Volha Sieviaryniec: Ciažka hladzieć na syna, kali toj pytajecca: «Čamu tata tak doŭha nie viartajecca da nas?»
Žonka asudžanaha palityka raspaviała «Narodnaj voli» pra apošnija viestki ad muža z kałonii.
Nahadajem, što za kratami Pavieł Sieviaryniec znachodzicca z 7 červienia 2020 hoda. U mai minułaha hoda palityka asudzili na siem hadoŭ kałonii ŭzmocnienaha režymu za «arhanizacyju masavych biesparadkaŭ».
Ciapier palitviazień adbyvaje pakarańnie ŭ Škłoŭskaj papraŭčaj kałonii №17.
— Listy ad Paŭła nam ź siamjoj prychodziać prykładna raz na tydzień, — kaža Volha. — I ja atrymlivaju listy, i syn Francišak, bo tata jamu śpiecyjalna dasyłaje svaje malunki. Sprabuje malavać štotydzień, chacia, nakolki viedaju, asablivych umoŭ dla malavańnia tam niama.
Pavieł maluje dla Franciška cerkvy, mašynki, niejkija vułkany, ziemlatrusy i łaviny, i synu heta vielmi padabajecca.
Tamu kantakt z Paŭłam praź listavańnie jość. Viedaju, što jon starajecca i matuli svajoj rehularna pisać, chvalujecca, jak taja adnaŭlajecca paśla pierałomu nahi.
Jon vielmi ciažka pieranosić rasstańnie ź siamjoj, ale duchoŭna trymajecca vielmi dobra.
— Viedaju, što nie tak daŭno vy zakončyli dapracoŭvać viktarynu, jakuju Pavieł składaŭ za kratami kala dvuch hod…
— Pa-pieršaje, my płanujem vypuścić kalandar na 2023 hod z malunkami Paŭła, jakija jon dasyłaŭ na volu.
Pa-druhoje, za dva hady ŭ niavoli jon i nasamreč skłaŭ chryścijanskuju viktarynu, jakuju nazvaŭ «Dreva žyćcia». Tam amal 330 pytańniaŭ pa dziesiaci temach, viktaryna pryśviečanaja viadomym ludziam, padziejam, paniaćciam, a taksama biełarusam, jakija vieryli ŭ Boha i źmianiali hetuju krainu.
Hetuju viktarynu my sabrali, nadrukavali, pierapravieryli fakty i ciapier na asnovie ŭsiaho hetaha źbirajemsia zrabić nastolnuju ahulnaadukacyjnuju hulniu na biełaruskaj movie.
Adnym słovam, pakul Pavieł za kratami, my niejkija jaho spravy sprabujem ździajśniać.
— Francišak niešta dasyłaje tatu?
— U Franciška ciapier adzin ź lubimych zaniatkaŭ — pračnucca i zranku ŭziacca za malavańnie «dla lubimaha taty». I taksama maluje dastatkova šmat — kaścioły, jak umieje, mašynki, niejkija inšyja rečy.
Taksama ja starajusia pisać Paŭłu listy ad syna, bolš pra jaho raspaviadać.
Francišak užo padros, jamu bolš za čatyry hady, tamu ciapier staŭ vielmi asensavana sumavać biez taty. Vielmi ciažka hladzieć na syna, kali jon pytajecca: «Čamu tata tak doŭha nie viartajecca da nas?»
Składany ciapier dla ŭsich nas čas, ale starajemsia adzin dla adnaho niešta rabić i prosta trymacca.
Kamientary