«Dumaju, los padsudnych užo vyznačany». Žonka baranavickaha aktyvista Hundara — pra sud nad mužam
Sud pa «spravie Aŭtuchoviča», adnym ź fihurantaŭ jakoha źjaŭlajecca Uładzimir Hundar, pačniecca 18 maja. Jak jon budzie prachodzić i jakija naviny prychodziać ad Uładzimira napiaredadni sudovaha pasiadžeńnia, Intex-press raspaviała Alena Hundar.
Uładzimir Hundar adbyvaje pakarańnie pa art. 366 KK RB («Hvałt albo pahroza ŭ dačynieńni da słužbovaj asoby, jakaja vykonvaje słužbovyja abaviazki, abo inšaj asoby, jakaja vykonvaje hramadski abaviazak») i prachodzić abvinavačanym jašče pa dvuch kryminalnych artykułach — «Stvareńnie złačynnaj arhanizacyi» (č. 2. 285 KK RB) i «zachop albo ŭtrymańnie dziaržaŭnaj ułady niekanstytucyjnym šlacham» (č. 2. 357 KK RB), jamu pahražaje da 15 hadoŭ pazbaŭleńnia voli.
— Vałodzi ŭručyli papieru, što sud budzie adkryty, ale prachodzić budzie prosta ŭ [hrodzienskaj] turmie. Jaho nie paviazuć u horad. Nakolki ja viedaju, nieabchodna pisać zajavu na imia načalnika turmy, kab jon daŭ dazvoł pryjści ŭ sud. Małavierahodna, što ja zmahu tam paprysutničać, ale 18 maja pasprabuju pryjechać da pačatku suda, — raspaviadaje Alena Hundar.
Pa tak zvanaj «spravie Aŭtuchoviča», u jakoj fihuruje proźvišča baranavickaha aktyvista, 18 maja buduć sudzić 12 čałaviek. Alena pryznajecca, što nie čakaje ad suda ničoha dobraha i razumieje, što prysud moža być surovym.
— Uładzimiru pierakvalifikavali artykuł, i dziakuj bohu: tam nie fihuruje śmiarotnaje pakarańnie. Ale ničoha dobraha nie budzie. Dumaju, los usich padsudnych užo vyznačany. Abviaščeńnie prysudu tolki farmalnaść, — adznačaje Alena.
U subotu, 14 maja, z Uładzimiram bačyłasia jaho advakat, jakaja raspaviała žoncy, što jon nie hublaje badzioraści duchu, na zdaroŭje nie skardzicca i z nahody suda nie pieražyvaje. Uładzimir paviedamiŭ advakatu, što ŭ jaho złamałasia mylica, i paprasiŭ žonku pryvieźci jamu novuju.
— U bližejšy čas budu sprabavać datelefanavacca da načalnika miedčaści, udakładniać ab mahčymaści pieradačy mylic — raspaviadaje žonka aktyvista. — Kanviert ź listom zvyčajna dachodzić za dva tydni, adnak apošni list mnie viarnuli nazad, nie prajšoŭ cenzuru. U im ja davoli emacyjna vykazvałasia z nahody taho, što adbyvajecca va Ukrainie i ŭ śviecie ŭ cełym.
Sama ž Alena ŭžyvuju bačyła muža ŭ žniŭni 2021 hoda, choć pieradačy dla jaho ŭ Hrodna vozić kožny tydzień. Muž i žonka kantaktujuć u asnoŭnym praź listy.
Nahadajem, invalida II hrupy Uładzimira Hundara zatrymali 30 śniežnia 2020 hoda. Jamu pradjavili abvinavačvańnie pa artykule 289 Kryminalnaha kodeksa «Akt teraryzmu». U prapahandysckich filmach, pakazanych na dziaržkanałach, paviedamlałasia, što jon kantaktavaŭ ź Mikałajem Aŭtuchovičam. U lutym 2021-ha KDB uklučyŭ Aŭtuchoviča i jašče 16 čałaviek u terarystyčny śpis, dzie było i proźvišča Hundara, adnak paźniej abvinavačvańni źniali, ale vystavili adrazu dva inšyja artykuły — stvareńnie złačynnaj arhanizacyi (č.2. 285 KK RB) i zachop dziaržaŭnaj ułady (č. 2. 357 KK RB).
Kamientary