U siaredzinie žniŭnia telehram-kanał «Vriemia piervoho» apublikavaŭ videa, na jakim dziaŭčaty sa słužby pratakołu rychtujuć pracoŭny stoł dla Alaksandra Łukašenki. Adna z ich stavić na stoł kubak (robić heta ŭ palčatkach), a na pytańnie pra źmieściva adkazvaje z uśmieškaj: «Kitajski čaj». «Lusterka» daviedałasia, chto hetyja dziaŭčaty i čym jany zajmalisia pierad tym, jak trapić u kabiniet Łukašenki.
Supracoŭnica SK i rabotnica bujnoha kazino
Jak vyśvietliła «Lusterka», dziaŭčaty na videa — 22-hadovaja Darja Drobyš i 25-hadovaja Valeryja Viehiera. Adpaviednaść pravieryli z dapamohaj ŠI-servisu ad Amazon: u abodvuch vypadkach prahrama adznačyła, što na skrynšocie videa i na znojdzienych fota — adny i tyja ž ludzi. Asoby biełarusak «Lusterku» paćvierdzili i ŭ Belpol.
U sacsietkach u abiedźviuch dziaŭčat asabistaj infarmacyi niašmat.
Tak, Valeryja padzialiłasia na staroncy «VKontaktie», što rodam z Homiela. Publikacyj na ścianie praktyčna niama — tolki try fatahrafii, apošniaja zroblenaja ŭ 2021 hodzie. Miarkujučy z padpisak, dziaŭčyna vidavočna cikavicca bjuci-śfieraj: sočyć za pablikami, pryśviečanymi modzie, fitnesu, dohladu za saboj. A taksama anhlijskaj movaj: siarod padpisak niekalki hrup, pryśviečanych jaje vyvučeńniu.
Padobna vyhladaje i staronka Darji — jość infarmacyja, što jana rodam sa Słucka, i data naradžeńnia, a na ścianie tolki adno fota za 2021 hod. Siarod padpisak u dziaŭčyny — łakalnyja hrupy rodnaha horada (nakštałt «Padsłuchana Słuck», «Kvietki Słuck» abo «Naroščvańnie viejek Słuck»), pabliki z žartami, padborkami kino i znachodkami na Wildberries.
Z dapamohaj «Kibierpartyzan» žurnalisty atrymali danyja aficyjnych rejestraŭ, u jakich jość miescy pracy i vučoby abiedźviuch dziaŭčat. Tak, Valeryja Viehiera skončyła škołu № 37 u Homieli. Pracavać pačynała jak supracoŭnica łahiera «Čonkaŭski bor» u 2016 hodzie (vidać, biełaruska jeździła tudy važataj). Źviestak pra toje, u jakoj VNU vučyłasia dziaŭčyna, u bazie «Kibierpartyzan» niama. Ale miarkujučy z čatyrochhadovaha pierapynku pamiž zapisami, u jaje moža być vyšejšaja adukacyja.
U 2020 hodzie Viehiera pryjšła ŭ Homielski abłasny sud (pasada nie raskryvajecca). A ŭžo ŭ listapadzie 2021-ha ŭładkavałasia va ŭpraŭleńnie SK pa Homielskaj vobłaści. Tam jana pracavała jak minimum da pačatku 2024 hoda. Dzie pracuje Valeryja ciapier — nieviadoma, bo źviestki «Kibierpartyzan» aktualnyja na pačatak 2024-ha.
Darja Drobyš skončyła škołu № 11 u Słucku. U 18 hadoŭ uładkavałasia ŭ internet-kramu «Dom naturalnaj kaśmietyki». Praz hod, u studzieni 2023-ha, budučaja supracoŭnica słužby pratakołu Łukašenki pierajšła ŭ kazino — miescam pracy paznačanaje TAA «Makśbiet». Tam Drobyš zastavałasia da pačatku 2024 hoda.
Raniej u roznyja hady ŭ słužbie pratakołu byli zaŭvažanyja televiadoŭca Palina Šuba, Darja Šmanaj (da 2014 hoda pracavała ŭ Nacyjanalnaj škole pryhažości, paźniej stała načalnicaj śpiecadździeła administracyi Łukašenki, papracavała i ŭ ambasadzie ŭ Rasii), pieramožca konkursu «Mis Biełaruś — 2018» i eks-deputatka Maryja Vasilevič i inšyja.
Kamientary