«Pa 300—650 tysiač jeŭra vyjavili», trapiŭsia navat doktar Łukašenki. Aficyjna — pra zatrymańni traŭmatołahaŭ
U Biełarusi byli zatrymanyja 35 artapiedaŭ-traŭmatołahaŭ. Takaja ličba prahučała na naradzie ŭ Alaksandra Łukašenki z udziełam ministra achovy zdaroŭja Dźmitryja Pinieviča, hienprakurora Andreja Švieda i kiraŭnika KDB Ivana Cierciela.
«Ja vielmi dobra viedaju chod hetaj apieracyi: kantralavaŭ. Heta nie siońnia, nie ŭčora pačałosia. Ja ministra achovy zdaroŭja pra heta papiaredziŭ. Ale na siońnia 35 čałaviek [zatrymanyja]. I ŭpeŭnieny (mianie nichto nie pierakanaje ŭ advarotnym), što heta nie ŭsie tyja, chto pavinien tam ź imi pobač siadzieć», — skazaŭ Łukašenka.
Jon zajaviŭ, što daktary «nie prosta padkazvali ludziam, jakija lažać na apieracyjnym stale, jakija impartnyja artapiedyčnyja zapčastki im u cieła ŭstavić, a prystojny za heta ad zamiežnikaŭ atrymlivali chabar».
«U niekatorych [zatrymanych] pa 300-650 tysiač jeŭra pry pieratrusach vyjavili doma… Na kišennyja vydatki», — raspavioŭ jon.
Pavodle Łukašenki, byŭ zatrymany navat doktar, jaki nieadnojčy jaho abśledavaŭ. Proźvišča nie było nazvana.
Jak zajaviŭ palityk, na naradzie ŭ prysutnaści hienprakurora buduć vyrašać, «što rabić z hetymi ludźmi».
Pinievič, jak vyjaviłasia, źviartaŭsia da Łukašenki nakont zatrymanych daktaroŭ, toj adpraviŭ ministra ŭ SIZA.
«Ja ministru achovy zdaroŭja, kali jon da mianie źviarnuŭsia z pytańniem, što budziem rabić i jak voś tut razabracca, prapanavaŭ pajści ŭ śledčy izalatar i tam ź imi raźbiracca. Ja razumieju, što vy piersanalna z kožnym praviali pracu», — skazaŭ Łukašenka.
«Z kožnym, tak», — adkazaŭ Pinievič.
Pa słovach Łukašenki, ministr achovy zdaroŭja prasiŭ jaho ŭziać zatrymanych «na paruki» paśla taho, jak jany kampiensujuć škodu dziaržavie, i nakiravać kudyści dla pracy pa śpiecyjalnaści.
Taksama Łukašenka zapatrabavaŭ naładzić pramyja pastaŭki lekaŭ i miedvyrabaŭ.
«My pavinny trymać hetyja pytańni (pastavak i vykarystańnia lekaŭ i miedycynskich vyrabaŭ) pad kantrolem. A kab jany byli pad kantrolem, ja ŭžo tysiaču razoŭ kazaŭ: prybiarycie ŭsiakaje pasiarednictva. Zakuplajcie naŭprost leki i miedycynskija vyraby. Heta možna rabić navat u sankcyjny pieryjad», — pastaviŭ Łukašenka zadaču ŭ čarhovy raz.
«Spasyłacca na toje, što chtości nam čahości nie daje, čahości nie chapaje… Viedajecie, u nas miedycynskaja technika i leki nie znachodziacca pad žorstkimi sankcyjami.
Kali vam amierykancy nie pradajuć leki, kupicie ich u Indyi, na Kubie. Pytańnie tolki ŭ spraŭnaści. Tamu spasyłki na toje, što ŭ nas nie chopić lekaŭ, jašče čahości, nie prymajucca», — upeŭniena vykazaŭsia Łukašenka.
Kamientary