«Situacyja blizkaja da kałapsu». Znajści žytło ŭ Tbilisi ŭžo amal niemahčyma

Minčanka Anastasija žyvie ŭ Tbilisi sa žniŭnia minułaha hoda, pa mahčymaści dapamahaje znajści žyllo znajomym i siabram, jakija prylatajuć ź Biełarusi.

Pavodle jaje, ciapier situacyja z arendnym žyllom u Tbilisi blizkaja da kałapsu ‒ kolkaść žadajučych źniać kvateru pavialičvajecca, dobrych prapanoŭ užo amal nie zastałosia.

‒ Jašče niadaŭna možna było źniać kvateru z adnoj spalniaj (jak naša dvuška) z dobrym ramontam u najlepšym rajonie Tbilisi za 300 dalaraŭ. Ciapier za hetyja hrošy nierealna niešta znajści navat na ŭskrajku. Žyllo ŭ rajonach u 30-40 chvilinach na taksi ad centra kštałtu našaj dvuški kaštuje realna 500 dołaraŭ. Kali kazać pra centr, to tut košty ŭžo 600-1000 dołaraŭ i vyšej.

Sa svajho dośviedu mahu skazać, što miascovyja ryełtary pierahružanyja, jany prosta nie adkazvajuć, a pasty ab arendzie ŭ telehram-kanałach žyvuć nie dni, a hadziny i chviliny. Praz hadzinu na kvateru ŭžo čarha.

Nastaśsia kaža, što byli vypadki, kali vystaŭlali kvatery biez cany i adrasa, a ludzi pisali pra hatoŭnaść jaje źniać.

‒ Maje znajomyja jašče tydzień tamu źniali kvateru z dvuma pakojami z dobrym ramontam u prestyžnym zaharadnym rajonie za 500 dalaraŭ. Ciapier takaja ž kvatera kaštuje ŭ dva razy daražej. Ciapier nie čas chadzić i hladzieć varyjanty, rynak traščyć, svabodnych kvater stanovicca ŭsio mienš.

Na dumku Anastasii, situacyja moža źmianicca, kali ludzi pačnuć źjazdžać u inšyja krainy ci inšyja harady z bolš tannaj nieruchomaściu. Naprykład, u Kutaisi, Rustavi, Tełavi, Batumi.

Jašče adzin były minčanin Dźmitryj zdymaje kvateru ŭ Tbilisi z vosieni minułaha hoda.

‒ Kvateru, jakuju ja zdymaju ŭ rajonie Sałałaki, u tym hodzie možna było źniać za 400 dalaraŭ u miesiac (na doŭhi termin), a ciapier ‒ užo za 600, ‒ raspaviadaje jon. ‒ Ludzi, jakija prylatajuć ciapier, šukajuć kvatery da 500, a pa fakcie prystojnaje žyllo na siamju (nie studyja i nie babušatnik) kaštuje ad 700 dołaraŭ. Mnohija, jak ja zrazumieŭ, razhladajuć Hruziju jak tranzitnuju kropku. Tamu žyllo biaruć roznaje, pierakantavacca miesiac-dva.

U inšych hruzinskich haradach, pavodle infarmacyi Dźmitryja, kvatery tańniejšyja ‒ ad 350 dołaraŭ. Ale košty rastuć litaralna kožny dzień.

‒ Niaredka ŭ hetych haradach zdymajuć damy, ‒ kaža jon. ‒ Atrymlivajecca daražej, ale možna raźbić arendu ź inšaj siamjoj napałovu, miesca chapaje. Damy biaruć i pad ofisy nievialikich kampanij, jakija pierajazdžajuć u poŭnym składzie. Naprykład, u dobrym rajonie Tbilisi dom na dva pavierchi z 8 pakojami kaštuje 2500 dołaraŭ za miesiac plus kamunalnyja.

Surazmoŭcy ahučyli jašče adnu prablemu dla pryjezdžych ź biełaruskimi i rasijskimi pašpartami ‒ niekatoryja abjavy ab arendzie publikujucca z pamietkaj «nie dla biełarusaŭ i nie ruskim». Ale zjava heta nie masavaja.

• 0
• 0
• 0
• 0
• 0
• 0
• 0
• 0