Adpačynak u Vjetnamie za $500 u sutki. Biełarusy raskazali, što rasčaravała za takija hrošy
Siamiejnaja para ź nievialikaha haradka pad Minskam praviała adpačynak u Vjetnamie, na Fukuoku. Ekzatyčnyja kanikuły ŭ piacizorkavym hateli praciahłaściu 10 načej abyšlisia $4300. Dadatkovyja traty skłali jašče kala $700. Vandroŭniki padzialilisia z Myfin.by uražańniami ad lutaŭskaha adpačynku, u jakim adzin dzień kaštavaŭ jak miesiačnaja zarpłata ŭ niekatorych biełarusaŭ.
«Chaciełasia ŭkłaścisia ŭ biudžet da $4000»
Natalla i Alaksandr vybrali dla adpačynku Vjetnam nie vypadkova. U pašparcie ŭ biełarusaŭ jość adznaki ab naviedvańni Tajłanda, Bali i Niačanha. Ciapierašniaja pajezdka stała šostaj pa liku ŭ Aziju i druhoj na vostraŭ Fukuok. Vyrašalnuju rolu adyhraŭ zapusk pramych rejsaŭ ź Minska. Pa pucioŭku źviarnulisia da pravieranaha turahienta, jaki arhanizoŭvaje adpačynak dla siamji na praciahu mnohich hadoŭ.
— Jašče šeść hadoŭ tamu Azija nie była nastolki papularnaj, možna było palacieć u dva razy tańniej. Nas pryciahvaje kałaryt krainy. Adekvatna stavimsia da miascovych kanonaŭ čyścini, jakija dalokija ad našych. Hatovyja mirycca z žyŭnaściu, a za hady pajezdak źjavilisia i svaje łajfchaki, kab adpačynak prajšoŭ kamfortniej. Upieršyniu vyrašylisia pavysić uzrovień hatela da «piaciorki». My nie zarablajem vialikich hrošaj, tamu latajem u lepšym vypadku raz na hod, a to i radziej. Rupliva pracujem biez vychadnych i balničnych, kab tydzień pahrecca na soniejku i atrymać asałodu ad šumu mora. Tamu padychodzim da arhanizacyi svajho adpačynku z razmacham, nie škadujučy srodkaŭ, — raskazvajuć vandroŭniki.
Svoj bilet u leta siamja zabraniravała za paŭhoda.
Pieršapačatkovy biudžet na pajezdku z usimi spadarožnymi tratami byŭ da $4000. U pracesie vybaru hatela pryjšłosia raskašelicca i vyjści za vyznačanyja miežy. Da hetaha turysty adpačyvali pieravažna ŭ «čaćviorkach» i zaŭsiody byli zadavolenyja. Bolš darahi hatel uraziŭ aŭtentyčnym interjeram: bahaćciem bambuka, vannaj z kamienia i inšymi instahramnymi rašeńniami.
Padkuplała i toje, što budynak novy — pabudavany niekalki hadoŭ tamu pasiarod palmavaha haju. Vopytnyja vandroŭniki zrabili staŭku na dobry stan žylla, bo za taki termin tam naŭrad ci štości znasiłasia.
Palot na Fukuok zaniaŭ usiaho dzieviać hadzin i akazaŭsia maksimalna kamfortnym. Dla zručnaści turysty zahadzia vybrali miescy z bolš šyrokaj adlehłaściu pamiž siadzieńniami, što abyšłosia ŭ 60 rubloŭ na čałavieka ŭ adzin bok. U aeraport dabiralisia na svaim aŭtamabili, jaki pakinuli na stajancy aeraporta. Parkoŭka za 10 sutak vyliłasia ŭ dadatkovyja 100 rubloŭ.
«Pryhožy numar akazaŭsia nieprydatnym dla žyćcia»
Hatel, jaki tak uraziŭ svaimi fotazdymkami i vodhukami, sustreŭ drennym pacham i nasiakomymi. Akramia taho, zahadzia apłaciŭšy pražyvańnie na druhim paviersie, turysty atrymali numar na pieršym. Na pieramovy ab źmienie apartamientaŭ syšli pieršyja try dni ź dziesiaci.
— Heta nie prosta kapryz, a biaśpieka. Šancy sustreć źmiej pry pražyvańni na pieršym paviersie značna vyšejšyja, čym na druhim. Adnojčy my zrabili takuju pamyłku ŭ Tajłandzie, i sustreć susiedziaŭ, jakija poŭzajuć, hetym razam nie chaciełasia. Naš turahient sprabavaŭ vyrašyć pytańnie ź Biełarusi, a my štodnia prasili źmianić numar na recepcyi. U adkaz — tolki ŭśmieški. Vjetnamcy — vielmi dobrazyčlivy narod, ale nijakaj dapamohi my nie atrymali. Pryjšłosia źmirycca i adpuścić situacyju.
Pryhožy numar akazaŭsia nieprydatnym dla žyćcia. U šafie panavali syraść i drenny pach, a sa stoli kapała vada, tamu pryjšłosia zachoŭvać usie rečy ŭ čamadanie. Bambukavyja ścieny nie byli hiermietyčnyja, praz ščyliny ŭ numar pastajanna lacieli nasiakomyja i zapaŭzała žyŭnaść. Z boku hatela dla abarony dali zvyčajny dychłafos. Ratavalisia fumihatarami, pryviezienymi ź Biełarusi na ŭsialaki vypadak.
Praź niekatory čas stała zrazumieła, što piersanał chałatna stavicca i da pryborki. Pa brudnaj padłozie basanož nie pachodziš, ale ŭ hateli pra heta pakłapacilisia, vydaŭšy tapki. Praŭda, u ich užo pabyvali nohi inšych turystaŭ — vjetnamki vidavočna pierajšli biełarusam u spadčynu ad minułych žylcoŭ. U vannaj pakoi nie adčynialisia šafki, a jašče ŭ numary nie było sušyłki dla adzieńnia.
Varta adznačyć, što paścielnuju bializnu i ručnik vydavali čystyja. Jašče ź plusaŭ — dobraja kuchnia. Śniadanki byli nie vielmi raznastajnymi, ale pažyŭnymi. Taksama ŭ Vjetnamie paŭsiudna dobry internet: patelefanavać dadomu praź miesiendžary možna ź luboj kaviarni, a na terytoryi hatela suviaź była navat u mory, tamu kuplać miascovuju simku nie pryjšłosia.
U hateli jość kamiery videanazirańnia i achova.
— U nas ničoha nie skrali, my ničoha nie hublali. U vodhukach čytali, što hod tamu na terytoryi hatela byŭ kradziež. Mahčyma, biaśpieku pa hetaj pryčynie ŭzmacnili. Prahulacca pa plažy hatela dazvolena i minakam, a voś pazaharać na šezłonhu možna za $7,5.
«Paŭnavartasnaja viačera na dvaich kaštuje $20—25»
— U śpiakotu jeści asabliva nie chočacca, tamu abychodzilisia śniadankami ŭ hateli i viačerami ŭ kaviarniach. U Mujne (turystyčnaja viosačka na macierykovaj častcy Vjetnama. — Zaŭv. red.) ceny na strytfud i ŭ kaviarniach nižejšyja. Charčavacca na vostravie vyjšła bolš zatratna. Udałosia znajści ŭsiaho adzin restaran niepadalok ad hatela, jaki «rassmakavali» ŭsie hości Fukuoka, tamu časta źbirałasia čarha z achvotnych smačna paviačerać.
Paŭnavartasnaja viačera z napojami na dvaich u kaviarni kaštuje $20—25. Dva razy dazvolili sabie pajeści ŭ hateli, dzie ceńnik vyšejšy ŭ dva razy, što sumarna abyšłosia ŭ $100. U jakaści pierakusaŭ bałavalisia smuzi i sadavinaj.
-
Smuzi — $1,5—2;
-
Sadavina — da $2 za 1 kh, naprykład, manha — $1,5.
Safary-park i kvartał na vadzie
U liku papularnych rytuałaŭ u Vjetnamie — pachody na masaž. Sałony pracujuć jak u hatelach, tak i na vulicy.
— Dazvolili sabie dva razy schadzić na masaž noh. Sieans doŭžycca paŭhadziny i kaštuje $7. U hateli takaja ž pasłuha abydziecca prykładna ŭ $13. Masaž śpiny — $12 za 40 chvilin, a ŭ hateli — $24.
Pakolki na vostravie biełarusy hościać nie ŭpieršyniu, to nie śpiašalisia zapisvacca na ŭsie ekskursii adrazu. Vyrašyli samastojna adpravicca ŭ safary-park na taksi, kab pakarmić žyrafaŭ z ruk i ŭbačyć inšych žyvioł u realnym asiarodździ pražyvańnia.
— Standartny bilet u park kaštuje kala $32, asobna možna kuplać pačastunki dla žyvioł za $3. Tańniej zahadzia apłacić uvachodnyja kvitki na sajcie parka.
Uraziŭ turystaŭ i zabaŭlalny kompleks Grand World na poŭnačy vostrava. Kvartał pabudavany na vadzie i nahadvaje Vieniecyju. Roznakalarovyja domiki raźmieščany ŭzdoŭž kanała, pa jakim kursujuć handoły. Uvachod va vjetnamskuju Vieniecyju pakul biaspłatny, a voś prakacicca na łodačcy kaštuje $25.
Što pryvieźci dadomu?
— Hetym razam vyrašyli nie vieźci sadavinu, pakolki ŭ našych kramach dastatkova ekzotyki. Abmiežavalisia cukierkami z kakosaŭ i manha prykładna pa $3 za ŭpakoŭku 200 h. Jašče ŭziali hiel ałoe — $2,5 za ciubik, 1 kh kavy luvak u zierniach — u rajonie $19.
Usie dadatkovyja vydatki na vostravie, jakija ŭklučajuć pachody ŭ kaviarni, pakupki dadomu i zabavy, abyšlisia prykładna ŭ $700.
Abmien valuty
Karty Visa i Mastercard biełaruskich bankaŭ biez prablem pracujuć u Vjetnamie. Va ŭstanovach addajuć pryjarytet bieznajaŭnamu raźliku, a ŭ drobnych paviljonach — kupiuram.
— My vieźli z saboj dalary, ale tolki novaha ŭzoru. Na staryja kupiury tut horšy kurs. Hrošy mianiali ŭ zvyčajnaj kramie ŭ vioscy. Nichto nas nie ašukaŭ.
Vostraŭ i turysty
Adpačynak u lutym zaŭsiody krychu daražejšy, čym u inšyja miesiacy, pakolki ŭ Azii napoŭnicu rychtujucca da sustrečy «Teta» — vjetnamskaha Novaha hoda pa miesiacavym kalendary. U liku pryjemnaściaŭ — upryhožvańnie vulic i prastor u čyrvonych adcieńniach. Ź minusaŭ — stanovicca bolš turystaŭ z Kitaja, jakija taksama śpiašajucca sustreć svajo śviata. Pa hetaj pryčynie zahruzka ŭ hatelach vysokaja.
Pavodle słoŭ Natalli, dla adpačynku ŭ Vjetnamie biez aściaroh možna vybirać i trochzorkavy hatel. Paśla šaści pajezdak u Aziju pryjšli da taho, što «čaćviorki» byli značna lepšyja za darahuju «piaciorku». Taksama žančyna adznačyła, što piać hadoŭ tamu na vulicach było čyściej. Pramyja rejsy i abmiežavańni pa inšych napramkach pieranasycili vostraŭ turystami, što paciahnuła za saboj źnižeńnie ŭzroŭniu servisu.
U liku asnoŭnych parad pierad pajezdkaj u Vjetnam:
-
brać z saboj fumihatary ad maškary i inšaj žyŭnaści;
-
addać pieravahu biudžetnamu hatelu ŭ metach razumnaj ekanomii;
-
vybirać praktyčnaje adzieńnie (futbołki i šorty), a taksama zručny abutak.
Kamientary