2,5 hoda kałonii: vyniesieny druhi prysud pa «spravie Zielcera»
U Bresckim abłasnym sudzie 4 krasavika vynieśli prysud palitviaźniu Dzianisu Karabanu, zatrymanamu za kamientaryj u internecie paśla hibieli 28 vieraśnia ŭ Minsku ajcišnika Andrej Zielcera, paviedamlaje «Viasna».
Mužčynu asudzili na 2,5 hoda pazbaŭleńnia voli ŭ kałonii ahulnaha režymu. Jaho pryznali vinavatym pa art. 130 KK (raspalvańnie rasavaj, nacyjanalnaj abo relihijnaj varožaści).
Prysud vyniesła sudździa Kaciaryna Hruda. Dziaržabvinavačvańnie pradstaŭlaŭ Alaksandr Žeška.
Palitviaźniu pastavili ŭ vinu toje, što 28 vieraśnia 2021 hoda ŭ hrupie «UKantakcie» pad paviedamleńniem ab tym, što ŭ Minsku byŭ zastreleny supracoŭnik KDB, jon pakinuŭ niehatyŭny kamientaryj.
Dzianis Karaban całkam pryznaŭ svaju vinu ŭ sudzie. Adnak adkazvajučy na ŭdakładniajučyja pytańni, admoviŭsia pryznavać, što svaim kamientaryjem padachvočvaŭ da raspalvańnia varožaści. Sudova-psichałahičnaja ekśpiertyza paćvierdziła ŭskosnuju nakiravanaść kamientaryja da padachvočvańnia da hvałtoŭnych dziejańniaŭ u dačynieńni da peŭnaj sacyjalnaj hrupy.
Dziaržabvinavaŭca paprasiŭ pakarać Karabana 2,5 hoda pazbaŭleńnia voli ŭ kałonii ahulnaha režymu. Sudździa Kaciaryna Hruda vyniesła mienavita taki prysud.
Heta druhi viadomy prysud pa tak zvanaj «spravie Zielcera».
U studzieni 2022 hoda ŭ Mahilovie sudździa Taćciana Rachmanienka asudziła 45-hadovaha žychara horada Alaksandra Haŭrylenku na dva hady kałonii va ŭmovach ahulnaha režymu i da štrafu ŭ sto bazavych vieličyń za abraźlivyja kamientaryi ŭ adras zahinułaha supracoŭnika KDB Dźmitryja Fiedasiuka.
Pa spravie kamientaryjeŭ byli zatrymanyja dziasiatki čałaviek, a za artykuł z kamientaryjem adnakłaśnicy Andreja Zielcera byŭ zatrymany žurnalist «KP u Biełarusi» Hienadź Mažejka.
Ciapier čytajuć
Žonka Arcioma, jaki emihravaŭ u Ispaniju ź siamjoj i zastaŭsia tam adzin, adkazała, čamu ŭ Baranavičach lepš, čym u Barsiełonie24
Kamientary