Łukašenka zajaviŭ, što litoŭcy skuplajuć našy pradukty i paliva. A jak nasamreč?
U Biełarusi ŭ apošnija dni zajaŭlajuć, što litoŭcy nibyta skuplajuć ajčynnyja tavary. U pieršuju čarhu — sol, muku i paliva. Spačatku pra heta pisali dziaržaŭnyja ŚMI, a ciapier pra ažyjataž na našy pradukty z boku litoŭcaŭ i palakaŭ zajaviŭ Alaksandr Łukašenka. «Siońnia zabylisia pra ŭciekačoŭ, pra kavid. Adkryli miažu i prosiać: choć by trochi muki, hrečki i soli», — skazaŭ Łukašenka. Zerkalo.io pacikaviłasia ŭ litoŭskich pamiežnikaŭ i mytnikaŭ, ci sapraŭdy našyja susiedzi aktyŭna jeduć pa biełaruskija tavary, ci zaŭvažyli jany ažyjataž. Taksama my paraŭnali ceny na niekatoryja tavary ŭ nas i ŭ Litvie.
Łukašenka: Jeduć, kab zapravić bak bienzinu
Alaksandr Łukašenka na sustrečy z kiraŭnictvam orhanaŭ dziaržbiaśpieki zajaviŭ, što «na fonie padziej, jakija adbyvajucca apošnim časam, pamianiałasia situacyja na zachodnich miežach krainy». «Pahladzicie, chto b moh padumać: my ŭvieś čas — vašy žonki, niekatorych — kudy jeździli šmotki kuplać ci jašče niešta? U Litvu, u Polšču. Tam usio było tanna. Pradukty charčavańnia tańniej, jašče niešta i hetak dalej. Tamu što dempinhavaŭ uvieś Zachad, pastaŭlajučy pradukcyju ŭ Litvu, viedajučy ab tym, što my jaje kupim tam. My vyvozili valutu», — skazaŭ Łukašenka.
Pavodle jaho słoŭ, ciapier skłałasia advarotnaja situacyja, «kali ŭžo na sumiežnym baku majuć patrebu ŭ praduktach charčavańnia ź Biełarusi».
«Što siońnia adbyvajecca… miaža ž była zakrytaja, bajalisia kavida ź Biełarusi. Ale sprava ž nie ŭ kavidzie, vy razumiejecie. Miažu začynili, kab my tudy nie ruchalisia. Siońnia zabylisia pra ŭciekačoŭ, pra kavid. Adkryli miažu i prosiać: choć by trochi muki, hrečki i soli. Nu bałazie «Mazyrsol» pracuje, možam tonami, tysiaču ton pradać hetaj soli. Heta taksama našy mahčymaści, kab vy viedali. Jeduć, kab zapravić bak bienzinu. I buduć jechać», — skazaŭ Alaksandr Łukašenka.
DziaržSMI: Našyja tavary jašče i radujuć jakaściu
U minułyja vychodnyja pa dziaržaŭnych telekanałach vypuścili siužety pra toje, što «litoŭcy stali masava pryjazdžać u Biełaruś, kab papoŭnić zapasy aŭtamabilnaha paliva i zakupicca krupami».
«Akazvajecca, schadzić u kramu za miažoj dla ich ciapier bolš vyhadna, čym doma. Da taho ž našyja tavary jašče i radujuć jakaściu. Słovy litoŭcaŭ, jakija pryjechali na zakupy ŭ Biełaruś praz punkt propusku «Bieniakoni», — śćviardžali dziaržSMI.
Pry hetym ŚMI pryvodzili taksama słovy, jak jany śćviardžajuć, samich litoŭcaŭ. Voś adna z cytat: «Pa dva jeŭra navat sol stali pradavać… biznes u pierakupščykaŭ. Heta ž Litva! Vam zdajecca, što ŭ nas tam dobra. Na samaj spravie zarpłata — to što — 500 jeŭra. 150 za kvateru addaj, na pracu jeździć — bak salarki patrebien…»
Pry hetym nie ŭdakładniajecca prafiesija i miesca pracy. Heta važny momant, bo navat minimalnaja zarpłata ŭ Litvie pieravyšaje 533 jeŭra (suma ŭžo paśla vypłaty padatkaŭ).
Litoŭskaja pamiežnaja słužba: Trafik nie pavysiŭsia
Dziaržaŭnaj pamiežnaj słužbie Litvy paviedamili, što kolkaść litoŭcaŭ, jakija ŭjazdžajuć u Biełaruś, i tych, chto viartajecca nazad, apošni miesiacy ŭ cełym fiksujecca na adnym uzroŭni. Paśla pačatku vajny litoŭskija pamiežniki taksama nie nazirajuć rostu kolkaści hramadzian Litvy, jakija chočuć adpravicca ŭ našu krainu abo vyjechać nazad.
«Trafik nie pavysiŭsia», — udakładnili ŭ Dziaržaŭnaj pamiežnaj słužbie Litvy.
Pa dadzienych litoŭskaha boku, ź Litvy praz naziemnyja pahranpierachody ŭ Biełaruś za pieršyja dva tydni vyjechała kala 22 tysiač litoŭcaŭ, a ŭjechała nazad — kala 23 tysiač. Dla paraŭnańnia: za apošnija dva tydni lutaha ź Litvy ŭ našu krainu vyjechała kala 23 tysiač litoŭcaŭ, a viarnułasia — kala 22 tysiač.
U Mytnym departamencie pry Ministerstvie finansaŭ Litvy nie ŭdałosia atrymać kamientar pra toje, viazuć ci nie litoŭcy biełaruskija tavary, a kali tak, to nakolki aktyŭna.
Što ŭ Litvie z sollu, krupami i palivam dy cenami na ich
U Litvie ciapier nazirajecca pavyšany popyt na sol, asabliva — na tannuju. Kali jana źjaŭlajecca na pryłaŭkach, to jaje aktyŭna raźbirajuć. Ažyjataž uźnik na fonie vajny ŭ Ukrainie. Handlovyja sietki kažuć, što niedachopu soli nie budzie, ale ŭdakładniajuć, što mohuć być prablemy z pastaŭkami tannaj soli.
Na niekatoryja krupy — hrečku i rys — taksama nazirajecca pavyšany popyt, adnak pra deficyt kazać nie davodzicca.
Što tyčycca cenaŭ, to adny tavary ŭ Litvie tańniejšyja, čym u Biełarusi (da prykładu, miasa, harodnina, kava, sadavina), a inšyja — daražejšyja. Kali paraŭnoŭvać košt hrečki, to ŭ našaj krainie jana tańniejšaja. Da prykładu, u Vilni ŭ kramie Lidl hrečka kaštuje kala 7,6 rubla ŭ pieraliku za kiłahram, a ŭ «Jeŭraopcie» ŭ Minsku — 4,4 rubla za 1 kh (paznačanyja minimalnyja ceny, jakija byli 15 sakavika).
Što tyčycca paliva, to ŭ sakaviku ŭ Litvie značna vyraśli ceny na jaho. Da prykładu, na AZS Circle K litr bienzinu marki AI-95 kaštuje 6,3 rubla ŭ pieraliku. Ciapier litoŭski ŭrad abmiarkoŭvaje varyjanty źnižeńnia cenaŭ.
U Biełarusi paliva tańniej. Tak, litr bienzinu AI-95 u našaj krainie kaštuje 2,14 rubla. Adnak litoŭcy pry ŭsim žadańni nie zmahli b zakupić bienzinu ŭ Biełarusi ŭ zapas. U Litvie dziejničaje abmiežavańnie na ŭvoz paliva dla asabistaha karystańnia — nie bolš za 10 litraŭ u ručnoj jomistaści na adnu mašynu.
Jechać u takoj situacyi za adnoj kanistraj paliva (dapuścim, jašče i zapoŭnić bak) i niekalkimi kiłahramami hrečki i soli, prachodziačy mytny i pamiežny kantrol, — pierśpiektyva vidavočna z sumnieŭnaj finansavaj vyhadaj. Viartacca ź Biełarusi ŭ Litvu i zaadno kupić niešta z tavaraŭ — inšaje pytańnie, ale i kazać u takim vypadku, što litoŭcy jeduć metanakiravana za našymi tavarami, taksama ciažka.
Redki vypadak: pamiłavany biełaruski palitviazień pajšoŭ na vajnu suprać Ukrainy16
Redki vypadak: pamiłavany biełaruski palitviazień pajšoŭ na vajnu suprać Ukrainy
«Strelba kali i strelić, to naŭrad ci kulamiotnaj čarhoj». Maksim Znak acaniŭ realnaść pahroz biełaruskaj prapahandy pazbavić hramadzianstva palitemihrantaŭ1212
Kamientary