Nacyjanalnaja akademija navuk Biełarusi paviedamiła, što 30 žniŭnia pamior viadomy biełaruski navukoviec, akademik Alaksandr Michalevič. Jamu było 87 hadoŭ.
Alaksandr Michalevič naradziŭsia 20 vieraśnia 1938 hoda ŭ Viciebsku. U 1961 hodzie skončyŭ Biełaruski politechničny instytut i ŭsio svajo prafiesijnaje žyćcio pryśviaciŭ navucy i enierhietycy.
Jon pracavaŭ u Fizika-techničnym instytucie i Instytucie jadziernaj enierhietyki Akademii navuk BSSR, dzie prajšoŭ šlach ad navukovaha supracoŭnika da kiraŭnika łabaratoryi. Paralelna vykładaŭ u Biełaruskim dziaržaŭnym univiersitecie.
U roznyja hady Michalevič uznačalvaŭ Instytut prablem enierhietyki NAN Biełarusi i Abjadnany instytut enierhietyčnych i jadziernych daśledavańniaŭ «Sosny». Taksama pracavaŭ u Instytucie ciepła– i masaabmienu imia Alaksieja Łykava, a z 2010 hoda byŭ hałoŭnym navukovym supracoŭnikam i navukovym kiraŭnikom Instytuta enierhietyki NAN Biełarusi.
Michalevič byŭ śpiecyjalistam u halinie ciepłafiziki, ciepła– i masaabmienu, ahulnaj i jadziernaj enierhietyki. Jon daśledavaŭ ciepłapieradaču, sistemy achałodžvańnia atamnych i ciepłavych elektrastancyj, a taksama pytańni enierhaefiektyŭnaści.
Navukoviec udzielničaŭ u raspracoŭcy enierhietyčnych i dziaržaŭnych prahram Biełarusi, u tym liku dakumientaŭ u śfiery jadziernaj enierhietyki, enierhaźbieražeńnia i enierhietyčnaj biaśpieki. Jon taksama byŭ udzielnikam likvidacyi nastupstvaŭ avaryi na Čarnobylskaj AES.
Michalevič apublikavaŭ bolš za 250 navukovych rabot, u tym liku vosiem manahrafij i čatyry vučebnyja dapamožniki, mieŭ 20 vynachodnictvaŭ.
U 1986 hodzie jon staŭ členam-karespandentam, a ŭ 2000 hodzie — akademikam NAN Biełarusi. Za navukovuju dziejnaść byŭ uznaharodžany miedalom Francyska Skaryny, a taksama staŭ łaŭreatam premii NAN Biełarusi imia akademika Alaksieja Łykava i premii akademij navuk Ukrainy, Biełarusi i Małdovy.
Kamientary