Viarchoŭny sud pakinuŭ u sile paśmiarotny prysud zabitamu ŭ Breście Hienadziu Šutavu

Vajskoŭcy Raman Haŭryłaŭ i Arsienij Halicyn prybyli z Marjinaj horki ŭ Brest «dla achovy hramadskaha paradku». 11 žniŭnia tut, jak i ŭ inšych haradach, prachodzili akcyi pratestu paśla vybaraŭ. Pa viersii śledstva, kala 22.30 Šutaŭ i Kardziukoŭ metanakiravana padyšli da siłavikoŭ, jakija byli apranutyja ŭ cyvilnaje.

Pavialičyć

Pa viersii śledstva, jakuju ŭ vyniku padtrymaŭ sud, Šutaŭ i Kardziukoŭ admysłova padyšli da siłavikoŭ, pačali vykazvać im pretenzii, što tyja pieraśledujuć udzielnikaŭ pratestu. Kardziukoŭ nanios udar mietaličnaj truboj pa hałavie Haŭryłavu, toj dastaŭ pistalet Makarava i zrabiŭ papieradžalny streł u pavietra, a zatym sumiesna z Halicynym nakiravaŭsia da Šutava i Kardziukova, kab zatrymać ich. Adnak Kardziukoŭ kinuŭ trubu ŭ Halicyna (trapiŭ jamu pa ruce) i źbieh. Halicyn pabieh za im, dvojčy vystraliŭ, ale ŭciakač schavaŭsia ŭ natoŭpie. U hety ž čas Šutaŭ schapiŭ Haŭryłava za nahu i pasprabavaŭ pavalić jaho na ziamlu. Toj vyrašyŭ strelić jamu ŭ pravaje plačo. U momant strełu Šutaŭ zrušyŭsia ŭ bok, i kula trapiła jamu ŭ patylicu. Paranienaha zabrali ŭ balnicu, dzie jon i pamior.

Alaksandr Kardziukoŭ ź viersijaj śledstva niazhodny. U sudzie jon raspavioŭ, što 11 žniŭnia Hienadź pryjšoŭ da jaho ŭ haraž. Jany vypili kala 350 hramaŭ nastojki na dvaich i pajšli ŭ bok DK prafsajuzaŭ, kab pahladzieć, što tam adbyvajecca. Kali padyšli da skryžavańnia vulicy Maskoŭskaj i Partyzanskaha praśpiekta, zaŭvažyli vialikuju kolkaść ludziej. Hienadź i Alaksandr pajšli na parapiet da doma № 334. U abvinavačanaha ŭ ruce byŭ abrezak mietaličnaj truby, jaki jon padabraŭ kala parku «dla samaabarony». Za pratestam jany hladzieli zdalok. Prykładna praz 40 chvilin siabry zaŭvažyli dvuch chłopcaŭ (jak vyśvietliłasia paźniej, heta i byli vajskoŭcy z Marjinaj Horki) i padyšli da ich. Pa słovach Alaksandra, jon chacieŭ u ich pacikavicca tym, što adbyvajecca.

— Zamiest taho kab narmalna adkazać, adzin ź ich (Haŭryłaŭ) šturchnuŭ mianie, ad čaho ja ŭpaŭ z łaŭki, — zajaviŭ abvinavačany. — U adkaz ja instynktyŭna nanios jamu ŭdar truboj u vobłaść levaha ściahna. Dakładna ŭ hałavu ja nie biŭ. Dalej ja znoŭ zalez na łavu, Haŭryłaŭ i Halicyn paviarnulisia da nas tvaram i, trochi adstupiŭšy nazad, dastali pistalety. Chtości ź ich kryknuŭ: «Tvaram uniz, urody, zavalu». Pačuŭsia streł. Bakavym zrokam ja zaŭvažyŭ, što Hienadź, znachodziačysia laviej ad mianie, pačynaje apuskacca na kaleni, trymajučy ruki za hałavoj. Jon byŭ śpinaj da Haŭryłava i tvaram da vulicy Maskoŭskaj. Halicyn u hety čas nakiravaŭ na mianie pistalet, celačysia ŭ hałavu. Spałochaŭšysia za svajo žyćcio, ja pačaŭ uciakać, kinuŭ na ziamlu trubu, kab jana nie zaminała biehčy. U hety momant z boku Halicyna pačuŭsia streł u moj bok, jon pačaŭ pieraśledavać mianie, kryčać. Kali ja ŭciakaŭ, čuŭ huk dvuch strełaŭ. Z materyjałaŭ spravy atrymlivajecca, što adzin streł byŭ zrobleny Haŭryłavym ŭ Šutava, a druhi — Halicynym ŭvierch, ad čaho kula trapiła ŭ stol bałkona.

Abvinavačany padkreśliŭ, što nie viedaŭ, što pierad im siłaviki, tyja byli ŭ cyvilnym, pistalety trymali ŭ sumkach, tamu kali źbiahaŭ, dumaŭ, što za im biažyć bandyt. Momant ranieńnia Šutava Kardziukoŭ nie bačyŭ. U sudzie jon kazaŭ, što «adčuvaŭ vielizarny hruz viny z-za jaho śmierci».

Padčas suda paŭstała pytańnie, čamu Haŭryłaŭ nie sprabavaŭ spynić Šutava, jaki nibyta akazaŭ supraciŭ, inšym sposabam, naprykład, fizičnaj siłaj. Vyśvietliłasia, što kapitan sił śpiecyjalnych apieracyj nie vałodaje navykami rukapašnaha boju i nikoli hetym nie cikaviŭsia.

Brescki abłasny sud pryznaŭ vinavatymi Šutava (paśmiarotna) i Kardziukova, apošniamu pryznačyli pakarańnie ŭ vyhladzie 10 hadoŭ kałonii. Dačka Hienadzia Šutava padała skarhu ŭ Viarchoŭny sud. Na jaje dumku, vajskoŭcy złoŭžyli słužbovymi paŭnamoctvami, pavodzili siabie nieapraŭdana ahresiŭna i niepravamierna ŭžyli zbroju. Videazapis z kamiery nazirańnia dvara, u jakim adbyŭsia kanflikt, nie paćviardžaje napadu Kardziukova i Šutava na vajennasłužačych i baraćby ź imi, adznačana ŭ skarzie. Abarona Kardziukova taksama padała skarhu na prysud. Adnak Viarchoŭny sud pakinuŭ prysud bieź źmien. U chutkim časie Kardziukova nakirujuć u kałoniju ŭzmocnienaha režymu.

• 0
• 0
• 0
• 0
• 0
• 0
• 0
• 0