U Minsku ładziać vialiki žanočy forum z Chakamadaj — kvitki ad 250 rubloŭ, siarod śpikieraŭ psieŭdanavukoŭka
12 vieraśnia ŭ Minsku źbirajuć dźvie tysiačy žančyn na vialiki forum. Biełaruskam prapanujuć niezvyčajnych vystupoŭcaŭ — ad rasijanki Iryny Chakamady da psieŭdanavukoŭki, jakaja miksuje jadziernuju fiziku z mahijaj.
Forum, pra jaki idzie havorka, ładziać u minskaj Falcon Club Arena, nazvali jaho «PROTJeBJa: novyj rubiež». Arhanizatary płanujuć sabrać zału na 2000 čałaviek.
Hałoŭny tvar foruma — Iryna Chakamada. Niekali ekanamistka i libieralny palityk, ciapier hetaja rasijanka zarablaje na žyćcio biznes-treninhami.
U Minsku Chakamada vystupić ź lekcyjaj «Enierhija. Zaradžeńnie i kiravańnie». Abiacajuć, što Iryna raskaža pra svaju hipotezu troch vidaŭ enierhii: ziamnuju enierhiju, to-bok fizičnuju, a taksama tvorčuju i intelektualnuju.
«Iryna Chakamada patłumačyć, jak adroźnić adzin vid enierhii ad inšaha, jak papaŭniać kožny ź ich paasobku i čamu nielha vykarystoŭvać tvorčuju enierhiju dla vyrašeńnia intelektualnych zadač i naadvarot», — pišuć na sajcie prajekta.
Abiacajuć i jašče niekalki biznes-trenierak i matyvacyjnych śpikierak. Siarod ich asabliva adznačym Katrynu Arje. Hetuju vypusknicu Maskoŭskaha dziaržuniviersiteta pradajuć jak fizika-jadzierščyka z dośviedam pracy na Vialikim adronnym kałajdary i papularyzatarku navuki.
Pierš za ŭsio, pracavać na kałajdary jana nie mahła: Katryna piša na ŭłasnym sajcie, što pryśviaciła 20 hadoŭ markietynhu, to-bok pajšła ŭ tuju śfieru nie paźniej za 2006-ty, a kałajdar zapracavaŭ u 2008-m. Praŭda, u instahramie žančyna piša, što pracavała na paskaralniku čaścinak, jaki isnavaŭ jašče da kałajdara, i heta sapraŭdy mahčyma.
Cikaviej razabrać idei, jakim vučyć Arje. U sacsietkach Katryna sprytna manipuluje fizičnymi terminami, kab zavabić ludziej na svaje kursy, a časam i abiacaje spałučyć navuku z mahijaj. Naprykład, jana pradaje ŭ svajoj «Kvantavaj kramie» aŭtarski kurs pad nazvaj «Miernaści». Katryna piša, što, na dumku bolšaści vučonych, isnuje 11 vymiareńniaŭ zamiest troch, i ŭsio heta možna vykarystoŭvać, kab źmianiać svajo žyćcio da lepšaha. Voś tolki taja ideja zasnavanaja na niedakazanaj teoryi strunaŭ, i navat pa joj tyja vymiareńni nastolki małyja, što vykarystać ich u zvyčajnym žyćci niemahčyma.
Jašče viesialej jaje kurs pad nazvaj «Kody žadańniaŭ: padarožža pamiž suśvietami». U im Arje prapanuje vybrać, u jaki z paralelnych suśvietaŭ vy žadajecie trapić, vučyć pierasoŭvacca pa linijach vierahodnaści i raskazvaje pra samaprahramavańnie z punktu hledžańnia kvantavaj fiziki. Viadoma, kvantavaja fizika nie maje z usim hetym ničoha ahulnaha.
Kolki ž kaštuje forum z Chakamadaj, Arje i inšymi śpikierkami? Padrychtujcie nie mienš za 250 rubloŭ — mienavita stolki treba addać za samy tanny kvitok, uładalnic jakoha abiacajuć dadać u telehram-kanał i bot dla znajomstvaŭ ź inšymi ŭdzielnicami.
Forum idzie ceły dzień, i kali chočacie, kab vas u hety čas chacia b trochi pakarmili, treba budzie addać za kvitok nie mienš za 550 rubloŭ. Samyja darahija kvitki z dadatkovymi bonusami kaštujuć ažno 1790 rubloŭ.
«Naša Niva» — bastyjon biełaruščyny
PADTRYMAĆ
Kamientary