U Miadźviedžynie tatalna vysiakajuć les. Aficyjnaja viersija — ratujuć ad karajeda
U staličnym mikrarajonie Sucharavie niespakojna: apošni lesapark rajona imkliva hublaje drevy. Ułady śpisvajuć maštabnyja vysiečki na epidemiju karajeda. Ale kali ŭvažliva vyvučyć horadabudaŭničyja płany i navukovyja daśledavańni, vymaloŭvajecca sumnaja karcina biazdumnaści.
Sumnyja fotazdymkami piańkoŭ tam, dzie jašče niadaŭna byŭ husty les, źjavilisia ŭ sacsietkach. Vysiečka źjaŭlajecca praciaham vysiečak, jakija vialisia ŭ papiarednija hady, pašyrajučy i biez taho vialikuju prahalinu ŭ bok zabudovy z boku cotnaha boku vulicy Maksima Hareckaha.
Minčuki pačali vykazvać samyja roznyja viersii dla čaho spatrebiłasia niščyć lesapark na praciahu niekalkich hadoŭ. Adny kažuć pra nibyta žadańnie prakłaści aŭtamabilnuju darohu praź zialonuju zonu, kab złučyć vulicy, inšyja — uvohule pra rasčystku placoŭki pad kamiercyjny žyły kompleks.
Hetaja panika całkam zrazumiełaja, uličvajučy toje, jak časta ŭ Minsku zialonyja (i ŭvohule lubyja achoŭnyja) zony raptam pieratvarajucca ŭ budaŭničyja placoŭki, adnak u hetym vypadku strachi pakul nie znachodziać dakumientalnaha paćviardžeńnia.
U zaćvierdžanym prajekcie detalnaha płanavańnia (PDP) hetaj terytoryi nie paznačana nijakich kapitalnych abjektaŭ na miescy ciapierašnich vysiečak. U bazach dziaržaŭnych zakupak taksama nie značycca nivodnaha tenderu na prajektavańnie ci budaŭnictva ŭ hetym kvadracie. Bolš za toje, kali pahladzieć na samu hieamietryju vysiečanych palan, jana absalutna nie supadaje z vosiami susiednich vulic, što robić viersiju pra prakładku tranzitnaj mahistrali niepraŭdapadobnaj.
Jašče adna viersija, jakaja aktyŭna abmiarkoŭvajecca haradžanami, źviazanaja sa spartyŭnaj infrastrukturaj. Sapraŭdy, u siaredzinie lutaha načalnik hałoŭnaha ŭpraŭleńnia sportu Minharvykankama anansavaŭ stvareńnie ŭ Miadźviedžynie adrazu troch łyžarolernych tras praciahłaściu da troch z pałovaj kiłamietraŭ, a taksama punkta prakatu z pakojami dla trenieraŭ. Pačuŭšy heta, mnohija vyrašyli, što les valać mienavita pad spartyŭny mieha-prajekt.
Ale łyžarolernaja trasa — heta, pa sutnaści, zvyčajnaja asfaltavanaja darožka, chaj sabie i krychu šyrejšaja za ściežku lesaparku. Jaje prajektujuć tak, kab jana vichlała pamiž drevami, maksimalna ŭpisvajučysia ŭ isny łandšaft. Dla prakładvańnia takich maršrutaŭ davodzicca prybirać asobnyja stvały, ale dla hetaha absalutna nie patrebna vysiakać les cełymi hiektarami, utvarajučy pustečy pamieram z futbolnaje pole. Spartyŭnaja infrastruktura prosta nie zdolnaja rastłumačyć tych maštabaŭ začystki, jakija my bačym siońnia.
Što dumajuć navukoŭcy pra situacyju ŭ lesaparku
Aficyjnaja viersija Minskaj lesaparkavaj haspadarki zastajecca niaźmiennaj ź minułych hadoŭ: va ŭsim vinavaty žuk-karajed, jaki nibyta tatalna źniščaje ihličnyja drevy praź źmienu klimatu i nastupstvaŭ mielijaracyi.
Čynoŭniki pierakonvajuć, što dreva moža stajać zialonym, ale ŭžo być miortvym znutry, tamu pad siakieru iduć navat vonkava zdarovyja stvały. Zručnaja pazicyja, jakuju vielmi składana asprečyć zvyčajnamu minaku, ale jakaja razychodzicca z navukovymi danymi.
U 2022 hodzie navukoŭcy hieahrafičnaha fakulteta BDU praviali detalovaje daśledavańnie ekałahičnaha stanu mienavita hetaha lesaparku. Jany vyvučyli bolš za sotniu ihličnych dreŭ u roznych jaho častkach. Vysnovy daśledčykaŭ akazalisia vielmi cikavymi.
Absalutnaja bolšaść drevastojaŭ była pryznana zdarovaj abo prosta asłablenaj, što źjaŭlajecca absalutnaj normaj dla lesu, zacisnutaha ŭ ščylnaj haradskoj zabudovie.
Sapraŭdy mocna paškodžanyja drevy navukoŭcy znajšli tolki na paŭdniovaj miažy parku, uzdoŭž šumnaj i zahazavanaj vulicy Šaranhoviča. Adnak paradoks palahaje ŭ tym, što siońniašnija tatalnyja vysiečki iduć zusim nie tam.
Jany skancentravanyja ŭ centralnaj častcy Miadźviežyna, jakaja, zhodna z navukovymi dadzienymi, znachodziłasia ŭ całkam zdavalnialnym stanie i nie patrabavała nijakich radykalnych sanitarnych začystak.
Rukatvornaja antrapahiennaja nahruzka
Čynoŭniki zvažajuć, što pryčynaj prablem u lesaparku źjaŭlajecca źmianieńnie klimatu i ahresiŭnaje antrapahiennaje ŭździejańnie na zialonuju zonu. Adnak sami stavilisia da hetaj terytoryi z hrebavańniem da ekałohii.
U pieryjad z 2017 da 2019 hoda žychary rajona biezvynikova skardzilisia na toje, što kamunalnyja słužby pieratvaryli paŭnočnuju častku lesaparku ŭzdoŭž vulicy Hareckaha ŭ sapraŭdny palihon dla budaŭničych adchodaŭ. Padčas madernizacyi ciepłasietak tudy tysiačami ton zvalvali minieralny hrunt.
Ekskavatary razraŭnoŭvali hory ziamli, vyšynia jakich miescami pieravyšała čałaviečy rost, chavajučy pad saboj karaniovyja sistemy žyvych dreŭ.
Tady administracyja rajona i ekołahi adkazvali ludziam biurakratyčnymi adpiskami, nazyvajučy heta ŭzhodnienym «časovym składavańniem». Z takim varvarskim umiašańniem u zialonuju zonu nie treba nijakaha karajeda.
«Naša Niva» — bastyjon biełaruščyny
PADTRYMAĆCiapier čytajuć
Pahladzieli film «Piaščotna da siabie», źniaty pa dzika papularnaj biełaruskaj knizie — pra zaciukanuju žančynu, jakuju chočuć zrabić dla ŭsich zručnaj33
Kamientary