Zorka Paleskaha teatra, režysior studyi dla ludziej z asablivaściami ciapier palitźniavoleny. Raskazvajem historyju pinskaha akciora
31 maja ŭ sudzie Maskoŭskaha rajona Bresta pačaŭsia sudovy praces nad druhoj partyjaj padazravanych u ździajśnieńni masavych biesparadkaŭ u Pinsku ŭ noč z 9 na 10 žniŭnia 2020 hoda. Na łavie padsudnych apynulisia 14 mužčyn, siarod ich — Siarhiej Vołkaŭ, viadomy akcior Paleskaha teatra, režysior teatralnaj studyi dla ludziej z asablivaściami «Pieraadoleńnie».
«Naša Niva» sabrała niekalki faktaŭ pra pinskuju zorku, jakaja z 7 maja zamiest sceny znachodzicca za kratami.
Naradziŭsia ŭ Vołahdzie
Svajaki Siarhieja pa linii taty pachodziać z Rasii, ale, kali jamu byŭ hod, baćki-inžyniery pryjechali pracavać u Pinsk, tam atrymali kvateru i asieli.
U samoha Siarhieja troje dziaciej, usie — syny. Starejšy Viktar maje dyjahnaz DCP. Viktar vielmi pieražyvaje za tatu i naviedvaje sudy ź im.
Prajaŭlaŭ tvorčyja zdolnaści ź dziacinstva
Brat Jaŭhien raskazvaje, što, kolki pamiataje Siarhieja, toj zaŭsiody niešta pisaŭ.
«Ën pisaŭ vieršy, pjesy, ody… Braŭ udzieł u roznych amatarskich hurtkach. Usie jaho tvory ŭ asnoŭnym cichieńka zachoŭvalisia ŭ rukapisach, ale žadańnie niejak pieranosić heta na scenu pieramahło — i, užo budučy žanatym, ź dziećmi, jon vyrašyŭ atrymać teatralnuju adukacyju. Pastupiŭ u Biełaruski dziaržaŭny ŭniviersitet kultury na režysiora śviataŭ i abradaŭ. Pryčym tam nie było zavočnaha adździaleńnia, tak što małady tata vučyŭsia na dzionnym. Ale ŭsio davioŭ da kanca».
U Paleskim teatry byŭ zadziejničany ŭ 80% śpiektaklaŭ
U Paleskim dramatyčnym teatry Siarhiej hraje z 2006 hoda. Ën — heta Kulihin u «Navalnicy» pa Astroŭskim, Dziasiacki ŭ «Pinskaj šlachcie», Sielanin u «Rahniedzie» i Voŭk u dziciačym śpiektakli-kazcy «Pamiarancavy vožyk». U jaho repiertuarnym archivie — dziasiatki inšych mocnych rolaŭ.
«Siarhiej jak akcior niezamienny, jon vielmi lubić scenu, umieje hrać na niekalkich muzyčnych instrumientach, što byli zadziejničanyja ŭ niekatorych śpiektaklach. Jon zaŭsiody za mastactva: i chvalavaŭsia, i prydumvaŭ, i vykonvaŭ. Kožnuju rolu jon stvaraŭ, doŭha kapajučysia ŭ sabie, i jana atrymlivałasia napoŭnienaj i skončanaj, nie padobnaj da inšych. Ciapier u niekatoryja śpiektakli vymušanyja na jaho roli ŭvodzić inšych akcioraŭ. A tyja, dzie jaho nielha zamianić, spisvajuć. Adsutnaść Siarhieja — vialikaja strata dla teatra», — kamientujuć kalehi.
Akciory dadajuć, što Siarhiej byŭ i jość nie prosta prafiesijanałam, jon Čałaviek:
«Jon dobry, hatovy dapamahčy, padkazać. Tak, adnojčy, kali ja skazała jamu, što niejak ciažka dažyć da zarpłaty, jon prynios mnie ceły pakiet ježy. Zaŭsiody moh pahulać z našymi dziećmi, daryŭ im cacki, čytaŭ kazki», — zhadvaje adna z aktrys.
Byŭ režysioram teatra dla ludziej z asablivaściami
Siarhiej pastajanna ładziŭ u horadzie narodnyja śviaty i abrady, vioŭ teatralny hurtok u miascovym DK. Vialikuju častku jaho žyćcia zajmała praca ŭ teatry «Pieraadoleńnie» dla ludziej z asablivaściami. Ën tam byŭ i kiraŭnikom, i režysioram.
Amatarski teatr «Pieraadoleńnie» byŭ stvorany ŭ 2008 hodzie. Za hety čas jon nieadnarazova rabiŭsia ŭdzielnikam i łaŭreatam roznych teatralnych festaŭ, jakija prachodzili nie tolki ŭ Biełarusi, ale i ŭ Polščy, Ukrainie, Rasii.
«Pieršaje, što jon spytaŭ u liście: jak tam jaho dzieci z teatralnaha hurtka? Biezumoŭna, i horad, i teatr ciapier stracili dobraha, razumnaha i dziejnaha čałavieka», — kažuć kalehi.
Pracavaŭ sanitaram u čyrvonaj zonie padčas pieršaj chvali karanavirusa
Kali praz epidemijałahičnuju situacyju ŭ 2020 hodzie ŭ teatry prypynili pakazy śpiektaklaŭ, Siarhiej paprasiŭsia pracavać sanitaram u miascovuju balnicu.
«Ën pajšoŭ u kavidnuju zonu asensavana: viedaŭ, što mnohija sanitary zvolnilisia praz strach zarazicca i pamierci. A jon za siabie nie pieražyvaŭ», — kaža brat Jaŭhien.
Piša za kratami vieršy
Zatrymali Siarhieja jakraz na šlachu da pracy ŭ DK, kudy jon tak i nie dajšoŭ. Jaho abvinavačvajuć va ŭdziele ŭ masavych biesparadkach (č. 2 artykuła 293 Kryminalnaha kodeksa).
Vinu jon svaju nie pryznaje. Nie ličać Siarhiej vinavatym ni na kroplu i ŭsie jaho znajomyja.
«Siarhiej prysutničaŭ 9 žniŭnia ŭ centry, jak i mnohija pinčuki. I na videa, što razhladałasia ŭ sudzie, bačna, što jon padabraŭ zapalnicu, dumajučy, što jana cełaja, a paśla adkinuŭ jaje ŭ bok. A heta ž chočuć vystavić tak, nibyta jon nanios škodu supracoŭnikam milicyi, jakija byli ŭzbrojenyja, sa ščytami! Usim vidavočna, što sprava sfabrykavanaja», — kamientujuć svajaki.
U listach bratu i baćkam Siarhiej piša, što ŭžo nastroiŭsia na vialiki termin, choć i nie ličyć siabie vinavatym. Na jaho pohlad, usio, što zaraz adbyvajecca ŭ sudzie z dopytami paciarpiełych, — heta prosta cyrymonija asudžeńnia, rašeńnie pa ŭsich daŭno pryniataje.
«Ź listoŭ bačna, što jon užo padrychtavany da vialikaha terminu. Ën spakojny. Raskazvaje, što ź im siadziać vielmi razumnyja ludzi: jość tyja, chto prachodzić pa bresckaj «karahodnaj» spravie. U kamiery 3 na 5 mietraŭ — vosiem čałaviek. Usie čytajuć, hulajuć u šachmaty. Siarhiej vielmi lubić šachmaty. A jašče, kab padtrymać baćkoŭ, dasyłaje im z-za krataŭ svaje vieršy».
Napisać Siarhieju, kab padtrymać jaho, možna siudy:
SIZA-7, vuł. Savieckich Pamiežnikaŭ, 37, h. Brest, 224030
Ciapier čytajuć
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam2929
Kamientary