Kinuła pracu na rudniku i stała čempijonkaj Biełarusi pa bodzibiłdynhu
Valancina Karatčenia — dvuchrazovaja absalutnaja čempijonka Biełarusi pa bodzibiłdynhu. U hety sport jana pryjšła ŭ 2019 hodzie. Vystupaje ŭ katehoryi spabornickaha bodzibiłdynhu «fitnies-bikini», dzie asabliva važnaja praparcyjnaść i harmaničnaść linij cieła, padciahnutaść i pryvabnaja źniešnaść, pišuć «Minsk-Naviny».
Stała apošniaj, a ŭ nastupnym hodzie — absalutnaj čempijonkaj Biełarusi
— Vyrašyła pasprabavać siabie ŭ hetym sporcie paśla taho, jak nie atrymałasia z-za traŭmy całkam realizavać siabie ŭ lohkaj atletycy. Joj ja zajmałasia ŭ školnyja hady, — tłumačyć Valancina. — Pačała rychtavacca da spabornictvaŭ viasnoj 2019 hoda, i ŭžo vosieńniu taho ž hoda vyjšła na scenu. Asnoŭnym startam byŭ Kubak Respubliki Biełaruś, na jakim ja, na žal, nie zmahła pakazać vynik. U adnym z vychadaŭ navat stała apošniaj u katehoryi, što dało mnie vializny zarad matyvacyi dla padrychtoŭki da spabornictvaŭ u nastupnym hodzie.
Samym składanym dla dziaŭčyny akazałasia znajści treniera, jaki maje dakładnaje ŭjaŭleńnie pra katehoryju, u jakoj vyrašyła jana vystupać.
— Hetaje razumieńnie nie pavinna składacca tolki z taho, što trenier bačyŭ unutry krainy abo ŭ sacyjalnych sietkach. Kali ty maješ vialikaje žadańnie vystupać i pieramahać, to tvoj trenier i ty pavinny raŭniacca na vystupy spartovak na mižnarodnych turnirach. Heta tyčycca paziravańnia, vybaru kupalnika i pryncypu pabudovy trenirovačnaha pracesu. Mienavita z hetaj pryčyny ja źmianiła treniera paśla pieršaha spabornickaha siezona.
Viadoma, byli i bytavyja składanaści nakštałt pastajannych trenirovak i vytrymlivańnia dyjety. Ale heta abaviazkovaja ŭmova dla spartoŭca — tolki tak atrymajecca pakazać na spabornictvach formu, jakaja maksimalna adpaviadaje ŭsim kryteryjam.
— Paśla niaŭdałaha vystupu ŭ 2019 hodzie maim trenieram staŭ Aŭsiejka Anton Antonavič. U minułym jon spartoviec, na toj momant źjaŭlaŭsia sudździoj Biełaruskaj fiederacyi bodzibiłdynhu i fitniesu, rychtavaŭ atletaŭ u maju katehoryju i braŭ viedy i dośvied mienavita ź mižnarodnych startaŭ. Za hod pracy nad saboj pryjšłosia pamianiać usio ŭ maim trenirovačnym pracesie i paziravańni. I, vyjšaŭšy nastupnym razam na scenu roŭna praz hod na čempijanacie RB u 2020 hodzie, ja spačatku stała čempijonkaj krainy, a zatym pieramahła ŭ absalutnym pieršynstvie, staŭšy absalutnaj čempijonkaj Biełarusi.
U siezonie ŭ spartsmienki zastavałasia jašče 2 mižnarodnyja turniry — u Ryzie i Prazie, na jakich jana stała 3-j i 2-j adpaviedna. Vynik dla čałavieka ŭ pieršym uśviadomlenym spabornickim siezonie ŭražvaje.
— Dalej vychad u 2021 hodzie na nastupnym čempijanacie RB, i ja znoŭ stała absalutnaj čempijonkaj krainy. Zatym trapiła ŭ finał čempijanatu Jeŭropy pa bodzibiłdynhu, ź jakoha mnie ŭdałosia pryvieźci na radzimu cudoŭny kubak, — kaža dziaŭčyna.
Praź miesiac jana stała jašče i čempijonkaj Łatvii, a pa zaviaršeńni spabornickaha siezona — absalutnaj čempijonkaj mižnarodnaha turniru IFBB Georgia Grand Prix 2021. Heta pryniesła ŭ skarbonku ŭznaharod biełaruski jašče i samaje važnaje, čaho sprabuje dasiahnuć kožny ŭ bodzibiłdynhu — kartu prafiesijanała.
Pajezdka na adzin turnir abychodzicca ad 1000 da 2000 jeŭra
Bodzibiłdynh — dosyć darahi vid sportu, jaki ŭ nas u krainie nie finansujecca.
— Vydatki vialikija: pačynajučy z charčavańnia i zakančvajučy startavymi ŭznosami na turnir. Ciapier u Biełarusi bodzibiłdynh nijak nie finansujecca z boku dziaržavy, a spabornictvy arhanizoŭvajuć entuzijasty, ź jakich składajecca Fiederacyja bodzibiłdynhu. Usie mižnarodnyja starty spartoŭcy apłačvajuć samastojna, i hetyja vydatki davoli vialikija. Heta i košt avijapieralotaŭ, i pražyvańnie ŭ krainie praviadzieńnia turniru, i startavyja ŭznosy, i apłata hrymu, i pakupka kupalnikaŭ. U siarednim pajezdka na adzin turnir abychodzicca ad 1000 da 2000 jeŭra», — raspaviadaje dziaŭčyna. Amatarskija spabornictvy — heta ŭ bolšaści svajoj tolki ŭkładańni. Nijakija hrašovyja pryzy tam nie praduhledžanyja.
Ale jość šerah turniraŭ, u jakich spartsmieny za pieramohu i pryzavyja miescy atrymlivajuć hrašovyja ŭznaharody. U prafiesijnaj lizie hrašovyja pryzy — heta norma, i piaciorka finalistaŭ kožnaj katehoryi zaŭsiody atrymlivaje harantavanuju sumu. Pry hetym udzieł u prafiesijnych turnirach nie patrabuje apłaty startavaha ŭznosu. U prafiesijanałaŭ jość tolki štohadovy nievialiki členski ŭznos. Tak što možna z upeŭnienaściu kazać pra mahčymaść paŭnavartasnaha zarobku ŭ paśpiachovych prafiesijnych atletaŭ.
Bo samuju prestyžnuju ŭznaharodu dla bodzibiłdara, pra-kartu, dziaŭčyna ŭžo atrymała, dla jaje takija spabornictvy — jašče i niadrenny sposab zarabić. Tym nie mienš jość jašče niaskoranyja viaršyni.
— Chaču stać čempijonkaj śvietu. Heta samaja krutaja ŭznaharoda dla bodzibiłdara, —dzielicca Karatčenia.
Achviaravała pracaj na rudniku na karyść sportu
Pačynajučy svoj šlach u sporcie, dziaŭčyna nie bajałasia, što padrychtoŭku da spabornictvaŭ treba było sumiaščać z zusim niaprostaj pracaj — jana była majstram drabnieńnia na rudniku «Biełaruśkalija».
— Hrafik byŭ dva praz dva: 12 hadzin pracy ŭ dzionnuju źmienu, a na nastupny dzień — načnaja. Paśla — «adsypny» i vychadny. Paśla źmieny z 8 ranicy da 20 viečara išła na treniroŭku, pierad načnoj taksama chadziła ŭ zału, — uspaminaje dziaŭčyna. — Kala hoda tamu syšła z rudnika, tamu što heta vielmi składanaja fizičnaja praca i jana pierastała dazvalać mnie paŭnavartasna rychtavacca da spabornictvaŭ. Usio razam adbirała šmat sił. Tamu pryjšłosia zrabić vybar, pra jaki ja nie škaduju. Ciapier pracuju trenieram i dapamahaju dziaŭčynkam schudnieć, pryjści ŭ formu.
Sama dziaŭčyna trenirujecca ŭ zale amal kožny dzień: 4 siłavyja treniroŭki na tydzień u mižsiezońnie, 6 — u pieryjad «suški». Za ciažkimi vahami nie honicca — u jaje katehoryi heta zusim nie važna.
— Padčas padrychtoŭki imknusia minimizavać spažyvańnie charčovaha śmiećcia. Čym čyściej budzie charčavańnie, tym lepš budzie vynik.
Jość mierkavańnie, što idealnaje cieła fitnies-bikini niaredka kaštuje prablem sa zdaroŭjem z-za surjoznych fizičnych nahruzak i abmiežavańniaŭ u charčavańni.
— Nielha skazać, što niama nijakich minusaŭ pry padrychtoŭcy da spabornictvaŭ u našaj katehoryi. Ale ich možna minimizavać ci całkam vyklučyć pry pravilnym padychodzie da trenirovak i charčavańnia. Taksama vialikaje značeńnie maje ŭzrostavy faktar: kožnaja spartsmienka pavinna razumna aceńvać svaje siły i mahčymaści, — upeŭnienaja dziaŭčyna.
Jak takich uzrostavych abmiežavańniaŭ u fitnies-bikini niama — demanstravać idealnaje cieła na spabornictvach možna ŭ lubym uzroście. Hałoŭnaje, padkreślivaje Valancina, žadańnie i zdaroŭje. Sama dziaŭčyna pra sychod sa sportu pakul nie zadumvajecca.
— Majo asiarodździe padtrymlivaje majo žadańnie zajmacca mienavita hetym sportam. Bo kali čałaviek na žyva bačyć vynik na scenie, jon razumieje, što heta daloka nie toje, što skłałasia ŭ narodnym stereatypie pra žanočy bodzibiłdynh. Niama nijakaj praźmiernaj hipiertrafii myšcaŭ, mužčynskich tvaraŭ u adnosna žanočych ciełach ci ŭsiaho taho, čym niedaśviedčanyja strašać budučych spartovak. Naadvarot, maja katehoryja dobraja tym, što ŭ joj nie vitajecca myšačnaja hipiertrafija, a aceńvajecca praca nad farmavańniem pravilnych, naturalnych i, najvažniejšaje, žanockich praporcyj cieła. Samaje hałoŭnaje — toje, što niaredka ja stanaŭlusia matyvataram dla ludziej, jakija nazirajuć za mnoj, — pierakananaja spartsmienka.
Kamientary