Rasijskija vojski prybyvajuć u Biełaruś — kolki, z čym i navošta?

Vučeńni prachodziać na fonie adnaho z samych vostrych vajenna-palityčnych kryzisaŭ u našym rehijonie z 2014 hoda, kali Maskva anieksavała ŭkrainski Krym, a taksama raźviazała vajnu na ŭschodzie Ukrainy. Ciapier Rasija, zhodna z paviedamleńniami suśvietnych ŚMI i vajennych analitykaŭ, znoŭ skancentravała značnyja siły na miežach Ukrainy.

U hetym kantekście vialikija kantynhienty rasijskich vojskaŭ u Biełarusi pahražajuć asłabić biełaruski suvierenitet i ŭciahnuć našu krainu ŭ mahčymuju vajnu. Reform.by pasprabavaŭ abahulnić, što my viedajem pra vučeńni «Sajuznaja rašučaść — 2022» z roznych krynic.

Jak doŭha? Što płanujecca rabić?

Pavodle aficyjnaj infarmacyi, ab praviadzieńni pazapłanavych vučeńniaŭ Alaksandr Łukašenka i Uładzimir Pucin damovilisia vosieńniu minułaha hoda. U kancy listapada 2021 hoda pra ich praviadzieńnie ŭpieršyniu abviaściŭ ministr abarony Biełarusi Viktar Chrenin.

Płanujecca da 9 lutaha sabrać vojski i arhanizavać ich u bajavyja hrupoŭki, adnačasova pravodziačy roznyja mierapryjemstvy ŭ śfiery supraćpavietranaj abarony i abarony važnych abjektaŭ u Biełarusi.

Z 10 pa 20 lutaha płanujecca pravieści ŭłasna vučeńni, metaj jakich nazyvajuć «adpracoŭku zadač strymvańnia i adbićcia źniešniaj ahresii padčas viadzieńnia abarončaj apieracyi, procidziejańnia teraryzmu i abarony intaresaŭ Sajuznaj dziaržavy».

Pieravažna, pa słovach rasijskich vajskoŭcaŭ, heta buduć dziejańni supraćdyviersijnaha i antypartyzanskaha charaktaru — «spynieńnie praniknieńnia uzbrojenych hrup bajevikoŭ, pierakryćcio kanałaŭ dastaŭki zbroi i bojeprypasaŭ, a taksama pošuk, błakavańnie, źniščeńnie niezakonnych uzbrojenych farmavańniaŭ i dyviersijna-raźviedvalnych hrup praciŭnika».

Dzie ŭ Biełarusi?

Vojski i technika prybyvajuć u Biełaruś pa pavietry i čyhuncy. Potym jany pierakidvajucca adrazu na niekalki biełaruskich palihonaŭ — «Abuz-Lasnoŭski», «Asipovicki», «Brescki», «Hožski» i «Damanaŭski». Taksama płanujucca dziejańni na niejkich inšych asobnych učastkach miascovaści, raźmieščanych na terytoryi Respubliki Biełaruś».

Akramia taho, vučeńni buduć prachodzić na aeradromach Baranavičy, Łuniniec, Lida i Mačuliščy.

Adkul?

Pavodle aficyjnaj infarmacyi, pierakidvajucca rasijskija vojski tolki z Uschodniaj vajennaj akruhi RF. Pa terytoryi — heta ŭsia ŭschodniaja častka RF, u tym liku Cichaakijanski fłot.

Aficyjnyja krynicy nie paviedamlali pra toje, jakija kankretna rasijskija častki ŭdzielničajuć u vučeńniach na terytoryi našaj krainy, ale pa fota i videa možna ŭpeŭniena kazać, što heta, naprykład, 36-ja asobnaja hvardziejskaja motastrałkovaja Łazoŭskaja Čyrvanaściažnaja bryhada.

Taksama ŭžo trapili ŭ fotaabjektyvy u Biełarusi ŭ studzieni 2022 hoda sałdaty rasijskaj marskoj piachoty.

Pavialičyć

Takim čynam, havorka idzie nie pra vučeńni rehijanalnaj hrupoŭki rasijskich i biełaruskich vojskaŭ, a ab uzmacnieńni ŭžo isnujučaj hrupoŭki dadatkovymi vojskami.

Kolkaść vojskaŭ? Jakaja technika?

Aficyjna kolkaść vojskaŭ nie ahučvałasia, adnak Ministerstva abarony RF paviedamiła, što kolkaść udzielnikaŭ vučeńniaŭ, a taksama kolkaść asnoŭnych sistem uzbrajeńnia, jakija traplajuć pad dziejańnie Vienskaha dakumienta 2011 hoda, nie pieravyšajuć vyznačanyja im paramietry, pra jakija treba paviedamlać».

Na dumku vajennaha ekśpierta Jahora Lebiadka, heta aznačaje, što kolkaść udzielnikaŭ vučeńniaŭ — nie bolš za 13 000 čałaviek. Kali adšturchoŭvacca ad hetaha abmiežavańnia ŭ Vienskim dakumiencie, to jano ž aznačaje zadziejničańnie nie bolš za 300 tankaŭ albo 500 bajavych braniravanych mašyn, albo 300 samachodnych i buksujemych artyleryjskich harmat, minamiotaŭ i reaktyŭnych sistem załpavaha ahniu (kalibra 100 mm i bolš).

U pryvatnaści, na fotazdymkach i videa, jakija pakazvajuć praces pierakidańnia vojskaŭ, bačnyja 152-mm samachodnyja artyleryjskija ŭstanoŭki «Akacyja».

Namieśnik ministra abarony Rasii Alaksandr Famin na bryfinhu dla zamiežnych vajskovych ataše 18 studzienia paviedamiŭ, što z Rasii ŭ Biełaruś dla vučeńniaŭ pierabazujuć dva dyvizijony sistem SPA S-400, adzin dyvizijon kompleksaŭ «Pancyr-S» i dvanaccać samalotaŭ Su-35.

Što ŭ vyniku?

Faktyčna na fonie novych rezkich zajaŭ rasijskaha kiraŭnictva i prapahandy ŭ dačynieńni da Ukrainy, na terytoryi jakoj Rasija ŭžo raźviazała ŭzbrojeny kanflikt, u Biełaruś pazapłanava prybyvaje kantynhient vojskaŭ RF nieviadomaj kolkaściu.

Takim čynam, stvarajecca novy napramak, ź jakoha suprać Ukrainy moža ažyćciavić ŭvarvańnie — paŭnočny.

Adnačasova z boku Łukašenki čarhovy raz hučać słovy ab pahrozach z boku Ukrainy. Usio heta ŭzmacniaje napružanaść, u atmaśfiery jakoj kroŭ ź luboha boku moža pralicca navat biez pramoha žadańnia mahčymaha ahresara.

• 0
• 0
• 0
• 0
• 0
• 0
• 0
• 0