Pierajezd u Majami i prava bačycca ź dziećmi. Stali viadomyja padrabiaznaści skandalnaha razvodu Šakiry i Žerara Pikie
Kałumbijskaja śpiavačka i katałonski futbalist abviaścili pra rasstańnie ŭ červieni paśla 12 hadoŭ sumiesnaha žyćcia. Paśla pieramovaŭ, jakija doŭžylisia bolš za 12 hadzin, Šakira i Žerar Pikie pryjšli da pahadnieńnia ab apiecy nad dziećmi, kab abaranić ich ad umiašańnia presy.
45-hadovaja kałumbijskaja śpiavačka i 35-hadovy ŭžo były prafiesijny futbalist zrabili niečakanaje paviedamleńnie pra rasstavańnie ŭ červieni.
Zhodna z pahadnieńniem, paśla Kaladaŭ Šakira pierajedzie z Barsiełony ŭ Majami, dzie jana atrymaje apieku nad dziećmi. Krynicy, znajomyja z pahadnieńniem, paviedamili ispanskim ŚMI, što Pikie zmoža latać z Barsiełony ŭ Amieryku, kab bačyć svaich dziaciej, kali zachoča, i što vydatki buduć padzielenyja.
U niadaŭnim intervju Šakira raspaviała, što jaje dzieci čujuć u škole i čytajuć niepryjemnyja naviny ŭ internecie. Taksama jana paskardziłasia na pavodziny presy.
The Times raskazvaje, što ŭ paniadziełak uviečary, kali para abmiarkoŭvała pahadnieńnie ŭ svaim byłym domie ŭ Barsiełonie sa svaimi advakatami, na vulicy stajali fatohrafy.
U minuły čaćvier Pikie niečakana abviaściŭ, što pakidaje svoj kłub «Barsiełona» i sychodzić z prafiesijnaha futboła.
«Ja nikoli nie budu hulać za inšuju kamandu», — skazaŭ jon.
Tym časam Šakira sutyknułasia z sudom u Ispanii pa abvinavačańniach u machlarstvie z padatkami. Jaje abvinavačvajuć va ŭchileńni ad vypłaty padatkaŭ u pamiery 14,5 młn jeŭra ŭ pieryjad z 2012 pa 2014 hod. Prakuratura patrabuje vaśmi hadoŭ pazbaŭleńnia voli i štrafu ŭ pamiery 23,7 młn jeŭra. Joj treba budzie viarnucca z Majami na sud, data jakoha jašče nie pryznačana.
Kamientary