Sudździa, jaki adpraviŭ Eduarda Palčysa na 13 hod u kałoniju, atrymaŭ pavyšeńnie
Łukašenka padpisaŭ ukaz ab pryznačeńni i vyzvaleńni sudździaŭ. Siarod tych, chto atrymaŭ novyja pasady, niekalki sudździaŭ, jakija viali palityčnyja spravy.
U centry — sudździa Piotr Arłoŭ. Fota: Tut.by
Piotr Arłoŭ, jaki pracavaŭ u Minskim haradskim sudzie, staŭ pieršym namieśnikam staršyni suda. Heta jon daŭ Eduardu Palčysu 13 hod kałonii ŭzmocnienaha režymu. A taksama adpraviŭ na 11 hod u kałoniju inžyniera BNTU Cichana Osipava za najezd na amapaŭcaŭ. Inšaja hučnaja sprava — za pahrozy ŭ bok prapahandysta Prydybajły, pa joj sudździa vypisaŭ minčuku 4 hady chimii.
Pavysili sudździu Natallu Buhuk — z Frunzienskaha rajona stalicy pieraviali ŭ Minski haradski sud. Jana dała pa dva hady kałonii žurnalistkam «Biełsata» Kaciarynie Andrejevaj i Darji Čulcovaj. Vynosiła i inšyja prysudy pa kryminalnych i administracyjnych palityčnych artykułach. Naprykład, adpraviła minčuka na 12 sutak u izalatar za dziciačy malunak na aknie, jaki visieŭ tam užo niekalki hod.
Na miesca namieśnika staršyni suda Minskaha rajona pastavili sudździu Antona Kołabava. Jon vypisvaŭ sutki za ściahi i biełyja sercajki ŭ voknach, davaŭ chatniuju chimiju za esemeski z pahrozami milicyjantu i źniavahu sudździ.
Sudździu Dźmitryja Kuroŭskaha pieraviali ź Leninskaha rajona Bresta ŭ Brescki abłasny sud. Kuroŭski vyrašaŭ los niekatorych zatrymanych pa «karahodnaj spravie» (naprykład, byłoha viadučaha «Biełaruś-4» Kanstancina Śvidunoviča — jamu dali paŭtara hoda chimii), aktyvistki Aleny Hnaŭk (nakinuŭ joj hod chatniaj chimii za abrazu prezidenta), daŭ try miesiacy aryštu bieraściejcu za nadpis «Stop Łukašenka».
Ciapier čytajuć
«Ruki preč ad sasisačak!». U sacsietkach horača abmiarkoŭvajuć baraćbu Łukašenki z kavaj na zapraŭkach. Niekatoryja zaklikajuć dziejničać bolš žorstka1919
Kamientary