Za apošni čas na infrastruturu Biełaruskaj čyhunki ździejśniena bolš za 80 teraktaŭ, raskazali ŭ siužecie na BT, pryśviečanym «aktam teraryzmu i sabatažu» na čyhuncy.
Paviedamlajecca, što chod rasśledavańnia znachodzicca na kantroli ŭ Łukašenki, a spravy, u jakich bačycca ŭzajemasuviaź, abjadnoŭvajucca ŭ adnu vialikuju spravu.
Nahadajem, što za minuły miesiac było zatrymana kala 40 čałaviek pa padazreńni ŭ dyviersijach na čyhuncy. Učora MUS apublikavała kadry zatrymańnia troch žycharoŭ Babrujska, jakija ŭčynili dyviersiju 28 sakavika ŭ Asipovickim rajonie, i mužčyny, datyčnaha da dyviersii ŭ Barysaŭskim rajonie.
Ceły šerah aktaŭ sabatažu na čyhuncy Biełarusi byŭ ździejśnieny na zaklik supolnaści «Bajpoł», jakaja jadnaje aficeraŭ — praciŭnikaŭ dyktatury, paśla taho jak Rasija z terytoryi Biełarusi napała na Ukrainu. Pa čyhuncy pieravoziać rasijskuju vajskovuju techniku, a taksama bojeprypasy, jakija vykarystoŭvajucca dla abstrełaŭ ukrainskich haradoŭ i pazicyj ukrainskaj armii.
Na niekatorych pierahonach byli spalenyja relejnyja šafy, na inšych — zamknuli drotam rejki, tym samym vyvieli z ładu sihnalizacyju. Pad Stoŭbcami siamja vyciahnuła na rejki biarviony. Hetyja akcyi zapavolvajuć ruch ciahnikoŭ na niekatory čas, ale nie ŭpłyvajuć na biaśpieku ruchu.
Paśla hetaha stała viadoma pra aryšt u roznych rehijonach Biełarusi troch dziasiatkaŭ čyhunačnikaŭ, źviazanych z padpollem.
Akramia taho, Kamitet dziaržaŭnaj biaśpieki Biełarusi i HUBAZiK, struktura Ministerstva ŭnutranych spraŭ, jakaja vykonvaje funkcyi palityčnaj palicyi, za apošnija tydni aryštavała niekalki dziasiatkaŭ ludziej u Mazyry i rajonie, u Śvietłahorsku i rajonie, u Baranavičach, Stoŭbcach i ŭ Dziaržynsku. Metaj zatrymańniaŭ byŭ pošuk ludziej, jakija rychtavali akty sabatažu na čyhuncy abo pieradavali ŭ niezaležnyja ŚMI i telehram-kanały infarmacyju ab pieramiaščeńni rasijskich vojskaŭ ci puskach rakiet pa Ukrainie.
Stała taksama viadoma, što častku siłavikoŭ, jakija zajmalisia padaŭleńniem ruchu za hramadzianskija pravy, a taksama bajcoŭ unutranych vojskaŭ, pierakinuli na achovu čyhunki.
Va Ukrainie viestki pra dyviersii na biełaruskaj čyhuncy hramadskaja dumka pryniała ź vialikaj udziačnaściu.
Rasija napała na Ukrainu 24 lutaha, u tym liku z terytoryi Biełarusi. Hetaje hrubaje parušeńnie mižnarodnaha prava było asudžanaje Hienieralnaj asamblejaj AAN 140 hałasami suprać piaci, siarod hetych piaci i Biełaruś.
U vyniku ahresii zahinuli ŭžo dziasiatki tysiač vajskoŭcaŭ z abodvuch bakoŭ, a taksama mirnych žycharoŭ. Na akupavanych terytoryjach adbyvajucca sapraŭdnyja źvierstvy, ich maštab staŭ viadomy paśla razhromu rasijskich vojskaŭ pad Kijevam.
Zhodna ź mižnarodnym pravam, Biełaruś ličycca saŭdzielnicaj ahresii, bo pradastaviła svaju terytoryju dla viadzieńnia vajny.
Čytajcie taksama:
Poŭnaja karta dyviersij na biełaruskaj čyhuncy
Što viadoma pra chłopcaŭ, zatrymanych sa stralaninaj za dyviersii na čyhuncy?
«Pa supracoŭnikach pracuje niepasredna KDB». Padrabiaznaści zatrymańniaŭ na čyhuncy
26‑hadovaha supracoŭnika elitnaha padraździaleńnia mytni asudzili na 16 hadoŭ pa nabory palitartykułaŭ. Siarod ich i «zdrada dziaržavie»6
Kamientary