«Zarobak vyras u 35 razoŭ». Vaskrasienski raskazaŭ pra sustreču ź Viktaram Babarykam i nastupnaje pasiadžeńnie kamisii pa pamiłavańni
Kamisija pa pamiłavańni, jakaja razhladaje spravy palitviaźniaŭ, zasiadaje raz na kvartał. Minuły raz byŭ u vieraśni. Što dalej? Juryj Vaskrasienski raskazaŭ, ci ruchajecca praces i navošta jon jeździŭ u kałoniju da Babaryki.
U vieraśni kamisija pamiłavała 13 palitviaźniaŭ, jakija ŭžo adbyvali pakarańnie. Jašče čatyry (fihuranty spravy Biełhazprambanka — Kuprejeva, Karaka, Žardziecki, Sažyn) vyjšli ŭ kastryčniku da suda.
Nastupnaje pasiadžeńnie kamisii čakajecca ŭ kancy listapada — pačatku śniežnia. Tam płanujuć razhledzieć i pytańnie pa Dźmitryi Hopcie (21-hadovym chłopcy z razumovaj adstałaściu).
«My pieradali ŭ kamisiju 200 proźviščaŭ. Na minułym pasiadžeńni razhledzieli tolki 20 (i ź ich 13 było pamiłavana), bo paśpieli sabrać dakumienty tolki na 20 čałaviek. Tam składanaja pracedura — na kožnaha rychtujecca cełaja papka: charaktarystyki ź miescaŭ adbyvańnia pakarańnia, miedycynskija daviedki.
My majem i treci śpis z sotniaj čałaviek na pamiłavańnie. Ale pakul padavać jaho nie budziem, kab nie pierahružać kamisiju», — kaža Juryj Vaskrasienski.
Jon raskazaŭ taksama, što 8 listapada jeździŭ u navapołackuju kałoniju da Viktara Babaryki (pra hety vizit zhadvała taksama byłaja advakatka palitviaźnia Natalla Mackievič).
«My chacieli b bačyć Babaryku ŭ śpisach na pamiłavańnie. I jon moh by tam akazacca. Naša razmova pry sustrečy ciahnułasia kala 40 chvilin. Ja zaklikaŭ Viktara Dźmitryjeviča pačać hasić škodu i napisać prašeńnie ab pamiłavańni.
Detali razmovy ja pakinu ŭ tajamnicy. Kali Viktar Dźmitryjevič i jaho advakaty zachočuć, jany raskažuć sami.
Z navin ad jaho — jamu pavysili zarobak u piakarni. U 35 razoŭ — byŭ 1,60 rubla ŭ miesiac, a ciapier 50 rubloŭ».
Kamientary