Pravaabaroncy pryznali palitviaźniami 11 «rejkavych partyzanaŭ»
Siońnia pravaabarončaja supolnaść pryznała palitviaźniami jašče 11 čałaviek.
Heta «rejkavyja partyzany» Siarhiej Hlebka, Dźmitryj Ravič, Dzianis Dzikun, Aleh Małčanaŭ, Siarhiej Kanavałaŭ, Siarhiej Plaškun, Juryj Sielvič, Jaŭhien Minkievič, Dźmitryj Klimaŭ, Uładzimir Aŭramcaŭ, Alaksiej Šyškaviec.
Siarhiej Hlebka — zatrymany ŭ noč z 1 na 2 sakavika ŭ Stoŭbcach, pryznaŭ, što pakłaŭ dva draŭlanyja bierviany na čyhunačnyja šlachi i padpaliŭ ich;
Dźmitryj Ravič, Dzianis Dzikun i Aleh Małčanaŭ — zatrymanyja 4 sakavika ŭ Śvietłahorsku za padpał 28 lutaha na stancyi «Žerdź — Astankovičy» relejnaj šafy sihnalizacyi, centralizacyi i błakavańnia (SCB), u vyniku čaho śvietłafory i strełačnyja pieravody na hetym učastku byli pryviedzienyja ŭ niepracoŭny stan;
Siarhiej Kanavałaŭ —supracoŭnik viciebskaj dystancyi sihnalizacyi i suviazi UP «Viciebskaje adździaleńnie Biełaruskaj čyhunki», zatrymany za «padrychtoŭku aktu teraryzmu». Na dumku MUS, mužčyna płanavaŭ vyviadzieńnie z ładu sistem, jakija zabiaśpiečvajuć biaśpieku čyhunačnaha ruchu;
Siarhiej Plaškun i Juryj Sielvič byli zatrymanyja 10 sakavika za «padrychtoŭku da akta teraryzmu» (art. 13 i art. 289 KK). Pa śćviardžeńni śledstva, mužčyny płanavali padpalvać vajskovuju techniku rasijskaj armii, jakaja pieramiaščałasia pa čyhuncy, dla čaho zachoŭvali zapalnuju sumieś u butelkach;
Jaŭhien Minkievič, Dźmitryj Klimaŭ i Uładzimir Aŭramcaŭ — zatrymanyja 30 sakavika śpiecyjalnym padraździaleńniem MUS pa padazreńni ŭ źniščeńni dźviuch relejnych šafaŭ sihnalnaj ustanoŭki pad Asipovičami. Padčas zatrymańnia mužčyny pasprabavali źbiehčy, pa ich byŭ adkryty ahoń. Siłaviki ŭžyli zbroju na parazu, jak minimum adzin z zatrymanych paranieny i znachodzicca ŭ lačebnaj ustanovie, a inšym «akazanaja mieddapamoha na miescy».
Usich ich abvinavačvajuć pa art. 289 KK va «ŭčynieńni akta teraryzmu» i «padrychtoŭcy akta teraryzmu». Śledčy kamitet taksama zajaviŭ ab ździajśnieńni hetych dziejańniaŭ u składzie arhanizavanaj hrupy.
2 sakavika ŭ Asipovičach byŭ zatrymany Alaksiej Šyškaviec, jaki, pavodle infarmacyi MUS, «uvajšoŭ u skład ekstremisckaha farmavańnia BYPOL, dla ździajśnieńnia supraćpraŭnych dziejańniaŭ u Biełarusi». 1 sakavika jon nibyta atrymaŭ ukazańni nakont błakavańnia čyhunačnych šlachoŭ, a taksama nakont vyrabu i vykarystańnia «kaktejlaŭ Mołatava», «vykazaŭ aktyŭnuju hatoŭnaść sadziejničać akcyjam pramoha dziejańnia na abjektach čyhunki ŭ rajonie horada Asipovičy.
Pa źviestkach na 21 krasavika ŭ Biełarusi 1145 palitviaźniaŭ.
Kamientary