Nadziavali pakiet na hałavu, nanieśli 50 udaraŭ: stała viadoma, jak źbivali palitviaźnia Anatola Łatušku
Stryječnaha brata Paŭła Łatuški Anatola asudzili da šaści hadoŭ kałonii i štrafu ŭ 300 bazavych.
Z materyjałaŭ spravy viadoma, što Łatušku byli pryčynienyja cialesnyja paškodžańni supracoŭnikami milicyi ŭ budynku Centralnaha RUUS 31 studzienia — adrazu paśla zatrymańnia.
Jaho pryznali vinavatymi pa piaci artykułach Kryminalnaha kodeksa: raspaŭsiudžvańnie ŭlotak da refierendumu, udzieł u Maršy, malavańnie «Pahoni», spaleńnie dziaržaŭnaha ściaha. Paśla zatrymańnia Łatuški było viadoma, što jaho źbivali. Padčas suda, jaki prachodziŭ u adkrytym režymie, byli ahučanyja padrabiaznaści prymianieńnia fizičnaj siły da jaho ŭ Centralnym RUUS — «Viasna» apublikavała ich.
Sam Łatuška padčas śledstva raspaviadaŭ: «31 studzienia kala 01:00 ja byŭ zatrymany pablizu doma, dastavili ŭ Centralnaje RUUS, praviali na čaćviorty pavierch u adzin z kabinietaŭ, dalej pačali razmaŭlać supracoŭniki, jakija tam znachodzilisia. Supracoŭnik nadziavaŭ mnie dva razy na hałavu polietylenavy pakiet, pry hetym jany tłumačyli, što chočuć atrymać ad mianie niejkija źviestki, pra jakija ja sam nie viedaŭ. Chtości z supracoŭnikaŭ uziaŭ u ruki dubinku, pačaŭ pahražać joj…» [sudździa Karsiuk prapuskaje častku tekstu].
«Pra ŭdary niejkija, nie mienš za 50 razoŭ…», — praciahvaje sudździa.
«Kazali pra toje, što chočuć atrymać ad mianie infarmacyju, što tyčycca niejkich tielehram-kanałaŭ. Ja nie razumieŭ, što ad mianie chočuć. Ad taho, što na mianie akazvajuć fizičny cisk, ja pahadziŭsia davać pakazańni, jakija mnie skazali supracoŭniki milicyi. Pry hetym pa fakcie ja nazvanych złačynstvaŭ nie ździajśniaŭ. U dalejšym, kali ja pačaŭ davać pakazańni, fizičnuju siłu da mianie taksama supracoŭniki milicyi nie ŭžyvali. Dalej mianie spuścili ŭ dziažurnuju častku, i na nastupny dzień ja pracavaŭ sa śledčym. U dalejšym fizičnuju siłu da mianie nichto nie ŭžyvaŭ. Chaču ŭdakładnić, što ludzi, jakija pradstavilisia supracoŭnikami HUUS, pakinuli kabiniet da pačatku prymianieńnia da mianie fizičnaj siły», — skazana ŭ tłumačeńni Łatuški.
Pavodle danych miedycynskich dakumientaŭ SIZA-1 ad 2 lutaha, jakija ahučyli na pracesie, u Łatuški byli zafiksavanyja šyrokija hiematomy jahadzičnaj vobłaści z abodvuch bakoŭ, zadniaj, unutranaj i vonkavaj pavierchni ściohnaŭ z abodvuch bakoŭ, jakija ŭtvarylisia ad kantaktu ź ćviordym tupym pradmietam/pradmietami, indyvidualnyja asablivaści jakoha ŭ dakumientach nie zafiksavanyja.
Łatuška na sudzie rastłumačyŭ, što hiematomy ŭtvarylisia ad udaraŭ dubinkami supracoŭnikami milicyi.
Palitviazień padavaŭ zajavu ab zaviadzieńni kryminalnaj spravy ŭ dačynieńni da supracoŭnikaŭ, jakija jaho źbivali, adnak 24 krasavika była vyniesienaja pastanova ab admovie. U jakaści dokazaŭ, što supracoŭniki nibyta nie ŭžyvali fizičnuju siłu, — kniha ŭliku prymianieńnia fizičnaj siły ŭ Centralnym RUUS, u jakoj adsutničajuć takija danyja. Taksama byli zapatrabavanyja charaktarystyki na supracoŭnikaŭ — abiedźvie dobryja.
U pastanovie ab admovie ad zaviadzieńnia kryminalnaj spravy ad 24 krasavika paznačana, što adsutničajuć danyja, jakija pakazvajuć na ździajśnieńnie supracoŭnikami milicyi jakich-niebudź kryminalna-karalnych dziejańniaŭ u dačynieńni da Łatuški. Anatol nie abskardziŭ pastanovu. Sudździa pacikaviŭsia čamu, bo «nu kali vy śćviardžali, što było takoje…»
«Nu tak ja nakiravaŭ list, usie padstavy byli dla pravierki, ničoha nie adbyłosia, prosta dasłali admovu», — adkazaŭ Łatuška, a potym udakładniŭ, što abskardžvać, na jaho dumku, było biessensoŭna.
-
Pačobut nie staŭ razmaŭlać z šaściorkami — ni z Pratasievičam, ni z Vaskrasienskim
-
Vaskrasienski: Azotnyja ŭhnajeńni i sankcyi ŭ adnosinach fiz– i jurasobaŭ — i 1135 palitviaźniaŭ buduć u Vilni
-
«Pryvieźli maju žonku i skazali, što jaje buduć katavać». Para z Ukrainy raskazała žachlivuju historyju pieraśledu ŭ Biełarusi
Kamientary