Cichanoŭskaja: Režym zrabiŭ našu krainu paŭnavartasnym udzielnikam vajny

«Ja nikoli nie dumała, što skažu heta. I maryła b nikoli hetaha nie kazać, ale… Pačałasia vajna. Vajna, u jakuju šmat chto nie vieryŭ, jakoj šmat chto bajaŭsia. Ale jakoj nichto z nas nie chacieŭ. Ja razumieju, što ciapier va ŭsich bolš pytańniaŭ, čym adkazaŭ. I adkažu na častku ź ich.

Tak, režym zrabiŭ našu krainu paŭnavartasnym udzielnikam vajny — i ciapier Biełaruś pad ryzykaj zvarotnaha vajennaha ŭdaru. Heta nielha nazvać inakš jak dziaržaŭnaj zdradaj.

Tak, na terytoryi Biełarusi niebiaśpiečna. U našaj krainie znachodziacca čužyja, rasijskija vojski. Mienavita ich prysutnaść — hałoŭnaje śviedčańnie taho, što Łukašenka bolš nie kantraluje situacyju z vajskovaj prysutnaściu, a jaje kantraluje Pucin. 

Režym vyrašyŭ schavać svaju nielehitymnaść za inšymi padziejami, ale raspačaŭ vajnu — i ciapier kožny jaho krok nabližaje duły tankaŭ da voknaŭ biełarusaŭ. Ja kažu pra tych, chto žyvie ŭ Biełarusi. Bo ŭ voknach biełarusaŭ, jakija raniej znajšli prytułak va Ukrainie, užo hrymiać vybuchi.

Tak, siońnia ranicaj całkam źmianiłasia ŭsio. Heta bolš nie ŭnutrany palityčny kryzis — heta vajna, u jakoj Biełaruś akazałasia ŭdzielnicaj, chacia my ŭsie byli suprać. Ciapier baranić treba nie tolki palitźniavolenych ci novyja vybary. Baranić treba samoje isnavańnie našaj krainy, jaje niezaležnaść i suvierenitet. Svaboda i adkaznaść zaŭsiody iduć pobač. I nadyšoŭ čas kožnamu uziać adkaznaść za svaju krainu. Stvarać nacyjanalny antyvajenny ruch i rychtavacca adstojvać svoj suvierenitet. 

Ambicyi dvuch dyktataraŭ pryviali da realnaha vajskovaha stanovišča va ŭsim rehijonie. Razam z ŭsimi našymi partniorami, uklučajučy Kaardynacyjnuju Radu, NAU, ByPol, my terminova mianiajem stratehiju pad hetyja mety. Adna z našych zadač — kab usie pravilna razumieli situacyju: vajnu pačaŭ Pucin, a Łukašenka i tyja, chto vykonvaje jahonyja zahady, — saŭdzielniki vajennaj ahresii.

Naša kraina suprać vajny. Dla mianie, dla usich demakratyčnych siłaŭ i dla ŭsioj Biełarusi hałoŭnaja meta ciapier — spynić vajnu, kab našy dzieci nie vučyli ŭroki ŭ bambaschoviščy, kab našy vajskoŭcy nie stralali adzin u adnaho, i kab na doŭhija hady ŭvieś rehijon nie pieraŭtvaryŭsia ŭ piekła. Tamu, rodnyja biełarusy, ja b chacieła mieć mahčymaść pahladzieć u vočy kožnaha z vas i skazać, što my razam i što my budziem dzialicca z vami ŭsimi navinami i trymać u kursie padziej. Darahija ukraincy, ad imia našaj krainy ja vykazvaju vam salidarnaść i padtrymku, a ad imia biełarusaŭ chaču skazać: nam soramna za toje, jakuju rolu terytoryja našaj krainy hraje ŭ hetaj vajnie. I my hatovyja rabić usio, što spatrebicca, kab spynić ahressaraŭ i hetuju katastrofu.

Žyvie Biełaruś. I Słava Ukrajini».

• 0
• 0
• 0
• 0
• 0
• 0
• 0
• 0