Piensijanierka raspaviała, jak pad vidam supracoŭnikaŭ rajvykankama jaje ledź nie abłapošyli machlary
Žančyna padrabiazna apisała «Našaj Nivie», jak fejkavyja supracoŭniki rajvykankama zachapili jaje vajbier i ledź nie dabralisia da bankaŭskich danych.
Taćciana (imia źmienienaje ŭ metach biaśpieki) kaža, što zvyčajna nie adkazvaje na nieznajomyja numary (tym bolš u miesiendžarach), ale tut niešta rassłabiłasia. Da taho ž žančyna tolki vyjšła na piensiju, tamu zvanok nibyta ź ich rajonnaha ŭpraŭleńnia pa pracy, zaniataści i sacyjalnaj abaronie nie padaŭsia joj dziŭnym.
«Surazmoŭca nazvaŭsia supracoŭnikam rajvykankama. Skazaŭ, što vyśvietliłasia, maŭlaŭ, va ŭpraŭleńni sacabarony mnie nie paličyli dziesiać miesiacaŭ stažu. Mianie zapisali na nastupny dzień pryjści na pryjom a 12‑j hadzinie. Skazali ŭziać z saboj pašpart, strachavoje i pracoŭnuju knižku. Potym skazali dačakacca vykliku i nazvać čatyry apošnija ličby telefona — heta byŭ by moj elektronny propusk. Ja nazvała».
Paśla žančynie skazali, što dla zručnaści dašluć spasyłku dla ŭstanoŭki «dadatku FSAN», dzie jana zmoža sačyć za statusam jaje spravy. Dla rehistracyi ŭ dadatku patrabavałasia ŭvieści danyja pašparta i bankaŭskaj kartki.
Pašancavała, što ŭ pracesie Taćciana paśpieła źviarnuć uvahu, što pad numaram «supracoŭnika rajvykankama» było napisana «Danija».
«Ja spytała, a čamu ŭ vas tut Danija? Skazała, što spyniaju dyjałoh i pakłała słuchaŭku».
Dabracca da bankaŭskaha rachunku piensijanierki machlary nie zdoleli, a voś jaje vajbier zachapili — žančyna sama nazvała im tyja samyja čatyry apošnija ličby. Ich chapiła, kab ašukancy tradycyjnym šlacham załahinilisia pad numaram Taćciany ŭ miesiendžary.
«Maja avatarka ŭ vajbiery adrazu źnikła, ja sama stała tam padpisanaja jak supracoŭnica rajvykankama. I ŭžo z majho numaru pačali nazvońvać usim maim kantaktam».
Paźniej žančyna zdoleła adnavić kantrol nad vajbieram.
Heta ŭžo daloka nie pieršy padobny vypadak pa krainie. Tak, niadaŭna 68‑hadovaja minčanka adkazała na zvanok ź iłžeŭpraŭleńnia sacyjalnaj abarony i pavieryła, što jaje čakaje pieraraźlik piensii. U vyniku žančyna zastałasia biez 9000 rubloŭ.
Machlary taksama lubiać vydavać siabie za supracoŭnikaŭ bankaŭ, dastaŭki, milicyi, pošty, DAI, sistemy achovy zdaroŭja i navat «Jeŭraopta». U chod iduć i strašnyja rozyhryšy, kali kažuć, što vaš blizki čałaviek nibyta trapiŭ u avaryju i jamu terminova patrebnaja finansavaja dapamoha.
Varta pamiatać, što supracoŭniki rajvykankama i słužby «adno akno» nikoli nie buduć telefanavać praź miesiendžary, a taksama prasić nadyktavać uraźlivyja danyja pa telefonie. Tym bolš čynoŭniki nie buduć prymušać ustalavać vas dadatak. Dla ŭpeŭnienaści lepiej pierastrachavacca i pravieryć pačutuju vam infarmacyju pa adzinym numary słužby «adno akno» — 142.
Pra ŭsie sproby ašukanstva abaviazkova paviedamlajcie ŭ milicyju pa telefonie 102.
Ciapier čytajuć
«Pryhraziła pajści da inšaha». U MUS raskazali padrabiaznaści zabojstva 43‑hadovaj ciažarnaj žančyny chakiejnym arbitram16
«Pryhraziła pajści da inšaha». U MUS raskazali padrabiaznaści zabojstva 43‑hadovaj ciažarnaj žančyny chakiejnym arbitram
Małady biełarus nie chacieŭ siadzieć u Rasii za narkotyki, tamu prydumaŭ, jak chutka vyjści z kałonii — i vyjšaŭ na ŭkrainskija pazicyi pad Pakroŭskam44
Kamientary