Receptam ispanskaj nacyjanalnaj stravy z «Našaj historyjaj» padzialiłasia ŭnučka ispanskaha lotčyka časoŭ Hramadzianskaj vajny 1936—1939 hadoŭ Adełaida Aryas, jakaja žyvie ŭ Minsku.
Inhredyjenty: bulba, jajki, cybula, sol, čorny pierac.
Biarom u roŭnych praporcyjach cybulu i bulbu, standartnaja porcyja — 6 bulbin. Cybulu narazajem paŭkolcami, bulbu tonkimi skrylkami. U hłybokuju patelniu nalivajem alej (lepiej aliŭkavy, ale sprava hustu) na santymietr. Kali alej razahrejecca, vykładajem u jaho bulbu. Potym, kali bulba padsmažycca i stanie miakčejšaj, dadajom narezanuju cybulu, źmiešvajem i nakryvajem. Smažym da hatoŭnaści praduktaŭ, pieryjadyčna pamiešvajučy, kab usio roŭna prasmažyłasia (nie solim!).
Asobna ŭźbivajem jajki. Treba, kab jaječnaj sumiesi było pryblizna na tracinu cybulna-bulbianoj masy. Dadajom sol i pierac — mienavita ŭ jaječnuju sumieś! Kali cybula z bulbaj buduć hatovyja, vykładajem ich u misku, dajom trochi astyć i ŭžo tady ŭlivajem uźbityja jajki, staranna źmiešvajem i vykładajem na patelniu (jakaja moža być mienšaha dyjamietra za papiaredniuju).
Pa ščyraści, mnie i sama jaječnaja sumieś z bulbaj padabajecca. U dziacinstvie my nalatali i zaŭsiody vyprošvali pa łyžačcy abo ciškom kaštavali.
Absmažvajem z adnaho boku, pieryjadyčna pakručvajučy patelniu, kab masa źnizu adstała ad dna. Nakryvać viečkam nie treba.
I voś tut pačynajecca toj etap, jakoha ja zaŭsiody bajałasia, ale za jakim nazirała ź vielizarnym zachapleńniem. Nakryvajem patelniu talerkaj bolšaha dyjamietra i niasiom da rakaviny. Akuratna i mocna prytrymlivajem talerku rukoj i pierakulvajem patelniu. Budźcie aściarožnyja, ruki lepš trymać paralelna, kab reštki aleju nie vylilisia na skuru!
Ciapier treba absmažyć vierchniuju častku. Dla hetaha aściarožnym rucham prymušajem amlet spaŭźci z talerki na patelniu i stavim jaje znoŭ na ahoń. Paviercie, ničoha nie pryharyć: heta jak ź blinami — chapaje svajho aleju. Absmažvajem druhi bok tarcilji i padajom na stoł.
Jeści možna haračaj i chałodnaj, z sousam abo biez. My časta biarom jaje ŭ pachod. Heta najednaja i vielmi smačnaja strava. Lepš za ŭsio jeści pad piva, vino ci pad biełaruski kiefir. U niekatorych restaranach Ispanii, miž inšym, heta padajuć jak ekskluziŭ.
U pačatku 2000‑ch troje nastaŭnikaŭ historyi źbiehli va Ukrainu ad «hienacydu biełaruskaha naroda», jaki čyniŭ režym Łukašenki. Jak skłaŭsia ich los?1515
Kamientary