Rasijskich pałonnych va Ukrainie ŭtrymlivajuć u lepšych umovach, čym biełarusaŭ u łukašenkaŭskich turmach FOTA, VIDEA
Žurnalisty pabyvali ŭ łahiery, dzie ŭtrymlivajucca vajennapałonnyja, jakija vajavali suprać Ukrainy. «Ekskursija» vyklikała nieadnaznačnyja adčuvańni.
Bardziury bieleńkija, tamu što «jość kamu bialić»
Pieršaje, što prosta ŭjadajecca ŭ vočy — zanadta biełyja bardziury. Na terytoryi sapraŭdy dosyć čysta, paradnyja bardziury pakazalna pabielenyja, što z adnaho boku byccam by i dobra, a z druhoha, patychaje «saŭkovym».
Žurnalisty žartujuć:
— Čamu bardziury takija biełyja?
— Tamu što jość kamu bialić!
Razam z namieśnikam ministra justycyi Alenaj Vysockaj, jakaja pa sutnaści źjaŭlajecca kurataram ustanoŭ vykanańnia kryminalnych pakarańniaŭ i prabacyi, žurnalisty ahladajuć pryjomnaje adździaleńnie. Ničoha dziŭnaha — vydača adzieńnia, dušavyja pakoi, cyrulnia (pa žadańni). Nasuprać pryjomnaha budynka jość nievialikaja kaplica, śviatara nie zaśpieli, adnak u siarednim raz na tydzień jon źjaŭlajecca tam dla razmovaŭ z pałonnymi.
Paśla pryjomu pałonny traplaje ŭ karancin — zvyčajny pakoj na 10—12 łožkaŭ, dzie jon znachodzicca dva tydni.
«Za hety čas znajomimsia z pałonnym, vyvučajem jaho psichałahičnyja asablivaści, praviarajem najaŭnaść infiekcyjnych i inšych chvarob», — kaža kiraŭnik ustanovy.
Zuby, renthien i navat UHD
Miedycynskaja častka — honar łahiera. Tam jość i UHD, i sučasny renthien-kabiniet, i navat stamatałohija. Vysockaja abaviazkova nahadvaje, što pałonnyja ŭtrymlivajucca zhodna z umovami Ženieŭskaj kanviencyi.
«My ich pavinny ŭtrymlivać va ŭmovach, jakija adpaviednyja vajskovym. Charčavańnie, bytavyja ŭmovy, miedycyna», — kaža namieśnik ministra. Jana ŭdakładniaje, što ŭtrymańnie adnaho pałonnaha kaštuje dziaržavie prykładna 3 tysiačy hryvień.
«Utrymańnie vajennapałonnych maje svaju śpiecyfiku», — kaža padčas razmovy tet-a-tet namieśnik ministra.
«Łahistyčna bolšaść vajennapałonnych znachodziacca bližej da linii frontu, pakolki tak ich možna chutčej abmianiać i niama sensu vazić tudy-siudy», — tłumačyć Vysockaja.
Pytajusia, ci sapraŭdy ludziej čačenskaj nacyjanalnaści abmieńvajuć značna chutčej.
«Isnuje peŭnaja «ijerarchija» adnosna abmienaŭ. My bačym, što jak tolki asoby hetaj nacyjanalnaści traplajuć u pałon, to tut ža pastupaje zapyt na ich abmien. Tydzień-paŭtara i ich mianiajuć. Dalej cikavaść dla voraha pradstaŭlajuć rasijskija aficery — i čym vyšej, tym lepš. Šarahovych rasijcaŭ taksama mianiajuć, ale kali dla nas kožnaje žyćcio našaha vajara važnaje, to akupant stavicca inakš», — śćviardžaje Alena Vysockaja.
Dno hetaj «ijerarchii» — mabilizavanyja tak zvanych «DNR» i «ŁNR» — ich los rasiejcaŭ naohuł nie cikavić. Jany ich vykarystoŭvajuć jak harmatnaje miasa, a dalej śpisvajuć» —padkreślivaje namieśnik ministra.
U vytvorčaj zonie sustrakajem hrupu rabočych ź liku vajennapałonnych. Častka vyrablaje paddony, častka kleić pakiety. Nie śpiašajucca — im śpiašacca niama kudy. Z tymi pałonnymi, jakija znachodziacca pad śledstvam, razmaŭlać nie majem prava. Adnak razmaŭlajem z dvuma «vajskoŭcami ŁNR».
— Što adbyvajecca va Ukrainie?
— Vajna. Drenna, ale heta vajna.
— Čamu Rasija zabivaje mirnych žycharoŭ? Paśla abstrełaŭ Vińnicy zahinuli dzieci, žančyny.
— Jany stralajuć rakietami, a kudy ŭžo jano patrapić.
— Jak trapili ŭ farmavańni t. zv. «ŁNR»?
— Tak skłalisia abstaviny.
Svoj udzieł u vajnie tłumačać «abstavinami». Adzin ź ich kaža, što navat nie stralaŭ, a byŭ kiroŭcam ciahača dla techniki. Inšy pryznajecca, što ŭ bajavych dziejańniach udzielničaŭ, adnak stajaŭ nibyta ŭ druhoj linii nastupu.
— Naviny hladzicie?
— Tak, ukrainskaje telebačańnie.
— Što vy dumajecie ab tym, što z sakavika vas nie abmianiali?
— My ž nie viedajem, jany ŭklučajuć nas u śpisy (na abmien) ci nie. Jość nadzieja. Prajšło nie tak šmat času.
Abodva pryznajucca, što chočuć dadomu i čakajuć abmienu. Alena Vysockaja nastojvaje, što takich ludziej ŭ takich łahierach šmat, ich nie śpiašajucca abmieńvać. «Niekatoryja siabie tak kamfortna adčuvajuć, što marać navat pieravieźci siamju bližej», — kaža Vysockaja.
Čynoŭnica prosta kaža, što paśla zakančeńnia vajny va Ukrainy budzie jašče adna prablema, jakuju treba budzie vyrašyć — što rabić z hetymi pałonnymi. Jany atrymlivajuć prysudy, adsiedziać i, kali ich nie abmianiajuć, vyjduć na volu.
«Kamfort» za hrošy achviary ahresii
Što ž takoha «kamfortnaha» moža być u turmie? Režym dnia, trochrazovaje charčavańnie, dostup da telebačańnia i spartyŭnaj placoŭki (u łahiery jość svoj stadyjon). Spalnyja miescy ŭ ciaple. Paśla lutaŭska-sakavickich zaśniežanych akopaŭ, kul i hałodnaha pajka heta dla mnohich sapraŭdy vyratavańnie. Niekatoryja z pałonnych navat mieli mahčymaść patelefanavać dadomu.
«Vajna — vielmi niespraviadlivaja štuka. Ale my pavinny ŭtrymlivać ich (vajennapałonnych) va ŭmovach, praduhledžanych ženieŭskaj kanviencyjaj. Z nadziejaj, što da našych abaroncaŭ buduć stavicca hetak ža. Dzieści, mahčyma, im (ukrainskim vajennapałonnym) daduć lišniuju butelku vady i heta vyratuje im žyćcio. Kožny naš hieroj patrebny nam žyvym i na voli», — kaža namieśnik ministra.
Dakładnuju kolkaść asob, jakija ŭtrymlivajucca ŭ pałonie, jana nie ŭdakładniaje, akcentujučy, što vorah moža «dla kolkaści» schapić na akupavanych terytoryjach ludziej ź mirnych žycharoŭ.
Hladzicie taksama:
Jak biełarusaŭ katujuć na Akreścina — śviedčańni źniavolenych, eks-supracoŭnika IČU, razvahi historyka ŭ filmie «NN»
«U hetaj krainie čałaviek ničoha nie značyć. Ciabie niama, ty materyjał, kavałak miasa». Dacent, jakaja prajšła Akreścina i Mahiloŭ, raskazała pra vytančanyja sposaby katavańnia
Ciapier čytajuć
Śpiavačku Meryjem Hierasimienka na praciahu dvuch hadoŭ źbivaŭ muž33
Śpiavačku Meryjem Hierasimienka na praciahu dvuch hadoŭ źbivaŭ muž
Jak Jadźvihin Š. smažyŭ u redakcyi skvarki i čamu łožak Kupały nahadvaŭ dochłaha viarbluda. Ivulin i Astapienia źniali zachaplalny film pra «Našu Nivu»77
Kamientary
a z našaha "sanatoryja" vyjdzieš, dyk musiš šče zapłacić za sadieržanije svajo ŭ takich asabliva "cudoŭnych" umovach