Paŭłu Sieviaryncu adrazu dali patelefanavać maci, ale na pachavańnie baćki nie adpuścili
Pra heta napisała Volha Sieviaryniec u svaim fejsbuku.
U piatnicu ranicaj stała viadoma pra śmierć u Viciebsku taty Paŭła Sieviarynca Kanstancina Paŭłaviča, jaki pamior ad nastupstvaŭ kavidu. U subotu va Unorycy, što ŭ Rečyckim rajonie, na jaho radzimie prajšło pachavańnie. Paŭła Sieviarynca raźvitacca z baćkam nie adpuścili.
«My razumieli, što Paŭła na pachavańnie, chutčej za ŭsio, nichto nie adpuścić, ale nie sprabavać nie mahli, — napisała Volha. — My źviarnulisia da chryścijanskich ijerarchaŭ, chtości adrazu ž adhuknuŭsia i staraŭsia dapamahčy, chtości skazaŭ, što dapamahčy nia zmoža. Ja bačyła, što siabry pisali zapyty ŭ kałoniju, kab Pašu adpuścili. Bačyła, što vykazvalisia dypłamaty. My kožnamu vielmi ŭdziačnyja. My zrabili, što mahli.
Pašu skazali, što tata pamior, dniom u piatnicu i adrazu ž dali patelefanavać matuli. Jon napisaŭ zajavu na vyjezd, tearetyčna takaja mahčymaść u źniavolenaha ŭ kałonii jość, ale dazvoł jamu nie dali, skazali, što ciažki artykuł. Paša ahałomšany».
«Budu ŭdziačnaja, kali zmožacie padtrymać jaho listami: 213004, h. Škłoŭ, vuł. 1-aja Zavodskaja, 8, PK-17, atrad 17. Dziakujem usim za padtrymku. Vielmi sumujem pa našamu Kanstancinu Paŭłaviču. Viečny jamu supakoj», — napisała Volha Sieviaryniec.
Pavieł Sieviaryniec byŭ zatrymany 7 červienia 2020 hoda paśla pikieta na Kamaroŭcy. Amal praz hod, 25 maja, u Mahiloŭskim abłasnym sudzie — jaho sudzili z šaściu inšymi palitviaźniami — byŭ pryhavorany da 7 hadoŭ kałonii ŭzmocnienaha režymu.
Kamientary