Pad Minskam abvaliłasia častka kanstrukcyi mosta cieraź Śvisłač
U ahraharadku Novy Dvor Minskaha rajona 25 žniŭnia abvaliłasia častka aharodžy na moście cieraz raku Śvisłač. Kanstrukcyja raźmiaščałasia na piešachodnaj častcy i ŭpała ŭ vadu. Na ščaście, u momant abvału pobač nikoha nie było, piša pristalica.by.
Miascovyja žychary zaniepakojenyja stanam mosta. Jany bajacca, što paśla padzieńnia aharodžy mohuć pačacca i bolš surjoznyja razbureńni. Pavodle ich słoŭ, paškodžańni ŭźnikli na baku, jakim piešachody karystajucca radziej, adnak i supraćlehłaja častka mosta znachodzicca ŭ drennym stanie.
Asablivuju zakłapočanaść vyklikaje nabližeńnie navučalnaha hoda. Pa hetym moście dzieciam davodzicca dabiracca da prypynku hramadskaha transpartu, bo inšaha šlachu praz raku niama.
U «Minskabłdarbudzie» patłumačyli, što stan mosta pahoršyŭsia ŭ tym liku praź intensiŭny ruch hruzavoha transpartu z pramysłovaj zony Minska.
Ramont mosta ŭžo praduhledžany płanam biahučaha ramontu mastoŭ Minskaj vobłaści na čaćviorty kvartał 2026 hoda. Prajektnuju dakumientacyju ciapier rychtujuć śpiecyjalisty «Abłdarprajekta». Pačać ramont płanujuć 7 vieraśnia.
Raboty buduć pravodzicca ŭ dva etapy. Pa čarzie buduć zakryvać pravuju i levuju častki mosta, kab zabiaśpiečyć mahčymaść ruchu piešachodaŭ. Dla rehulavańnia transpartnaha ruchu pastaviać śviatłafor, jaki budzie pracavać u reviersiŭnym režymie.
Pakul paškodžanaja piešachodnaja častka zakrytaja. Tam ustalavali časovyja aharodžy i zabaranialnyja znaki. Piešachodam dazvolena karystacca druhoj pałovaj mosta.
Ciapier čytajuć
Šalona papularnaja minskaja błohierka patraciła na śviatkavańnie dnia naradžeńnia amal $16 tysiač34
Kamientary