Jak turbiny vietrakoŭ pieraroblivajuć u modnyja damy FOTY
Što rabić ź vietravymi turbinami paśla taho, jak jany adpracujuć svaje 20—25 hadoŭ? Pakul łopaści i korpus ciažka paddajucca pierapracoŭcy, architektary prapanujuć niečakanaje rašeńnie — pieratvarać ich u damy, dziciačyja placoŭki i navat šumavyja barjery.
Vietraenierhietyka siońnia — adzin z klučavych napramkaŭ adnaŭlalnaj enierhietyki. Pavodle Mižnarodnaha enierhietyčnaha ahienctva, dola vietrakoŭ u vytvorčaści elektryčnaści vyraście ź ciapierašnich 8% da 14% u 2030 hodzie. Ale razam z rostam uźnikaje i novaja prablema: što rabić z turbinami, jakija adsłužyli svajo? Ab hetym piša CNN Style.
Termin ekspłuatacyi vietrahienierataraŭ składaje ŭ siarednim 20—25 hadoŭ. Kala 90% kanstrukcyi možna pierapracavać, ale łopaści i korpus turbiny (kapsuła, u jakoj raźmieščany ŭsie asnoŭnyja elemienty, što vyrablajuć elektryčnaść: hienieratar, reduktar, pryvadny vał i tarmaznaja sistema) zvyčajna nielha pierapracavać z-za ich składanaj kanstrukcyi i vysokaha ŭtrymańnia škłovałakna.
Jak tłumačyć inžynier Džaścin Bason z Techničnaha ŭniviersiteta Danii, łopaść ciažka pierapracavać, bo sam materyjał amal nie paddajecca apracoŭcy, a kanstrukcyja zroblena sucelnaj. Heta nie jak bytavaja technika, dzie možna razabrać usio na detali i vykarystać nanova: łopaść — heta adna vialikaja manalitnaja častka.
Maštab prablemy raście. Pavodle acenak, tolki ŭ ZŠA da 2050 hoda moža naźbiracca bolš za 2,2 miljona ton takich adchodaŭ. U Jeŭropie ž mnohija krainy ŭžo zabaranili vyvaz detalaŭ turbin na palihony.
Pošuki rašeńniaŭ
Na prablemu adreahavali i ŭłady, i vytvorcy. U ZŠA Ministerstva enierhietyki inviestavała 5,1 miljona dalaraŭ u daśledavańni pa stvareńni novych technałohij pierapracoŭki.
Kampanija Siemens Gamesa raspracavała «pieršyja ŭ śviecie» łopaści, jakija paddajucca pierapracoŭcy. Jany vyrableny z admysłovaj smały, što dazvalaje ŭ kancy terminu słužby adździalać materyjały i vykarystoŭvać ich nanova.
Adnak pakul hetyja technałohii nie atrymali šyrokaha raspaŭsiudžańnia, najbolš dastupnym i efiektyŭnym vyhladaje pieraprafilavańnie — nadańnie starym kanstrukcyjam novaha pryznačeńnia.
Adnym ź pijanieraŭ napramku paŭtornaha vykarystańnia łopaściej i korpusoŭ turbin stała hałandskaja architekturnaja studyja Superuse Studios.
Jašče ŭ 2008 hodzie jaje supracoŭniki pieratvaryli piać śpisanych łopaściej u dziciačuju placoŭku. Z taho času kamanda realizavała prajekty pa pieratvareńni elemientaŭ byłych vietrakoŭ u łaŭki, prypynki, vuličnyja skulptury.
Niekalki hadoŭ nazad z metaj vyvadu svaich idej na rynak studyja zasnavała kampaniju Blade-Made.
Dom Nestle
Samy ambicyjny prajekt Blade-Made — heta mikradom Nestle, zrobleny z 20-hadovaha korpusa turbiny V80 mahutnaściu 2 MVt.
Nazva Nestle — hulnia słoŭ ad «nacelle» (mašynny błok vietraka, kapsuła z ruchavikom), i jana adlustroŭvaje pachodžańnie domu.
Zvonku dom maje kremavy mietaličny korpus, čatyry soniečnyja paneli na dachu i akuratnaje akienca-luk. Pa formie jon padobny da padoŭžanaha vahončyka. Unutry — śvietły i prastorny interjer płoščaj 35 m², šklanyja dźviery i vokny z abodvuch bakoŭ napaŭniajuć pamiaškańnie śviatłom.
Nestle staŭ pieršym vypadkam u śviecie, kali mašynny błok pieratvaryli ŭ žyllo. Prajekt adpaviadaje hałandskim budaŭničym normam.
Pa słovach suzasnavalnika Blade-Made Josa de Kryhiera, «heta samaje składanaje, što možna było zrabić z korpusam turbiny».
Novyja napramki
Siarod novych rašeńniaŭ Blade-Made — vykarystańnie łopaściaŭ vietrakoŭ u jakaści šumavych barjeraŭ na aŭtamahistralach. Zamiest taho, kab razrazać ich na častki, vykarystoŭvajucca cełyja 37-mietrovyja kanstrukcyi vahoj bolš za 6,1 tony.
Pa słovach de Kryhiera, zvyčajnyja bietonnyja barjery patrabujuć padmurkaŭ kožnyja 6—10 mietraŭ, u toj čas jak Blade Barrier abychodzicca padtrymkaj raz na 25 mietraŭ. Heta dazvalaje skaracić vykidy CO₂ i vykarystańnie materyjałaŭ. Pieršy pratatyp užo prachodzić vyprabavańni.
Dla taho, kab palehčyć pierapracoŭku i paŭtornaje vykarystańnie turbinnych detalaŭ, u vietraindustryi ŭźnikaje kancepcyja tak zvanych «pašpartoŭ materyjałaŭ» — dakumientaŭ, jakija adsočvajuć usie materyjały, što vykarystoŭvajucca ŭ pradukcie na praciahu ŭsiaho jaho žyćciovaha cykłu.
Ale na praktycy vytvorcy turbin časta nieachvotna dzielacca infarmacyjaj pra kanstrukcyju łopaściaŭ, navat kali havorka idzie pra daŭno sastarełyja madeli.
De Kryhier adznačaje, što niedachop prazrystaści z boku vytvorcaŭ zastajecca adnoj z najbujniejšych prablem jaho kamandy. Jon paraŭnoŭvaje pieraprafilavańnie z ramontam staroha domu: raźbivaješ ścianu — i znachodziš toje, čaho nie čakaŭ.
Što ž tyčycca damoŭ Nestle, to jany ŭžo atrymali vialiki vodhuk i cikavaść publiki. Ciapier kamanda Blade-Made rychtujecca vypuścić pieršuju sieryju ź dziesiaci mikradamoŭ, kab aptymizavać technałohiju i zrabić jaje prydatnaj dla rynku.
«Ja ŭžo dumaju, jak tam nam na hetym soncy pastajać». Łukašenka padzialiŭsia z Pucinym stracham pierad zaŭtrašnim paradam21
«Ja ŭžo dumaju, jak tam nam na hetym soncy pastajać». Łukašenka padzialiŭsia z Pucinym stracham pierad zaŭtrašnim paradam
Źnikły Anatol Kotaŭ byŭ partnioram samaha vysokapastaŭlenaha biełaruskaha raźviedčyka, jaki pierajechaŭ u Polšču. Tut moža być kluč da razhadki jaho źniknieńnia7979
Źnikły Anatol Kotaŭ byŭ partnioram samaha vysokapastaŭlenaha biełaruskaha raźviedčyka, jaki pierajechaŭ u Polšču. Tut moža być kluč da razhadki jaho źniknieńnia79
«Z tatam vyrašyli: naśpieŭ čas vučycca pa-biełarusku». Žančyna raskazała, jak u 80-ja hady jeździła za 20 kiłamietraŭ ad Minska dziela adukacyi na rodnaj movie33
Kamientary
voś dana-mołł robić usio pa hostam! sapraŭdy nasčajaščaja krasata atrymlivajecca)))