Z nahody Suśvietnaha Dnia turyzmu, jaki adznačajecca 27 vieraśnia, Nacyjanalny statystyčny kamitet padrychtavaŭ statystyku pa ŭjaznym i vyjaznym turyźmie ŭ Biełarusi za 2021 hod.
U top-5 samych papularnych krain dla zamiežnaha adpačynku ŭ minułym hodzie ŭvajšli Jehipiet, Turcyja, Ukraina, AAE i Rasija. Jehipiet u hetym śpisie lidziruje ź vialikim adryvam — 217,8 tysiač čałaviek. U Turcyi pabyvali 147 tysiač biełarusaŭ, u jašče davajennaj Ukrainie — 32 tysiačy.
Naviedvali biełarusy i ekzatyčnyja krainy. Naprykład, u Mazambiku pabyvali piać čałaviek, va Uhandzie — čatyry, u Amanie — try. Da Vieniesueły dabralisia 52 turysty.
Ahułam, pavodle źviestak Biełstata, za miažoj pabyvali na adpačynku ŭ 2021 hodzie 478,8 tysiač biełarusaŭ. Jany naviedali 91 krainu.
Što da ŭjaznoha turyzmu, to ŭ 2021 hodzie kolkaść turystaŭ i ekskursantaŭ, jakija arhanizavana naviedali Biełaruś, skłała, jak padličyli ŭ Biełstacie, 71,4 tysiač čałaviek.
Tradycyjna lidziruje ź vialikim adryvam Rasija — amal 52 tysiačy čałaviek.
Pry hetym ahulny ŭjazny turystyčny patok byŭ značna bolš — 3,4 miljona čałaviek z ulikam pierasiačeńniaŭ miažy na adkrytym biełaruska-rasijskim učastku. Jak mienavita tam vioŭsia ŭlik, nie ŭdakładniajecca.
Pabyvali ŭ Biełarusi i turysty z ekzatyčnych dla nas krain — Šry-Łanki (44 čałavieki), Uruhvaja (18), Brazilii (11), Kot-dJIvuara (8), Sieniehała (7), Hambii, Hany, Uhandy (pa 6), Kosta-Ryki (3).
Pry hetym cikavaść da arhanizavanych turystyčnych pajezdak u miežach Biełarusi, pa padlikach Biełstata, prajavili kala 1,2 młn.čałaviek.
Kamientary