭ 2009-2010 hadach była pieršaj namieśnicaj kiraŭnika Administracyi Łukašenki, palityk i były čynoŭnik adznačyŭ, što mieŭ ź joju vielmi šmat kanfliktaŭ i prablem, i zhadaŭ asobnyja.
Źmieny ŭ prahramie «Słavianskaha bazaru»
Pieršy kanflikt, pa słovach Łatuški, byŭ źviazany z prahramaj adkryćcia «Słavianskaha bazaru»:
«Kali ja tolki staŭ ministram kultury, ja jedu na repietycyi dnia adkryćcia «Słavianskaha bazaru». I mianie vyklikajuć u Administracyju, ja vymušany chutka viartacca ŭnačy, i ŭranicy a 8-j hadzinie ja ŭ kabiniecie.
I Piatkievič mnie zakatvaje isteryku, kali ŭ jaje tresłasia ŭsio: ruki, hałava. Jana kryčała, jana prosta tupała. Stolki niehatyvu vyploŭvałasia na mianie. (…) Tam emocyi prosta zaškalvali. Jana taki čałaviek».
Łatuška patłumačyŭ, što stała pryčynaj kanfliktu:
«Za toje, što ja skazaŭ: «A što, u nas niama biełaruskich piśmieńnikaŭ, tvorami jakich my mahli b adkryć «Słavianski bazar»? Bo «Słavianski bazar» u Viciebsku, a Viciebsk — heta ŭsio ž taki Biełaruś, a nie Rasija».
I jana kazała «vy nasadžajecie biełaruskuju movu, vy nasadžajecie nacyjanalizm» i hetak dalej».
Były čynoŭnik śćviardžaje, što hety kanflikt staŭ «pačatkam vajny» pamiž Piatkievič i im jak ministram kultury Biełarusi.
«Zaŭsiody my vajavali, bo ministr kultury Biełarusi pavinien być za biełaruskuju kulturu, za biełaruskaje słova. Na jakuju chaleru ty staŭ ministram kultury?»
«Ujaŭlajecie, u Administracyi siadzić čałaviek, jaki pieraškadžaje biełaruskaj kultury, biełaruskaści», — praciahvaje Łatuška i pieraličvaje zabarony, jakija išli z boku Piatkievič:
«Nielha śviatkavać jubilej Ryhora Baradulina, nielha ŭšanoŭvać pamiać Vasila Bykava, nielha adkryvać mierapryjemstva na biełaruskaj movie i hetak dalej. Nielha, nielha, nielha».
Kanflikt praź śpiektakl
Pavieł Łatuška zhadaŭ jašče adzin kankretny vypadak, kali jaho vyklikała Piatkievič. Jon źviazany z pastanoŭkaj u Kupałaŭskim teatry režysioram Mikałajem Pinihinym śpiektakla «Pierakłady» (Translations) pa pjesie brytanskaha dramaturha Brajana Fryła. Premjera śpiektakla adbyłasia 23 śniežnia 2009 hoda:
«Treba źniać śpiektakl Kupałaŭskaha teatra «Pierakłady». (…) Pinihin pastaviŭ [tak], što anhlijski aficer razmaŭlaje ź dziaŭčynaj-irłandkaj, u jakuju jon zakachaŭsia, na ruskaj movie, a irłandskaja dziaŭčyna — na biełaruskaj. Razumiejecie paraleli?
Mianie vyklikajuć u Administracyju, i Piatkievič kaža: «Za heta ŭ savieckija časy zdymali z pasady ministraŭ kultury». Ja kažu: «Što ž vy nie zdymajecie?»
Na ŭdakładniajučaje pytańnie, ci kryčała Piatkievič na hety raz na jaho, Łatuška adkazaŭ:
«Raŭła, tak. Jana zaŭsiody pavyšała hołas».
Zabarona zhadki Radziviłaŭ
Jašče adzin vypadak, jaki charaktaryzuje staŭleńnie Piatkievič da biełaruskaj kultury, źviazany ź Niaśvižskim zamkam, u jakim z udziełam Łukašenki paśla rekanstrukcyi ŭ lipieni 2012 hoda byŭ adkryty muziej:
«Ujavicie, Niaśvižski pałac, Łukašenka pavinien pryjechać, a jana staić i ravie na ciabie na ruskaj: «Jak vy sabie dazvolili? Čamu ja jedu ź Minska pa trasie da Niaśviža i stajać znaki, ukazalniki: «Niaśvižski pałac — byłaja rezidencyja Radziviłaŭ». Jak vy heta sabie dazvalajecie? Jakija Radziviły?»
Ja kažu: «Prabačcie, Natalla Uładzimiraŭna, pa-pieršaje, hety pomnik historyi tak zapisany ŭ Śpis suśvietnaj kulturnaj spadčyny JUNIESKA, takaja nazva. Pa-druhoje, nu nie ministr kultury rasstaŭlaje darožnyja znaki».
Jany za noč ich pamianiali. I niama Radziviłaŭ. Voś, kali łaska, tam prosta durnota».
Zastupnictva Makieja
Pavieł Łatuška zhadvaje, što adnojčy Piatkievič zabaraniła izrailskamu pradstaŭniku vystupać na «Słavianskim bazary». Pa jaho słovach, było raźbiralnictva słužby biaśpieki Łukašenki, i heta dajšło da tahačasnaha kiraŭnika Administracyi Uładzimira Makieja.
«Treba było pisać spravazdaču. Ja Makieja paprasiŭ, što napišu zakryty dakumient, dzie skazaŭ, što [heta było] pramoje ŭkazańnie Piatkievič — źniać pradstaŭnika Izraila z adkryćcia «Słavianskaha bazaru» pa pryncypie nacyjanalnaści.
Jana skazała: «Chopić nam hetych jaŭrejaŭ! Što tut [ich] voziać na «Słavianski bazar» samalotami». Heta byŭ pramy zahad.
Słuchajcie, ja nie budu adkazvać za takuju durnotu.
Ja pišu Makieju, a Makiej viedajecie što zrabiŭ? Jon raśpisaŭ hety dakumient Piatkievič. To-bok faktyčna jon padstaŭlaje mianie pierad Piatkievič. Jana mnie zvanić: «Nu što, chacieŭ prykryć…»
Praŭda, jak zhadvaje Łatuška, paśla hetaha kanfliktu Makiej jamu patelefanavaŭ i skazaŭ, što zamiest Piatkievič sam budzie kuryravać ministerstva kultury.
Jak źmianiłasia Piatkievič
Na ŭdakładniajučaje pytańnie Miełkaziorava, ci nie śviedčać hetyja vypadki ab tym, što Piatkievič vystupaje za «ruski śviet» i źjaŭlajecca antysiemitkaj, Łatuška adnosna druhoha zaŭvažyŭ, što «prajavy byli», ale jon «nie choča śćviardžać adnaznačna».
Što tyčycca «ruskaha śvietu», to pa słovach palityka, Piatkievič nikoli nie była prychilnicaj biełaruskaha, nikoli nie vystupała ni za biełaruskuju movu, ni za biełaruskaść, jaje nikoli nie cikaviła prasoŭvańnie biełaruskaj idei ŭ hramadstvie.
Jak davodzić palityk, Piatkievič «hladzieła na Łukašenku, jaki jak by zychodziŭ z padychodu, što biełaruskaje — heta štości niepatrebnaje dla dziaržavy».
Ale apošniaja infarmacyja ad insajdaraŭ, jakaja da jaho pastupaje, jak davodzić Łatuška, jaho ździŭlaje.
«Kažuć, što Piatkievič stała dziaržaŭnikam, što jana padtrymlivaje niezaležnaść», —
havoryć palityk i tłumačyć takuju acenku peŭnym typam myśleńnia častki biełaruskich čynoŭnikaŭ, «jakija ličać, što dziaržaŭnaść i niezaležnaść moža isnavać biez karanioŭ, biez ułasnaj historyi, kultury, movy».
«Voś jana naležyć, ja dumaju, da toj kahorty ludziej. Mahu dapuścić, što heta tak. Jana za dziaržavu, ale biez nacyjanalnaj prykmiety. To-bok tam nie pavinna być nacyjanalnaha padmurka», — ličyć Pavieł Łatuška.
«Piatkievič nie choča zmahacca za Łukašenku»
«U Piatkievič niama lubovi da Łukašenki. Jana prahmatyk», —
davodzić Łatuška i tłumačyć:
«Pahladzicie na jaje vyhlad źniešni, jak jana siońnia vyhladaje, jak jana hladzić na naradach, vystupaje. Tam niama matyvacyi, tam niama enierhii, u jaje ŭnutry ničoha niama, razumiejecie? Jana vysachła. I jana nie choča za jaho zmahacca».
Pa słovach Łatuški, viartańnie Piatkievič u viertykal ułady było dobrym rašeńniem dla Łukašenki. Jana paśpiachova spraviłasia z «psieŭdavybarami» i ciapier jak vice-premjer zajmajecca sacyjalnaj śfieraj, u jakoj «prablem vyšej za hałavu».
«Jana sistemny čałaviek aŭtakratyčnaj sistemy, jana budzie vykonvać, što joj kažuć źvierchu, budzie navat inicyjavać, ale tam niama enierhii, tam niama lubovi da jaho. Luboŭ užo prajšła. Kaliści, moža, i była, a zaraz heta tak nie vyhladaje, absalutna».
***
Natalla Piatkievič naradziłasia ŭ 1972-m u Minsku. Jaje baćka — stamatołah Uładzimir Kraŭčanka. Jon pachodzić z Navasibirskaj vobłaści Rasii, ale paśla Druhoj suśvietnaj vajny siamja asieła ŭ Biełarusi.
Čytajcie taksama:Piać faktaŭ pra Natallu Piatkievič — samuju ŭpłyvovuju čynoŭnicu Biełarusi da źjaŭleńnia Kačanavaj i Ejsmant
Ciapier čytajuć
Represii razhaniajucca ci zapavolvajucca? Davajcie ličyć9
Represii razhaniajucca ci zapavolvajucca? Davajcie ličyć
Biełaruski psichijatr: Palihraf z 100 chłusaŭ nie vyjavić dvuch. A siemiarych tych, chto kaža praŭdu, abvinavacić u chłuśni — i heta pa aptymistyčnych acenkach1010
Kamientary
Pietkievič Natalja Vładimirovna: biohrafija, roditieli.
Rodiłaś buduŝij politik v pośledniuju niedielu oktiabria 1972 hoda v stolicie Biełorusskoj SSR, horodie Minskie. Jeje otiec V. A. Kravčienko był vračom-stomatołohom. Kohda dievočkie było vsieho tri hodika, on stał samym mołodym iz stoličnych hłavvračiej. Pośle etoho vot užie na protiažienii 40 let on vozhłavlajet 7-ju stomatołohičieskuju polikliniku Minska. Rodom on nie iz Biełarusi, a iz Novosibirskoj obłasti. Jeho roditieli, to jesť dieduška i babuška Pietkievič Natalji, byli učitielami. V Minsk oni popali pośle Otiečiestviennoj vojny. Mama Nataši po profieśsii učitielnica. Pozžie Vładimir Akimovič čietyrieždy iźbirałsia dieputatom Minskoho horodskoho sovieta dieputatov, a takžie vozhłavił obŝiestviennuju orhanizaciju miedrabotnikov Biełarusi. Brak s mamoj Natalji był vtorym. Ot piervoj žieny u nieho nie było dietiej.
Jana rasiejka?