Dyńko: Kali ruskija niazdolnyja ŭziać Čarnihaŭ, to pra jaki napad na Litvu moža iści havorka
Napad Rasii na Litvu niepaźbiežny, miarkuje Andrej Stryžak. «Absalutna pamyłkova,— adkazaŭ jamu ŭ sacsietkach Andrej Dyńko. — Ru armija akazałasia niazdolnaja ŭziać Čarnihaŭ. Pra jaki napad na krainu NATA u takim razie moža być havorka? I tym bolš ciapier, kali Ru armija vymatanaja Ukrainaj»,— napisaŭ Dyńko.
Dopis Andreja Dyńko vyklikaŭ žyvoje abmierkavańnie.
Na mierkavańnie adnaho z kamientataraŭ «Napad nie, a błakavańnie litoŭskich partoŭ całkam mahčyma» Dyńko adkazaŭ, što «rašeńnie pra ŭviadzieńnie błakady sankcyjnaha tranzitu prymałasia nie ŭ Vilni, a ŭ Bruseli, i jamu papiaredničali čysta matematyčnyja raźliki. Litva nie prymaje takija rašeńni ŭ adzinočku. Takija rašeńni prymaje NATA, na asnovie skrupuloznaha analizu».
«Uziać Čarnihaŭ nie zmahła, ale avijabombaŭ papaskidvała na žyłyja damy»,— adznačyła tryvohu mnohich Jaŭhienija Paraščanka.
«Na NATA nie papaskidvaješ — prosta tamu, što ŭ NATA jość čym źbivać», — zaŭvažyŭ Andrej Dyńko.
Mnohija jaho apanienty trymajucca dumki, što Rasija hatovaja iści dalej. Replika Volhi Jarochinaj «Pra niemahčymaść i niełahičnaść napadu RF na Kijeŭ ja čuła vielmi šmat pierad 24 lutaha. Niama tut łohiki» sabrała šmat łajkaŭ.
«Dy nie, tam to była i stapracentavaja mahčymaść i stapracentavaja łahičnaść (u łohicy rasijskich impieryjalistaŭ), tamu što ŭ Rasii była tatalnaja pieravaha ŭ siłach, a śviet byŭ maralna hatovy da zdačy Ukrainy. Tut — usio naadvarot. Maskva asłablenaja, a śviet nastrojeny bicca. Tamu — vyklučana», — pierakanany Dyńko.
«Isteryka — simptom słabaści, a nie siły»,— zaŭvažyŭ jon adnosna isteryki ŭ rasijskich ŚMI.
Andrej Stryžak, adnak, zastajecca pry svaim pierakanańni: «Ja kažu nie pra napad, a pra vajnu. I nie kažu, što jana adbudziecca zaŭtra. Ja kažu pra toje, što jość tolki dźvie stratehii nakont Kalinihradskaha ankłava — syści ź jaho, albo prabivać suchaputny šlach da jaho.
Vajna niepaźbiežnaja praź źmienu bałansu siłaŭ na Bałtycy, u jakim RF paśla ŭstupleńnia ŭ NATA Finlandyi i Šviecyi, budzie mieć najhoršyja stratehičnyja pazicyi z časoŭ Paŭnočnaj vajny.
Ruskija pasprabujuć viarnuć bałans na svaju karyść. Pytańnie času», — miarkuje Stryžak.
«Ëść jašče varyjant — prymirycca z novaj realnaściu i žyć dalej jak apošnija 30 hadoŭ», — paryruje Dyńko.
Kamientary