Paśla zajavy hienierała Hierasimava na televyšcy Kupianska pastavili rasijski ściah na mahnitach

Jak paviedamlajuć ŚMI, rasijskija vojski sprabujuć abyści horad Kupiansk z poŭnačy i paŭnočnaha zachadu, ale USU kontratakami adnaŭlajuć front. 

Paśla niadaŭniaha praryvu ŭkrainskim vojskam udałosia ŭtrymać kantrol nad klučavymi rajonami i skaracić zonu kantrolu praciŭnika.

Rasijskija siły nie mohuć masava zaciahnuć ciažkaje ŭzbrajeńnie praz raku Askoł da płacdarmu, što robić ich nastup na Kupiansk uraźlivym i abmiežavanym.

U toj ža čas kamandujučy Hienieralnym štabam Uzbrojenych sił Rasii hienierał Valeryj Hierasimaŭ zajaviŭ pra toje, što «złučeńni i vajskovyja čaści hrupoŭki vojskaŭ «Zachad» praktyčna całkam błakujuć horad Kupiansk i vyzvalili kala pałovy jaho terytoryi».

Na zajavy Hierasimava źviarnuŭ uvahu Z-błohier Juryj Padalaka. Zajavu hienierała jon nazvaŭ «miakka skažam, vielmi vialikim pierabolšvańniem» pośpiechaŭ rasijan na hetym učastku frontu i zadaŭ pytańnie, «chto i navošta tak taporna jaho padstaŭlaje».

Siońnia jon raźmiaściŭ nastupny post, dzie źviarnuŭ uvahu na videa, na jakim vidać rasijski ściah na vierchavinie televyški ŭ Kupiansku. Na dumku Padalaki, hety krok nie dokaz kantrolu nad horadam, a chutčej «antykryz».

Jon padkreślivaje, što nikoli nijakija bajcy ŭ bajavych umovach ściahoŭ na vyški nie vyviešvajuć — heta i biessensoŭna, i niebiaśpiečna. Značna praściej i bolš pierakanaŭča, kali jany razhortvajuć ściah na ziamli, pryviazvajučy jaho da miascovaści. Na vyški ž ich zvyčajna zakidvajuć dronami z prymacavanymi mahnitami.

Pry ŭvažlivym prahladzie videa z Kupianska, pavodle jaho, bačna, što ściah apynuŭsia na vyšcy mienavita takim čynam. Kali b jaho pryviazvali rukami, jon by visieŭ inakš, dy i sam praces zdymali b z drona. A tut pakazali tolki nieruchomaje pałatno.

Z hetaha Padalaka robić vysnovu: pakolki «antykryz» byŭ arhanizavany śpiešna, heta značyć, što Maskva zapatrabavała dokazaŭ słoŭ Hierasimava, jaki zajaviŭ pra kantrol amal nad pałovaj Kupianska. Miascovaje kamandavańnie nie znajšło ničoha lepšaha, jak skinuć ściah na televyšku.

Heta, na jaho dumku, tolki dakazvaje, što kamandavańnie na miescach zabrachałasia i padaje ŭ Hienštab «lipavyja» spravazdačy. U vyniku padstaŭlajuć asabista načalnika Hienštaba Valeryja Hierasimava.

«Takim čynam, na majo ŭčarašniaje pytańnie, «chto padstaŭlaje Valeryja Hierasimava», adkaz atrymany», — padsumoŭvaje błohier i dadaje:

«P.S. Pryčym samaje śmiešnaje ŭ hetaj historyi zaklučajecca ŭ tym, što navat kantrol nad hetym punktam uvohule ničoha nie dakazvaje ŭ pytańni kantrolu nad pałovaj horada».

• 1
• 0
• 11
• 6
• 0
• 0
• 1
• 0