MTZ choča rabić traktary z hazavymi ruchavikami i traktary-bieśpiłotniki
Pra płany pačać vytvorčaść traktaroŭ z hazavymi ruchavikami i traktaroŭ ź bieśpiłotnym kiravańniem skazaŭ hienieralny dyrektar Minskaha traktarnaha zavoda Vital Voŭk, paviedamlaje BiełTA. Usio ŭ kaapieracyi z rasijskimi pradpryjemstvami. Ale treba taksama infrastruktura i prafiesijnyja kadry.
«Minski matorny zavod sumiesna z TAA «RaryTEK» (Nabiarežnyja Čaŭny, Tatarstan) raspracavaŭ hazavy ruchavik dla techniki roznaha pryznačeńnia. Dumaju, u najbližejšy čas my pačniom vytvorčaść nievialikimi partyjami traktaroŭ z takimi matorami. Ciapier na bazie TAA «TVK MTZ-Tatarstan» idzie rabota nad stvareńniem doślednaha ŭzoru madeli BELARUS 2022, — skazaŭ Vital Voŭk. — U Biełarusi hety napramak ciapier aktyŭna raźvivajecca. U pryvatnaści, «Homsielmaš» zrabiŭ kambajny na čysta hazavym palivie».
Pavodle słoŭ hiendyrektara MTZ, haz siońnia ŭ dva razy tańniejšy, čym dyzielnaje paliva.
«Pieršapačatkovaja cana takoha traktara budzie krychu vyšejšaja. Adnak treba ličyć nie pieršapačatkovuju canu, a košt vałodańnia. A jon zusim inšy. Heta vyhadna, i da hetaha treba imknucca», — adznačyŭ jon.
Akramia taho, Vital Voŭk raskazaŭ, što ciapier pradpryjemstva pracuje nad bieśpiłotnym traktaram BELARUS-A3523i z elektramiechaničnaj biesstupieńčataj tranśmisijaj, jaki moža vykonvać zadańni, sfarmiravanyja apierataram pa kanale addalenaj suviazi.
«Hety traktar my prademanstravali na vystaŭcy «Ahravołha» ŭ Kazani. Taksama ŭ chutkim časie pakažam jaho i na śpiecyjalizavanaj vystaŭcy sielskahaspadarčaj techniki «Ahrasałon» u Maskvie, — paviedamiŭ kiraŭnik pradpryjemstva. — Biezumoŭna, u hetaha prajekta jość budučynia.
Adnak pavinny być stvoranyja nieabchodnyja ŭmovy dla funkcyjanavańnia bieśpiłotnaj techniki. U pryvatnaści, infrastruktura, ličbavyja karty paloŭ, ustojlivy sihnał 5G, a taksama najaŭnaść prafiesijnych kadraŭ».
Kamientary