U pačatku tydnia dypłamaty krain Jeŭrasajuza, ZŠA, Japonii i Vialikabrytanii byli zaprošany ŭ biełaruskaje MZS na sustreču z Uładzimiram Makiejem. Što adbyvałasia na sustrečy?
Jak viadoma «Našaj Nivie», niečakanaściaŭ nie zdaryłasia — abodva baki čarhovy raz pieraahučyli svaje pazicyi.
Jakimi byli asnoŭnyja tezisy Uładzimira Makieja?
Tak, pa jaho mierkavańni, masavaha vychadu na vulicy 25 sakavika nie adbyłosia praz žadańnie biełarusaŭ žyć u stabilnaści, i represii tut ni pry čym.
Asobna Makiej prajšoŭsia pa Arciomie Šrajbmanie, maŭlaŭ, źviarnicie ŭvahu, što jon vyjaviŭsia nie takim abjektyŭnym i niejtralnym, jakim chacieŭ zdavacca. Taksama dastałasia Tut.by, jaki «paśla śmierci Zisiera pierastaŭ być niejtralnym».
Dypłamaty pačuli kryŭdu na Śviatłanu Cichanoŭskuju, paśla sustreč ź jakoj zachodnija palityki vykazvajucca ab hatoŭnaści padtrymki i pastražeńnia sankcyj suprać Alaksandra Łukašenki. Maŭlaŭ, što jana, što Pavieł Łatuška — nasamreč škodnyja dla dvuchbakovych adnosin, tamu ich nie treba ŭsprymać usurjoz. A biełarusy, maŭlaŭ, nie hatovyja žyć pad sankcyjami i nie vierać u 10-miljardnuju padtrymku ad mižnarodnych instytucyj u vypadku źmieny ŭłady.
Makiej zaklikaŭ nie vieryć u karcinku «paralelnaj realnaści», jakuju nibyta stvarajuć prychilniki pieramien. I taksama raskazaŭ zamiežnym dypłamatam, što, pa jaho infarmacyi, krainy Zachadu pahražajuć spynić finansavańnie Łatuški, kali ŭ krainie nie zdarycca masavych akcyj pratestu.
Taksama Makiej raiŭ dypłamatam zadumacca nad dumkami, ahučanymi Ramanam Pratasievičam. Maŭlaŭ, jany nieardynarnyja i patrabujuć vyvučeńnia i pravilnaj reakcyi.
Viadoma, što ŭ adkaz na hety śpič pradstaŭniki dypmisij krain ES, Vialikabrytanii, ZŠA i Japonii vypuścili sumiesnuju zajavu paśla sustrečy.
Jak vynikaje z zajavy, na sustrečy dypłamaty zaklikali biełaruskija ŭłady:
▫️spynić pieraśled aktyvistaŭ, niezaležnych ŚMI i hramadzianskaj supolnaści;
▫️spynić advolnyja zatrymańni, katavańni i biesčałaviečnaje abychodžańnie ŭ dačynieńni da mirnych pratestoŭcaŭ i palityčnych źniavolenych;
▫️vyzvalić i reabilitavać usich palitviaźniaŭ i niespraviadliva zatrymanych;
▫️rasśledavać parušeńni pravoŭ čałavieka i pryciahnuć da sudu tych, chto sankcyjanavaŭ i ździajśniaŭ akty hvałtu;
▫️pačać inkluziŭny palityčny praces, jaki b vioŭ da svabodnych i spraviadlivych vybaraŭ pad nahladam BDIPČ ABSIE.
Dypłamaty spadziajucca, što ŭ Biełaruś zmohuć viarnucca dypłamaty ź Litvy, Polščy, Łatvii, Vialikabrytanii i ZŠA.
Kamientary